ރޯމް، އިޓަލީ (ޑިސެމްބަރު 9) - އިޓާލިއަން ލީގުގައި ރޭ ލާޒިއޯ އަތުން 1-0 އިން ބަލިވެ ނަޕޯލީ އަށް ލީގުގެ އެއް ވަނަ މަގާމު ގެއްލިއްޖެ އެވެެ.
ލީގު ތާވަލުގެ އެއް ވަނައިގައި އޮތީ މި ހަފްތާގައި، މިލާން އަތުން 2-1 އިން މޮޅުވި އެޓަލަންޓާ އެވެ. އެޓަލަންޓާ އަށް ވަނީ 15 މެޗުން 34 ޕޮއިންޓް ލިބިފަ އެވެ. ދެ ވަނައިގައި އޮތް ނަޕޯލީ އަށް 15 މެޗުން ލިބިފައިވަނީ 32 ޕޮއިންޓެވެ. ތިން ވަނައިގައި އިންޓަ އޮތީ 14 މެޗުން 31 ޕޮއިންޓާ އެކު އެވެ. އިންޓަ އަށް މެޗު ހަމަކުރާއިރު އެއް ވަނައިގައި އޮތް އެޓަލަންޓާއާ ޕޮއިންޓުގެ ގޮތުން އެއްވަރުކޮށް ލަނޑުގެ ތަފާތުން ކުރިއަށް އެރޭނެ އެވެ.
ނޭޕްލްސްގެ ޑިއޭގޯ އަރްމާންޑޯ މަރަޑޯނާ ސްޓޭޑިއަމްގައި ކުޅުނު މެޗުގެ ބޮޑުބައި ދެ ޓީމު އޮތީ ލަނޑެއް ނުޖެހި އެއްވަރުވެފަ އެވެ. ލާޒިއޯ މޮޅުވީ މެޗުގެ 79 ވަނަ މިނިޓްގައި ޖެހި ގޯލުންނެވެ. އެ ޓީމަށް މި ލަނޑު ޖަހައިދިނީ ސްވިޑެންގެ ގުސްޓާވް އައިސަކްސަން އެވެ.
މި މެޗުގައި ނަޕޯލީން ލަނޑެއް ޖެހޭތޯ ގިނަ އެޓޭކްތަކެއް ކުރި ނަމަވެސް ކާމިޔާބުވާ ގޮތެއްނުވި އެވެ.
މެޗަށް ފަހު ނަޕޯލީގެ ކޯޗު އެންޓޯނިއޯ ކޮންޓޭ ބުނެފައިވަނީ، މުޅި ސީޒަނުގައި ވެސް ނަޕޯލީން ކުޅެން ގަސްދުކޮށްފައިވާ ސްޓައިލަށް ކުޅެގެން މި މެޗުން ވެސް މޮޅުވާން ކުޅުންތެރިން ކުރި މަސައްކަތް ފާހަަގަކުރާކަމަށެވެ. މި މެޗުގައި ގޯސްކޮށް ދިޔައީ ނަތީޖާ ކަމަށާއި މި މެޗުގައި މަސައްކަތް ކުރި ވަރަށް ކުރުމަށް ފަހު، ލަނޑު ޖަހަން ލިބޭ ފުރުސަތުތަކުގެ ބޭނުން ކުޑަކޮށް ރަނގަޅުކުރި ކަމުގައި ވިޔަސް، ލީގުގައި ކުރިއަށް ހުރި ގިނަ މެޗުތަކަކުން ނަޕޯލީ މޮޅުވާނެ ކަމަށް ކޮންޓޭ ވަނީ ބުނެފަ އެވެ.
