އާންމުންގެ ފާޑުކިޔުން އަމާޒުވުމުން، މޯލްޑިވްސް މީޑިއާ ހައުސްގެ ނަމުގައި ހިންގާ ކުންފުންޏެއް މެދުވެރިކޮށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ހިންގާނެ އިމާރާތް ހޯދުމަށް ވީ އެއްބަސްވުން އުވައިލަން އެ އެޖެންސީން ނިންމައިފި އެވެ.
އެންސްޕާއިން މިއަދު ނެރުނު ނޫސްބަޔާނެއްގައި ބުނީ އެ އެޖެންސީ ހިންގާނެ ތަނެއް މޯލްޑިވްސް މީޑިއާ ހައުސް މެދުވެރިކޮށް ހޯދި ކަމަށެވެ. އަދި އެކަން ކުރީ އޯޕަން ޓެންޑާއިން ހުޅުވާލައިގެން ކަނޑައެޅިފައި އޮންނަ އުސޫލުތަކުގެ ތެރެއިން ކަމަށް އެންސްޕާގެ ނޫސްބަޔާނުގައި ބުންޏެވެ.
ނަމަވެސް އެކަމާ ގުޅިގެން އެތައް ބަޔަކު ފާޑުކިޔަމުން ދިޔުމުގެ ސަބަބުން މީޑިއާ ހައުސްއަށް ފޫނުބެދޭ ގެއްލުން ކުރިމަތިވަމުންދާ ކަމަށް ބުނެ އެއްބަސްވުން ބާތިލުކޮށްދޭން އެ ކުންފުނިން އެދިފައިވާ ކަމަށް އެންސްޕާގެ ބަޔާނުގައި ބުންޏެވެ.
"މި މުއާމަލާތާ ގުޅިގެން އެ ކުންފުނީގެ އަގު ވައްޓައިލައި ބަދުނާމު ކުރުމަށް ހަގީގަތާ ހިލާފު އެތައް ވާހަކަތަކެއް ދައްކައި މީޑިއާގެ އެކި ވަސީލަތްތައް ބޭނުން ކޮށްގެން އެއްވެސް އަސްލެއް ނެތް ދޮގު ވާހަކަތައް ފަތުރަމުން ދިޔުމުގެ ސަބަބުން އެ ކުންފުންޏަށް މާއްދީ ގޮތުންނާއި މައުނަވީ ގޮތުން ފޫނުބެދޭ ވަރުގެ ބޮޑު ގެއްލުމާ ކުރިމަތިވެފައި ވާތީވެ، މި އެއްބަސްވުން ނިމުމަކަށް ގެނައުމަށް އެ ކުންފުނިން ވަނީ ހުށަހަޅައިފަ އެވެ،" އެންސްޕާގެ ބަޔާނުގައި ބުންޏެވެ.
މިފަދަ ބަޔާނެއް އެންސްޕާއިން ނެރެފައިވާއިރު، އެ އެޖެންސީއަށް ވަނީ "އެމްއެމް ޓީވީ" ޗެނަލް ހިންގުމަށް، އެންސްޕާ މެދުވެރިކޮށް ދައުލަތުގެ ބަޖެޓުން މަހަކު ބައި މިލިއަނަށް ވުރެ ގިނަ ރުފިޔާ ދޭން އެއްބަސްވެފައިވާ ކަމަށް ތުހުމަތު ކުރެވިފައި އޮއްވަ އެވެ.
ފިނޭންސް މިނިސްޓްރީގެ ވެބްސައިޓުގައި ހުރި މައުލޫމާތުން އެނގޭ ގޮތުގައި އެންސްޕާގެ އޮފީސް އިމާރާތް ބަދަލުކުރަން، 12،000 އަކަފޫޓުގެ ތަނެއް، ހޯދަން ކުރި އިއުލާނުކުރީ ޓެންޑަ ބޯޑު މެދުވެރިކޮށެވެ. އެ އިއުލާނާ ގުޅިގެން އިމާރާތް ކުއްޔަށް ދޭން ހުށަހެޅީ ވެސް ހަމައެކަނި މޯލްޑިވްސް މީޑިއާ ހައުސިންނެވެ.
ފަނަރަ ބުރިއަށް ހަދާފައިވާ މއ. ސީރާޒީގެއިން ހަތަރު ފަންގިފިލާއެއް އެމްއެމްޓީވީ އަށް ކުއްޔަށް ނަގާފައިވާ ކަމަށް މައުލޫމާތު ލިބެ އެވެ. އޭގެތެރެއިން އެންސްޕާއަށް ކުއްޔަށް ދިނީ ދެ ފަންގިފިލާ ކަމަށް އިތުބާރުކުރެވޭ މަސްދަރުތަކުން މައުލޫމާތު ދީފައިވެ އެވެ. ސީރާޒީގޭގެ ޖުމުލަ ބޮޑުމިނަކީ 4365 އަކަފޫޓެވެ.
އެންސްޕާއިން ބޭނުންވާ 12،000 އަކަފޫޓުގެ ޖާގަ ލިބޭނީ ސީރާޒީގޭގެ ތިން ފަންގިފިލާއިންނެވެ. ދެ ފަންގިފިލާ ކުއްޔަށް ނަގާފައި ވާނަމަ އެއީ 8730 އަކަފޫޓެވެ.
އެންސްޕާގެ އޮފީސް ހިންގަން، ރައީސް މުއިއްޒުގެ މަސްލަހަތު އޮތް މޯލްޑިވްސް މީޑިއާ ހައުސިން އޮފީސް އިމާރާތެއް ކުއްޔަށް ދީފައި ވަނީ މަހަކަށް 580،000ރ. އަށެވެ. އެއީ ފަސް އަހަރަށް 34.8 މިލިއަން ރުފިޔާ އެވެ.
އެންސްޕާގެ ބަޔާނުގައި ބުނީ އެ ކުންފުނިން އެދުނު ގޮތަށް ދެ ފަރާތުގެ ދެމެދުގައި ވެފައި އޮތް އެއްބަސްވުން ނިމުމަކަށް ގެންނަން މިހާރު ނިންމާފައިވާ ކަމަށެވެ. އަދި އެކަމާ ގުޅިގެން ކުރަންޖެހޭ ކަންކަން ފިނޭންސް މިނިސްޓަރީގެ އިރުޝާދުގެ ދަށުން ކުރިއަށް ގެންދާ ކަމަށް އެ ބަޔާނުގައި ބުންޏެވެ.
