ލަންޑަން (ޑިސެމްބަރު 7) - އިނގިރޭސި ޕްރިމިއާ ލީގުގެ ވެސްޓް ހޭމް ޔުނައިޓެޑުން އެންމެ ފަހުން ކުޅުނު މެޗުތަކުގެ ނަތީޖާތައް ދަށްކޮށް ދިޔަ ނަމަވެސް، އެ ޓީމުގެ ކޯޗު ހުލެން ލޮޕެޓެގީ ވަކިނުކޮށް، އަދިވެސް އޭނާ އަށް ކަންކަން ރަނގަޅުކުރަން ފުރުސަތެއް ދޭން ނިންމައިފި އެވެ.
ލީގުގައި އެންމެ ފަހުން ކުޅުނު ފަސް މެޗުގެ ތެރެއިން ލޮޕެޓެގީގެ އިރުޝާދުގެ ދަށުން ވެސްޓް ހޭމް މޮޅުވީ އެންމެ މެޗަކުންނެވެ. އެންމެ ފަހުން ވެސްޓް ހޭމް ކުޅުނު މެޗުން ލެސްޓާ ސިޓީ އަތުން ބަލިވުމުން، ވެސްޓް ހޭމްގެ ބޯޑު މެމްބަރުންގެ މެދުގައި ލޮޕެޓެގީ ވަކިކުރަން ވޯޓެއް ނެގުނުއިރު، މިހާރު ނިންމާފައިވަނީ، ފަހު ފުރުސަތެއް ދީ ޓީމުގެ ހާލަތު ބަދަލުކުރެވޭތޯ ލޮޕެޓެގީ ފަހަތުގައި އަދި ހުރުމަށެވެ.
މިދިޔަ ސީޒަން ފެށުނުތަނާ ވުލްވްސްގެ ކޯޗުކަމުން ވަކިކުރި ލޮޕެޓެގީ އަށް ވެސްޓް ހޭމްގެ ކޯޗުކަން ދިނީ މިދިޔަ މެއި މަހު އެވެ. އަނެއްކާ ވެސް ސީޒަނެއްގެ ކުރީކޮޅުގައި ޓީމެއްގެ ކޯޗުކަމުން ވަކިކުރުމާ ގާތުގައި ހުރި ލޮޕެޓެގީ ބުނީ، ވުލްވްސްގައި ދިމާވި ކަންކަމާއި ވެސްޓް ހޭމްގެ މި ހާލަތު އެއްގޮތް ކޮށްގެން ވާހަކަ ދެއްކުން އެއީ އެންމެ ރަނގަޅު ގޮތެއް ނޫން ކަމަށެވެ.
"ވަރަށް ތަފާތު ދެ ހާލަތެއްގެ ވާހަކަ މި ދައްކަނީ. އަހަރެން ވަރަށް ޝައުގުވެރިކަމާ އެކު، އިތުބާރާ އެކު ވެސްޓް ހޭމްގައި މަސައްކަތް މި ކުރަނީ. ކުރިން ވެފައި ހުރި ކަމެއްގެ ވާހަކަ ދައްކަން ނުވިސްނަން، ބޭނުމީ ވެސްޓް ހޭމް އިން ބޭނުންވާ ފޯމަށް އެ ޓީމު ގެންނަން، އެ މަސައްކަތުގައި މި ހުރީ،" ކުރިން ސްޕެއިން ގައުމީ ޓީމާއި ރެއާލް މެޑްރިޑަށް ވެސް އިރުޝާދުދިން ލޮޕެޓެގީ ބުންޏެވެ.
މި ފަހަރު ލީގުގައި ވެސްޓް ހޭމް އިން ކުޅުނު 14 މެޗުން އެ ޓީމު ހަތަރު މެޗުން މޮޅުވިއިރު، ހަތް މެޗުން ވަނީ ބަލިވެފަ އެވެ. ކުރިއަށް އޮތް މެޗުން ވެސްޓް ހޭމް ބަލިވެއްޖެނަމަ، އެއީ ލޮޕެޓެގީގެ ފަހު މެޗަށް ވުމުގެ ފުރުސަތު އޮތްއިރު، އެ ކަމާ ބެހޭގޮތުން ދެކެނީ ކިހިނެއްތޯ އެހުމުން ލޮޕެޓެގީ ބުނީ، އެއީ އޭނާ އެހާ ބޮޑަށް ވިސްނާ ކަމެއް ނޫން ކަމަށް ބުނެފަ އެވެ.
ވެސްޓް ހޭމް އިން ދެން ކުޅޭ މެޗުގައި ބައްދަލުކުރަނީ ލޮޕެޓެގީގެ ކުރީގެ ޓީމު ވުލްވްސްއާ އެވެ.
