"ގާނޫނުއަސާސީގެ ދިފާއުގައި ރައްޔިތުން" ގެ ނަމުގައި އަންނަ ޑިސެމްބަރު 10، ގައި ހެންވޭރު ކާނިވާ ސަރަހައްދުގައި އިދިކޮޅު އެމްޑީޕީން ބާއްވަން މަސައްކަތް ކުރާ ޖަލްސާގެ ތާރީހު ބަދަލުވެއްޖެ ކަމަށް ބުނެ ވެރިކަން ކުރާ ޕީއެންސީ އެކްޓިވިސްޓުން ދޮގު ފަތުރަން ފަށައިފި އެވެ.
އެމްޑީޕީން ތާރީހު ބާއްވަން ނިންމާފައިވާ ތާރީހު ބަދަލުވެއްޖެ ކަމަށް ބުނެ ދޮގު ފަތުރަމުން ދަނިީ ސަރުކާރަށް ތާއީދު ކުރާ ބައެއް މީހުން ސޯޝަލްމީޑިއާގެ އެކި މަންސަތަކުގައި ހިންގާ އެކައުންޓުތަކުންނެވެ.
އޭގެތެރޭގައި ފޭދޫ ދާއިރާގެ ކުރީގެ މެންބަރު އަދި ޓޫރިޒަމް މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު އާއި ޕީއެންސީގެ އިސް އެކްޓިވިސްޓު، މަރިޔަމް ޝިއުނާ ހިމެނެ އެވެ. ނިހާދު ވަނީ އެމްޑީޕީން ޖަލްސާ ބާއްވާ ދުވަސް ބަދަލުވި ކަމަށް ބުނެ ސުވާލުތަކެއް އުފައްދައިފަ އެވެ.
"ދުވަސް ބަދަލު ކުރުމުގެ ހިކުމަތަކީ ކޮބާ؟ ކޮންފަދަ ކަމެއް ރާވަނީ؟" މި ސަރުކާރު ވެރިކަމަށް އައުމާ ހަމައަށް ވެސް އެމްޑީޕީ މެންބަރެއްގެ ގޮތުގައި ހުންނެވި ނިހާދު ކުރެއްވި ޕޯސްޓުގައިވެ އެވެ.
އޭގެ އިތުރުން ވެސް ސަރުކާރާއި ރައީސް މުއިއްޒު މެދުކެނޑުމެއްނެތި ޕްރޮމޯޓް ކުރަމުންދާ އެކައުންޓުތަކުން ވެސް ދަނީ ޖަލްސާއަށް އެމްޑީޕީން ތައްޔާރުކޮށްފައިވާ އޮފިޝަލް ޕޯސްޓަރު ބަދަލުކޮށްގެން ދޮގު މައުލޫމާތު ހިމަނައިގެން އެކި ފޮޓޯ ދައުރު ކުރަމުންނެވެ. މި ޕޯސްޓުތައް ސަރުކާރުގެ އެކި އޮފިޝަލުން ގެންދަވަނީ ރީޕޯސްޓް ވެސް ކުރައްވަމުންނެވެ.
ގާނޫނުއަސާސީގެ ދިފާއުގައި އަންނަ އަންގާރަ ދުވަހު އެމްޑީޕީން ޖަލްސާއެއް ބާއްވަން ނިންމައި އެކަން އިއުލާނު ކުރީ މަޖިލިސް މެންބަރުންގެ ގޮނޑި ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭ ގޮތަށް ގާނޫނުއަސާސީއަށް މިދިޔަ ނޮވެމްބަރު 21، ގައި ގެނައި ބަދަލާ ގުޅިިގެންނެވެ.
އެ ބަދަލާ ގުޅިގެން އިދޮކޮޅު ދަ ޑިމޮކްރެޓްސް އިން ވެސް ގެންދަނީ ސިލްސިލާ ކަންމަތީ ބައްދަލުވުންތަކެއް ބާއްވަމުންނެވެ. ނަމަވެސް 10، ގައި އޮންނަ ޖަލްސާގައި އެ ޕާޓީން ބައިވެރިވާނެކަން އަދި އިއުލާނުކޮށްފައެއް ނުވެ އެވެ.
