ޕެރިސް (ޑިސެމްބަރު 9) - އެންމެ ފަހުން ފްރާންސް ގައުމީ ފުޓްބޯޅަ ޓީމުން ކުޅުނު މެޗުތަކަށް އެ ޓީމުގެ ކެޕްޓަން، ކީލިއަން އެމްބާޕޭ ނުކުޅުނު ސަަބަބު ސާފުކޮށްދޭން ޖެހެނީ އެ ޓީމުގެ ކޯޗު ޑިޑިއޭ ޑެޝޯމްޕްސް ކަމަށް އެމްބާޕޭ ބުނެފި އެވެ.
ކެނަލް ޕްލަސް އަށް ދިން އިންޓަވިއުއެއްގައި އެމްބާޕޭ، 25، ވަނީ އޭނާގެ ކެރިއަރުގެ މިހާތަނަށް ހިނގި ކަންތައްތަކާ ގުޅޭގޮތުން ގިނަ ސުވާލުތަކަކަށް ޖަވާބުދީފަ އެވެ. އެ ގޮތުން، ފްރާންސް އިން އެންމެ ފަހުން ކުޅުނު މެޗުތަކުގައި އެމްބާޕޭ ނުކުޅުމުން ގިނަ ފާޑުކިޔުންތަކެއް އަމާޒުވި އެވެ.
"އެންމެ ފުރަތަމަ މެޗުތަކުން އަހަރެން އެދުނީ ހާލަތުގެ ގޮތުން ޓީމުން ބްރޭކަކަށް، ދެން، ނޮވެމްބަރުގައި ކުޅުނު މެޗުތަކުގައި އެ ހިނގި ކަންތައްތަކަކާ ބެހޭގޮތުން އަހަންނަށް ނުބުނެވޭނެ، އެއީ އެކަން ހާމަކުރެވޭނީ ޑެޝޯމްޕްސް އަށް، ސަބަބު ބުނެދެވޭނީ ވެސް އޭނަ އަށް،" ފްރާންސް ގައުމީ ޓީމަށް 86 މެޗުން 48 ގޯލު ޖަހާފައިވާ އެމްބާޕޭ ބުންޏެވެ.
އެމްބާޕޭ ޓީމަށް ނުނެގި ސަބަބާ ގުޅޭގޮތުން، ޑެޝޯމްޕްސް މިހާތަނަށް ސީދާ ޖަވާބެއް ދީފައިނުވެ އެވެ. އޭނާ ބުނީ އެއީ ޓީމުގެ ނިންމުމެއް ކަމަށެވެ.
ފްރާންސް ގައުމީ ޓީމަށް ކުޅުމަކީ އަބަދުވެސް އޭނާ ހާއްސަ އަހައްމިއްޔަތުކަމެއް ދޭ ކަމެއް ކަމަށް އެމްބާޕޭ ވަނީ ބުނެފަ އެވެ. އަދި އޭނާ މިހާރު ފްރާންސަށް ކުޅެން މާ ބޮޑު ސަމާލުކަމެއް ނުދޭ ކަމަށް ދެކެވޭ ވާހަކަތަކާ ބެހޭގޮތުން އެމްބާޕޭ ބުނީ ހަގީގަތަކީ ފްރާންސަށް ކުޅެން ލިބޭ ކޮންމެ ފުރުސަތެއް ވެސް ދެކެނީ ޝަރަފެއްގެ ގޮތުގައި ކަމަށެވެ.
ހިލޭ ޓްރާންސްފާއެއްގައި މި ސީޒަނުގައި ޕީއެސްޖީ ދޫކޮށް ރެއާލް މެޑްރިޑަށް ބަދަލުވެ، އެމްބާޕޭ އަށް އޭނާގެ އަސްލު ލެވަލްގައި ކުޅެވޭ ގޮތެއްނުވެ އެވެ. އެމްބާޕޭ ވަނީ މިހާތަނަށް ރެއާލަށް ކުޅެދިން 21 މެޗުން 11 ގޯލު ޖަހައިފަ އެވެ. އޭނާ ބުނީ، ރެއާލްގައި ފެންވަރު ސާބިތުކޮށް ކާމިޔާބު ހޯދޭނެ ކަަމުގެ ޔަގީންކަން އެބައޮތް ކަމަށެވެ.
