ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ބަލި މީހަކާ ގުޅޭ މައުލޫމާތު ހިމެނޭ ނޫސް ބަޔާން އެކްސް އިން ޑިލީޓްކޮށް، އެ މައުލޫމާތު އާންމު ކުރެވުނީތީ މިރޭ މައާފަށް އެދިއްޖެ އެވެ.
އެންސްޕާއިން ނެރުނު ނޫސް ބަޔާނެއްގައި ބުނީ އެ އެޖެންސީން ބަލި މީހަކަށް އެހީ ނުދިން ކަމަށް ބުނެ، ސޯޝަލް މީޑިއާގައި ދޮގު މައުލޫމާތު ފަތުރާ އެ އެޖެންސީ ބަދުނާމުވާ ގޮތަށް ފެތުރުނު ވާހަކަތަކާ ގުޅިގެން ނެރުނު ބަޔާނުގައި ބަލި މީހާއަށް ދީފައިވާ އެހީގެ މައުލޫމާތު ހިމެނިފައިވާތީ މައާފަށް އެދޭ ކަމަށެވެ.
"މި ބަޔާނުގައި ބަލި މީހާގެ އެއްވެސް އައިޑެންޓިޓީއެއް ބަޔާން ކޮށްފައި ނެތް ނަމަވެސް، އެ ބަޔާނުގައި ބަލި މީހާއަށް މި އެޖެންސީން ދީފައިވާ އެހީގެ މައުލޫމާތު ހިމެނިފައި ވާތީ އެއީ އެންމެ ރަނގަޅު ގޮތް ކަމުގައި ނުވުމާއެކު، އެފަދަ މައުލޫމާތެއް ހިމެނިފައިވާތީ އެކަމަށް މި އެޖެންސީން މައާފަށް އެދެން،" އެންސްޕާއިން ބުންޏެވެ.
އެންސްޕާއިން ލިބުނު އެހީއާ މެދު އޮތް ހިތްހަމަނުޖެހުން ސޯޝަލް މީޑިއާގައި ހިއްސާކުރި މީހަކަށް މިދިޔަ އަހަރުން ފެށިގެން އެ އެޖެންސީން ދިން އެހީގެ ތަފުސީލުތައް އާންމު ކުރި އެވެ.
އެ ނޫސްބަޔާނުގައި ބުނީ އެ މައުލޫމާތު އާންމު ކުރީ ކެންސަރަށް ފަރުވާ ހޯދަމުންދާ މީހަކަށް އެ އެޖެންސީން އެހީ ހަމަޖައްސައިނުދިން ކަމަށް ބުނެ އެކްސްގައި ކޮށްފައިވާ ޕޯސްޓަކާ ގުޅިގެން ދެކެވެމުންދާ ވާހަތަކުގެ ހަގީގަތް ހާމަ ކުރުމަށް ކަމަށެވެ.
އެގޮތުން އެ މީހަކަށް، މިދިޔަ އަހަރުން ފެށިގެން މިދިޔަ މަހުގެ ނިޔަލަށް ޖުމުލަ ނުވަ ފަހަރަކު އެންސްޕާއިން އެހީ ފޯރުކޮށްދީފައިވާ ކަމާއި، އެއިން ކޮންމެ ފަހަރަކު އެހީގެ ގޮތުގައި ދީފައިވާ ފައިސާގެ އަދަދު ވެސް ނޫސްބަޔާނުގައި އާންމުކޮށްފައިވެ އެވެ.
އެންސްޕާއިން ސޯޝަލް މީޑިއާގައި ޕޯސްޓު ކުރި މީހާއަށް ރައްދު ދެމުން ބުނީ އެ މައްސަލައިގައި ހިމެނޭ މީހާއަށް އެއްވެސް އިރެއްގައި އެ އެޖެންސީން 1000 ޑޮލަރު، އެހީގެ ގޮތުގައި ދިން ކަމަށް ސިސްޓަމްތަކުން ވެސް އަދި ލިޔުމަކުން ވެސް ފެންނަން ނެތް ކަމަށެވެ.
އެ ޕޯސްޓާ ގުޅިގެން އެ ޕޯސްޓު ކުރި މީހާއާ ވެސް އެންސްޕާއިން ބައްދަލު ކުރި ކަމަށާއި ބައްދަލު ކުރުމުން، އޭނާއަށް ލިބުނު ކަމަށް ބުނާ ފައިސާއަކީ އެންސްޕާއިން ލިބިފައިވާ ފައިސާއެއް ނޫންކަން އޭނާއަށް ސާބިތުކޮށްދިން ކަމަށް އެންސްޕާގެ ބަޔާނުގައި ބުންޏެވެ.
އެއްވެސް ލިޔެކިޔުމަކުން ފެންނަން ނެތް ފައިސާއެއް ދޫކޮށްފައިވާނަމަ، އެއީ އެހީ ހަމަޖައްސައިދެވޭ އުސޫލާއި މިންގަނޑުތަކާ ހިލާފަށް އަދި އެހީދޭ ނިޒާމުން ބޭރުން ހިންގާފައިވާ އުސޫލުތަކާ ހިލާފު އަމަލެއް ކަމަށް އެންސްޕާގެ ބަޔާނުގައި ބުންޏެވެ.
