އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގާ ނަސްލުހޭދު ކުރުމަކީ "ވިޔާނުދާ" އަމަލެއް ކަމަށާއި އެކަމާ ދެކޮޅު އިޒްރޭލު ރައްޔިތުން ވެސް ތިބޭނެތީ އެ ގައުމުގެ ޕާސްޕޯޓު ވަގުތުން މަނާ ކުރުން ރަނގަޅު ނޫން ކަމަށް ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރު އަހުމަދު ރިޔާޒް ވިދާޅުވެއްޖެ އެވެ.
އެސްއެސްޓީވީގެ "ބާރުހަތަރެއް" ޕްރޮގްރާމުގައި ވާހަކަ ދައްކަވަމުން ރިޔާޒް ވިދާޅުވީ، ބަޔަކު ބުނާހާ ގޮތަކަށް ތަބާވެ އިޒްރޭލުގެ ޕާސްޕޯޓުގައި ރާއްޖެ އެތެރެވުން މަނާކޮށްފި ނަމަ "އޭގެ ހިތި ތަޖުރިބާ" ކުރަންޖެހިދާނެ ކަމަށެވެ.
"އަޅުގަނޑުމެން މިވަރަށް ނުވިސްނާ އަޅުގަނޑުމެންގެ ތެރެއިން ބަޔަކު މީހުން އެ ބުނާހާ ބީދައިން ހަމަ މިއަދުން މިއަދަށް މި ޕާސްޕޯޓު ބޭންކޮށްލީމާ އޭގެ ހިތި ތަޖުރިބާ ނުވަތަ އެއިން ނުކުމެދާނެ ނަތީޖާ ހަމަ ވަރަށް ގޯސް ވެސް ވެދާނެ،" ރިޔާޒް ވިދާޅުވި އެވެ.
ރިޔާޒް ވިދާޅުވީ މުސްލިމުން މެރުމާ ދެކޮޅު މީހުން އިޒްރޭލުގައި ވެސް ތިބޭނެ ކަމަށެވެ. އެހެންކަމުން އެ މީހުންނަށް ވެސް ރާއްޖެ ނާދެވޭ ގޮތަށް ޕާސްޕޯޓު މަނާ ކުރުމަކީ އެންމެ ރަނގަޅު ގޮތް ނޫން ކަމަށް ރިޔާޒް ވިދާޅުވި އެވެ.
"އަޅުގަނޑު ދަންނަވަން މި އުޅޭ ވާހަކައަކީ އިޒްރޭލުގައި ވެސް ތިބެދާނެއޭ މި ހިނގާ ވިޔާނުދާ އަމަލުގައި، ނޫނީ އަޅުގަނޑުމެންގެ މުސްލިމުން މަރަމުންދާ މެރުންތަކުގައި އިދިކޮޅު ހަދާ ކިތަންމެ ބައިވަރު ބަޔަކު ތިބެދާނެ. ތިބޭނެ، ތިބެދާނެއެއް ވެސް ނޫން. ހަމަ ޔަގީން އިޒްރޭލުގައި ވެސް ތިއްބަވާނެ އަޅުގަނޑުމެންގެ ފަލަސްތީނުގެ މީހުންނަށް ތާއީދު ކުރާ ވެސް ކިތަންމެ ބަޔަކު،" އޭނާ ވިދާޅުވި އެވެ.
އެ ޕްރޮގްރާމުގައި ވާހަކަ ދައްކަވަމުން ރިޔާޒް އިތުރަށް ވިދާޅުވީ، ޕާސްޕޯޓު މަނާ ކުރާއިރު، އިޒްރޭލުގައި އަމުރުމައުރޫފު ހިންގާ ވެރިން ނުވަތަ ސިފައިންގެ މީހުން ރާއްޖެ އެތެރެނުވެވޭ ގޮތަށް ހެދިދާނެ ކަމަށެވެ. އަދި ވިދާޅުވީ ޕާސްޕޯޓުގެ މައްސަލަ ރައްޔިތުންގެ މަޖިލީހުން ނިންމާއިރު އެކަން ނިންމާނީ ރައްޔިތުން ބޭނުންވާ ގޮތަށް ކަމަށެވެ.
އިޒްރޭލު ޕާސްޕޯޓު މަނާ ކުރަން އިދިކޮޅު އެމްޑީޕީން ބިލެއް ހުށަހެޅީ މެއި، 2024، ގަ އެވެ. އޭގެ ފަހުން ޖޫން 2، 2024، ގައި ވަޒީރުންގެ މަޖިލީހުން ވެސް ވަނީ އިޒްރޭލު ޕާސްޕޯޓު މަނާ ކުރަން ނިންމައިފަ އެވެ. ނަމަވެސް މިހާތަނަށް ވެސް ޕާސްޕޯޓު މަނާކޮށްފައެއް ނުވެ އެވެ.
މީކާއީލް ހުށަހެޅުއްވި ބިލުގެ މަސައްކަތް ކޮމިޓީގައި ކުރިއަށްގެންދިޔައިރު ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވީ، އިޒްރޭލު ޕާސްޕޯޓު މަނާ ކުރުމުގެ ކުރިން ދުނިޔޭގެ ބޮޑެތި ގައުމުތަކުގެ ބަހެއް ވެސް ހޯދަންޖެހޭ ކަމަށެވެ.
"... އަދި، އަރަބި އެހެން ގައުމުތަކާ ދުނިޔޭގެ އެހެން ބޮޑެތި ގައުމުތަކުގެވެސް ކަމާ ގުޅުންހުރި އިދާރާތަކުގެ ލަފަޔާ މަޝްވަރާ މިކަމުގެ ހޯދަން ޖެހޭނެ ކަމަށް އަޅުގަނޑު ގަބޫލުކުރަނީ،" ފަލާހު ވިދާޅުވި އެވެ.
އިޒްރޭލުގެ ޕާސްޕޯޓު މަނާ ކުރުމުގެ ބިލު އެމްޑީޕީން ހުށަހެޅީ ސަރުކާރަށް އުނދަގޫ ކުރަން ކަމަށް ވެސް މީގެ ކުރިން ޕީއެންސީގެ ބައެއް މެންބަރުން ވިދާޅުވި އެވެ. އަދި އެ ބިލުގެ މަސައްކަތް ކުރިއަށްގެންދިޔުމާމެދު ވިސްނަންޖެހޭ ކަމަށް ތިނަދޫ އުތުރު ދާއިރާގެ މެންބަރު ސަައުދުﷲ ހިލްމީ ވަނީ ވިދާޅުވެފަ އެވެ.
"އަޅުގަނޑު ހަމަ ދަންނަވަން ބޭނުންވަނީ މި ބިލު އަޅުގަނޑުމެން ކުރިއަށްގެންދިޔުމާ ދޭތެރޭގައި އިތުރަށް ވިސްނައިލަން އެބަޖެހޭ ނޫނިއްޔާމު އަޅުގަނޑުމެންގެ ދާއިރާގެ ރައްޔިތުންގެ ހިޔާލު ހޯދާލަންޖެހޭ،" ސައުދުﷲ ވިދާޅުވި އެވެ.
