އުރީދޫ މޯލްޑިވްސް އިން އަންނަ ޑިސެންބަރު 15، ވާ އާދީއްތަ ދުވަހުގެ ރޭ 8:00 ގައި ހާއްސަ އާންމު ޖަލްސާއެއް އޮންލައިންކޮށް ބާއްވަން ތާވަލުކޮށްފި އެވެ.
އުރީދޫއިން ބުނީ އެ ހާއްސަ އާންމު ޖަލްސާގައި ބާއްވަން ހަމަޖެހިފައިވަނީ މޯލްޑިވްސް ސެކިއުރިޓީސް ޑިޕޮސިޓަރީ ކޮމްޕެނީ ޕްރައިވެޓް ލިމިޓެޑް (އެމްއެސްޑީ) ގެ އޮންލައިން ޖެނެރަލް މީޓިން މެނޭޖްމަންޓް ސިސްޓަމް ކަމުގައިވާ "ފަހިވޯޓު" މެދުވެރިކޮށް ކަމަށެވެ.
އުރީދޫގެ ހާއްސަ އާންމު ޖަލްސާގައި ބައިވެރިވެވޭނީ ޑިސެމްބަރު 13، ވާ ހުކުރު ދުވަހުގެ ރޭގަނޑު 8:00 އާ ހަމައަށް ޖަލްސާގައި ބައިވެރިވުމަށް އެދި، އެމްއެސްޑީގެ އޮންލައިން ސިސްޓަމް "އިންފިނިޓީ" މެދުވެރިކޮށް ރަޖިސްޓާ ކުރާ ފަރާތްތަކަށް އެކަނި ކަމަށް ވެސް އުރީދޫއިން ބުންޏެވެ.
ޖަލްސާގެ އެޖެންޑާ:
- ކީރިތި ގުރުއާން.
- ޗެއާޕާސަން، މިސް ފާތިމާ ސުލްތާން އަލް-ކުވާރީގެ ވާހަކަފުޅު ދެއްކެވުން.
- މެނޭޖިން ޑިރެކްޓާ އަދި ސީއީއޯ، ޚާލިދު ހަސަން އެމްއޭ އަލް-ހަމާދީ ގެ ވާހަކަފުޅު ދެއްކެވުން.
- އަސާސީ ގަވާއިދާއި ހިންގާ ގަވާއިދަށް ގެންނަ އިސްލާހުތައް ފާސްކުރުމަށް ހުށަހެޅުން.
- އަސާސީ ގަވާއިދާއި ހިންގާ ގަވާއިދަށް ހުށަހެޅިފައިވާ އިސްލާހުތަކާއެކު އަސާސީ ގަވާއިދާއި ހިންގާ ގަވާއިދު އެޑޮޕްޓްކުރުން (ހުށަހެޅިފައިވާ އިސްލާހުތައް ހިއްސާދާރުން ފާސްކުރާގޮތަށް ހިމަނައިގެން).
- ޓެކްފިން މޯލްޑިވްސް ޕްރައިވެޓް ލިމިޓްޑްގެ ހިއްސާތައް އުރީދޫ މޯލްޑިވްސް ޕަބްލިކް ލިމިޓެޑުން އޯޓީއެފް އިންޓަނޭޝަނަލް އެލްއެލްސީ އަށް ވިއްކައި ބަދަލުކުރުން.
- ހިއްސާދާރުންގެ މަޝްވަރާކުރުން.
- ޖަލްސާ ނިންމުން.
އެޖެންޑާއާ ގުޅޭ އިތުރު ތަފްސީލާއި މައުލޫމާތު އުރީދޫ މޯލްޑިވްސްގެ ވެބްސައިޓު މެދުވެރިކޮށް ލިބޭނެ ކަމަށް އެ ކުންފުނިން ބުންޏެވެ. އެ ހާއްސަ އާންމު ޖަލްސާގައި އުރީދޫ މޯލްޑިވްސްގެ ހިއްސާދާރެއްގެ ގޮތުގައި މިދިޔަ ނޮވެމްބަރު 27، ގެ ނިޔަލަށް ރަޖިސްޓާވެފައިވާ ފަރާތްތަކަށް ބައިވެރިވެވޭނެ އެވެ.
އެ ޖަލްސާގެ އެޖެންޑާ އައިޓަމްތަކަށް ވޯޓުލާއިރު އަމިއްލައަށް ނުވަތަ ޕްރޮކްސީ މެދުވެރިކޮށް ބައިވެރިވާ ފަރާތްތަކަށް، އެ ފަރާތްތަކަށް ލިބިފައިވާ ކޮންމެ ހިއްސާއަކަށް އެއް ވޯޓު ލިބޭނެ އެވެ. އަދި ވޯޓިންގް ކުރިޔަށް ގެންދާނި އިލެކްޓްރޯނިކް (އީ-ވޯޓިންގް) މެދުވެރިކޮށެވެ.
ހާއްސަ އާންމު ޖަލްސާގައި ބައިވެރިވުމަށް ޝަރުތުހަމަވާ ހިއްސާދާރުން، ޖަލްސާގައި ބައިވެރިވާން ބޭނުންވާނަމަ، އެމްއެސްޑީގެ އޮންލައިން ސިސްޓަމް "އިންފިނިޓީ" މެދުވެރިކޮށް ރަޖިސްޓާ ކުރުމަށް (ޕްރީރެޖިސްޓާ ކުރުމަށް، ނުވަތަ ޕްރޮކްސީއެއް އައްޔަންކުރުމަށް، އަދި، އައްޔަން ކޮށްފައިވާ ޕްރޮކްސީ ބާތިލުކުރުމަށް) އުރީދޫއިން އެދެ އެވެ.
އެގޮތުން ރަޖިސްޓާ ކުރުމުގެ ސުން ގަޑިއަކީ އަންނަ ޑިސެމްބަރު 13، ވާ ހުކުރު ދުވަހުގެ ރޭ 8:00 ކަމަށް އެ ކުންފުނިން ބުންޏެވެ.
އުރީދޫއިން ބުނީ އެ ޖަލްސާގައި އޮންލައިންކޮށް ބައިވެރިވާ ހިއްސާދާރުންނާއި ޕްރޮކްސީ ހޯލްޑަރުން ޖަލްސާ ބޭއްވުމަށް ހަމަޖެހިފައިވާ ދުވަހުގެ ލިބިފައިވާ ލޮގިންގެ މައުލޫމާތު ބޭނުންކޮށް، ފަހިވޯޓު ސިސްޓަމަށް ލޮގިން ކުރަން އެދޭ ކަމަށެވެ.
ލޮގިންކުރުމަށް ބޭނުންވާ ތަފްސީލު، ޖަލްސާގައި ބައިވެރިވުމަށް ރެޖިސްޓާ ކޮށްފައިވާ ފަރާތްތަކާއެކު، އެމްއެސްޑީއިން ޑިސެމްބަރު 15، ވާ އާދީއްތަ ދުވަހުގެ މެންދުރުފަހު 3:00 ގެ ކުރިން ހިއްސާކުރާނެ ކަމަށް އުރީދޫއިން ބުންޏެވެ.
