ލަންޑަން (ޑިސެމްބަރު 5) - އިނގިރޭސި ޕްރިމިއާ ލީގުގައި ރޭ ފަހު ވަގުތު ނިއުކާސަލް ޔުނައިޓެޑާ 3-3 އިން އެއްވަރުވި މެޗުގައި ލިވަޕޫލަށް މުހިންމު ޕޮއިންޓުތަކެއް ގެއްލުނު ކަމުގައި ވިޔަސް ލީގުގައި ކުރިއަށް ދިއުމަށް ލިވަޕޫލަށް ކަންކަން ދަސްކުރަން ބަލާއިރު ނިއުކާސަލް މެޗުގެ ނަތީޖާ ރަނގަޅެއްގެ ގޮތުގައި ދެކޭ ކަމަށް ލިވަޕޫލްގެ ކޯޗު އާނާ ސްލޮޓް ބުނެފި އެވެ.
މި ނަތީޖާއާ އެކު، ލީގުގެ އެއް ވަނައިގައި ލިވަޕޫލްގެ ލީޑުވަނީ ކުޑަވެފަ އެވެ. އެއީ އަށް ޕޮއިންޓަށެެވެ. ލިވަޕޫލަށް 14 މެޗުން ވަނީ 35 ޕޮއިންޓް ލިބިފަ އެވެ. ދެ ވަނައިގައި އޮތް ޗެލްސީން ވަނީ ސައުތެމްޓަން އަތުން 5-1 އިން މޮޅުވެ، 14 މެޗުން 28 ޕޮއިންޓް ހޯދައިފަ އެވެ. އަދި، އާސެނަލުން ރޭ ވަނީ މެންޗެސްޓާ ޔުނައިޓެޑް އަތުން 2-0 އިން މޮޅުވެ، 14 މެޗުން 28 ޕޮއިންޓް ހަމަކޮށްފަ އެވެ.
ނިއުކާސަލް ދަނޑުގައި ރޭ އެ ޓީމުން އަލެކްސަންޑަ އިސާކްގެ ގޯލުން ލީޑުނެގި އެވެ. ލިވަޕޫލުން އެއްވަރުކުރީ ކާޓިސް ޖޯންސް ޖެހި ގޯލުންނެވެ. އެންތަނީ ގޯޑަން ދެ ވަނަ ފަހަރަށް ނިއުކާސަލަށް ލީޑުނަގައިދިންއިރު، މުހައްމަދު ސަލާހު ވަނީ ދެ ގޯލު ޖަހައި، ލިވަޕޫލަށް މެޗުގައި ފުރަތަމަ ފަހަރަށް ލީޑުނަަގައިދީފަ އެެވެ. ނިއުކާސަލް އިން އެއްވަރުކުރީ މެޗުގެ އިތުރު ވަގުތުގައި ފަބިއަން ޝެއާ ޖެހި ގޯލުންނެވެ.
މެޗަށް ފަހު ސްލޮޓް ބުނީ ލިވަޕޫލުން އޭނާ ބޭނުންވާ ގޮތަށް މެޗުގައި ކުޅުނު ކަމަށާއި ޑިފެންސްގައި ބައެއް ކަންކަން ދިޔައީ ގޯސްކޮށް ކަމަށެެވެ. އެކަމަކު، ޖުމްލަކޮށް ބަލާއިރު، ލިވަޕޫލަށް މި ސީޒަނުގައި ކުރިއަށް ދިއުމަށް މި މެޗުން ކަންތައްތަކެއް ދަސްވާނެ ކަމަށް ސްލޮޓް ވަނީ ބުނެފަ އެވެ.
އިތުރު ވަގުތުގައި ނިއުކާސަލް އިން ގޯލު ޖެހިއިރު، ލިވަޕޫލްގެ ކީޕަރު، ކޮއިމްހިން ކެލަހާ އަށް ހެދުނު ގޯހެއްގެ ވާހަކަ ދެއްކުމުގެ ބޭނުމެއް ނެތް ކަމަށާއި ލިވަޕޫލަކީ ޓީމެއްގެ ގޮތުގައި ހުރިހާ ކަމަކާ ކުރިމަތިލާނެ ބައެއް ކަމަށް ސްލޮޓް ވަނީ ބުނެފަ އެވެ.
