ގދ. ގައްދޫގައި ޕްރީ ސްކޫލްގެ ހިދުމަތް ފެށުމަށް ހުއްދައަށް އެދިފައިވާތާ ފަސް މަސްދުވަސް ފާއިތުވެފައިވާ ކަމަށާއި ސަރުކާރުން އެ ހުއްދަ ނުދެނީ ސިޔާސީ ސަބަބުތަކަށްޓަކައި ކަމަށް އެ ރަށު ކައުންސިލުން ބުނެފި އެވެ.
އެޑިއުކޭޝަން މިނިސްޓަރު ޑރ. އިސްމާއިލް ޝަފީއުއަށް ގައްދޫ ކައުންސިލުގެ ރައީސް މުހައްމަދު އަހުމަދު ފޮނުއްވި ސިޓީއެއްގައި ވިދާޅުވީ ކައުންސިލުން ޕްރީ ސްކޫލް ރަޖިސްޓްރީ ކުރުމަށް މި އަހަރު ޖުލައި މަހުން ފެށިގެން ކުރަމުންދާ މަސައްކަތަށް އެ މިނިސްޓްރީން އެއްބާރުލުން ނުދޭ ކަމަށެވެ.
"ސިޔާސީ ގޮތުން މަނިކުފާނާ އަދި ސަރުކާރާއި ގައްދޫ ކައުންސިލުގެ ޕޮލިޓިކަލް އެފިލިއޭޝަން ދިމާނުވުމަކީ ގައްދޫ ރައްޔިތުންގެ ހައްގަށް އަރައިގަނެވިގެންވާނެ ކަމެއް ނޫން،" އެ ސިޓީގައި ބުނެފައިވެ އެވެ.
ޕްރީސްކޫލް ރަޖިސްޓްރީ ނުކޮށްދީ ދިގު ދައްމަމަމުން ދާނަމަ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގަނޫނުގެ ދަށުން އެކަމަށް ބޭނުންވާ ހުއްދަ ލިބުނީ ކަމަށް ބަލައި ގައްދޫ ކައުންސިލުގެ ޕްރީ ސްކޫލުގެ ހިދުމަތް ފަށާނެ ކަމަށް ވެސް ކައުންސިލުން ބުންޏެވެ.
"ޕްރީ ސްކޫލް ރަޖިސްޓްރީ ނުކޮށް މިކަމަށް ބޭނުންވާ ހުއްދަ ނުދީ ދިގުދައްމަވަމުް ތިޔަގެންދަވަނީ ގައްދޫގެ ދަރިންގެ ޅަފަތުގެ ތައުލީމަށް ގަސްދުގައި އަދި ފަޅުގައި ހުރަސް އަޅުއްވަމުން،" ސިޓީގައިވެ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަބުރަށް އަރައިގަނެފައިވާ ކަމަށް ބުނެ ގައްދޫ ކައުންސިލުގެ ރައީސްއަށް ފިޔަވަޅު އަޅަން ލޯކަލް ގަވަމަންޓް އޮތޯރިޓީން ވަނީ އަންގައިފަ އެވެ. އެގޮތަށް ތުހުމަތު ކުރަނީ ކައުންސިލުގެ ވަޓްސްއަޕް ގްރޫޕެއްގައި ދެއްކި ވާހަކަތަަކެއްގެ ސަބަބުންނެވެ.
