މި އަހަރު ނިމުމުގެ ކުރިން ސްޓޭޓު ޓްރޭޑިން އޯގަނައިޒޭޝަން (އެސްޓީއޯ) ގެ ދަށަށް ފެނަކަ ކޯޕަރޭޝަން ލިމިޓެޑު ބަދަލު ކުރަން ރައީސް ޑރ. މުހައްމަދު މުއިއްޒު ނިންވެމުމާއެކު، ފެށި މަސައްކަތް ހުއްޓާލައިފި އެވެ.
އެސްޓީއޯ އިން މިއަދު ނެރުނު ބަޔާނެއްގައި ބުނީ، މި މަސައްކަތް ހުއްޓާލީ ފިނޭންސް މިނިސްޓްރީން އެކަން އެގޮތަށް ކުރަން އެންގުމުން ކަމަށެވެ.
"އަދި، މި ކުންފުނިން ސަރުކާރަށް ހުށަހެޅި އެކުއިސިޝަން ޕްރޮޕޯސަލްގައި ހިމެނިފައިވާ ކަންކަން ކުރިއަށްގޮސްފައިވާ މިންވަރަށްބަލާ، އެސްޓީއޯއިން ފެނަކައިގެ ހިއްސާ ގަތުމުގެ މަސައްކަތް ހުއްޓާލުމަށް މި ކުންފުނީގެ ޑިރެކްޓަރުންގެ ބޯޑުން މިއަދު ވަނީ ނިންމާފަ،"
އެސްޓީއޯއިން ހިއްސާދާރުންނަށާއި ކަމާބެހޭ ފަރާތްތަކަށް ރައްދުކޮށް ކުރި އިއުލާނުގައި ބުނެފައިވެ އެވެ.
މި ދެ ކުންފުނި އެއްކޮށްލައި، މާލީ ބޮޑެތި ގެއްލުންތަކަކާއެކު ހިންގަމުންދާ ފެނަކަ އަކީ އެސްޓީއޯގެ ސަބްސިޑަރީ ކުންފުންޏަކަށް ހެދުމަށް، ވަޒީރުންގެ މަޖިލީހުގެ އިރުޝާދުގެ ދަށުން ރައީސް މުއިއްޒު ނިންމެވީ އޮގަސްޓު 26، ގަ އެވެ.
އެސްޓީއޯގެ ދަށަށް ފެނަކަ ބަދަލު ކުރުމުގެ މަރުހަލާ ކުރިއަށް ގެންދިޔުމަށް ފިނޭންސް މިނިސްޓަރީ އާއި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ އިތުރުން އެސްޓީއޯގެ އިސް ބޭފުޅުން ހިމެނޭ ކޮމެޓީއެއް ހެދުމަށް ވެސް އޭރު ރައީސް ވަނީ ނިންމަވައިފަ އެވެ.
މި ނިންމުން ނިންމީ ޔުޓިލިޓީ ދާއިރާ ހަރުދަނާކުރުމަށާއި ރައްޔިތުންނަށް ފޯރުކޮށްދޭ ހިދުމަތް ރަނގަޅު ފެންވަރެއްގައި ފޯރުކޮށްދިނުމުގެ މަގުސަދުގައި ކަމަށެވެ. އަދި، މި ބަދަލުގެ ސަބަބުން ފެނަކައިގެ ހިންގުން ހަރުދަނާވެ މާލީގޮތުން ބާރުވެރިވާނެ ކަމަށް ވެސް ރައީސް އޮފީހުން ބުންޏެވެ.
ރައީސްގެ މި ނިންމެވުން ބަދަލުކުރި ސަބަބާ ބެހޭގޮތުން އެމަނިކުފާނުގެ އޮފީހުން މިހާތަނަށް ބަހެއް ބުނެފައެއް ނުވެ އެވެ.
