ސަރުކާރަށް ފާޑު ކިޔައިގެން އަދަބު ދިނުމުގެ ބިރުވެރި މާޒީ އަލުން އިޔާދަކުރަން މަސައްކަތް ކުރަމުންދާތީ ކުރީގެ ރައީސް އިބްރާހިމް މުހައްމަދު ސޯލިހު ކަންބޮޑުވުން ފާޅުކުރައްވައިފި އެވެ.
ސޯލިހު އެކްސްގައި ކުރެއްވި ޕޯސްޓެއްގައި ވިދާޅުވީ ސޯޝަލް މީޑިއާގައި ކުރާ ޕޯސްޓްތަކަށް ފުލުހަށް ހާޒިރު ކުރުމާއި ކައުންސިލްތަކަށް އިންޒާރުގެ ސިޓީ ފޮނުވުމަކީ ދިވެހި ރައްޔިތުން ބުރަ މަސައްކަތުން ހޯދި ހިޔާލުފާޅު ކުރުމުގެ މިނިވަންކަމާއި ޑިމޮކްރަސީގައި ފަހަތަށް އެޅޭ ފިޔަވަޅެއް ކަމަށެވެ.
"ސަރުކާރަށް ފާޑުކިޔުން އަމާޒުކުރުމަކީ ކުށެއްގެ ގޮތުގައި ހަދައި އަދަބު ދިނުމުގެ ބިރުވެރި މާޒީ އަލުން އިއާދަކުރަން ސަރުކާރުން މަސައްކަތްކުރުމަކީ ކަންބޮޑުވާކަމެއް،" ސޯލިހު ވިދާޅުވި އެވެ.
ސޯލިހު މިހެން ވިދާޅުވެފައި މިވަނީ އެމްޑީޕީގެ ސޯޝަލް މީޑިއާ އެކްޓިވިސްޓު ހުސެއިން ޝާފިއު (ތުއްތު) އެކްސްގައި ކުރި ޕޯސްޓަކާ ގުޅިގެން މާދަމާ ފުލުހަށް ހާޒިރު ކުރަން މިއަދު ޗިޓު ފޮނުވާފައި ވަނިކޮށެވެ.
އޭގެއިތުރުން ރައީސް ޑރ. މުހައްމަދު މުއިއްޒު އަދި ސަރުކާރުގެ އިސްވެރިންގެ އަބުރަށް އުނިކަން އަންނާނެ ގޮތަށް ވާހަކަ ދެއްކި ކަމަށް ބުނެ ގދ. ގައްދޫ ކައުންސިލް ރައީސް މުހައްމަދު އަހުމަދުގެ މައްސަލަ ބަލަން ލޯކަލް ގަވަމެންޓް އޮތޯރިޓީ (އެލްޖީއޭ) އިން ގދ. އަތޮޅު ކައުންސިލަށް ވަނީ ފޮނުވާފަ އެވެ.
އެހެންކަމުން ސޯލިހު އިޝާރާތް ކުރެއްވީ ޝާފިއު އަދި މުހައްމަދު އަހުމަދުގެ މައްސަލަ ބަލާތީ އެކަމަށެވެ.
ސޯލިހު އަންނަނީ އެކި ޕްލެޓްފޯމްތަކުގައި މި ސަރުކާރުން ކުރަމުން އަންނަ ކަންކަމަށް ވަރަށް ބޮޑަށް ފާޑު ވިދާޅުވަމުންނެވެ. އެގޮތުން މި ސަރުކާރަކީ ނާގާބިލު އަދި ކަންކަން މެނޭޖްކުރަން ނޭގެ ސަރުކާރެއް ކަމަށާއި ރައީސް މުއިއްޒު ކުރައްވަނީ ހުދުމުހުތާރު ވެރިކަމެއް ކަމަށް ވެސް ސޯލިހު ވިދާޅުވި އެވެ.
