މިލާން (ނޮވެމްބަރު 28) - މިދިޔަ އަހަރު އިޓަލީގެ ގައުމީ ފުޓްބޯޅަ ޓީމުގެ ކޯޗުކަން ދޫކޮށް، ސައުދީ އަރަބިއްޔާގެ ކޯޗުކަމާ ހަވާލުވާން ނިންމި ނިންމުމަކީ ހެދުނު ގޯހެއް ކަމަށް ރޮބާޓޯ މަންޗިނީ ބުނެފި އެވެ.
އިޓަލީ އަށް ކުރިން ކުޅުނު މަންޗިނީ ވަނީ 2018 ވަނަ އަހަރު އެ ޓީމުގެ ކޯޗުގެ މަގާމާ ހަވާލުވުމަށް ފަހު، 2023 ވަނަ އަހަރުގެ އޮގަސްޓް މަހު މަގާމުން އިސްތިއުފާ ދިނުމާ ހަމައަށް އެ ޓީމުގައި ޖުމްލަކޮށް ރަނގަޅު މަސައްކަތްތަކެއް ކޮށްފަ އެވެ. އެ ގޮތުން، އޭނާ ވަނީ އެ ޓީމަށް 2021 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ޗެމްޕިއަންކަން ހޯދައިދީފަ އެވެ.
މިދިޔަ އަހަރުގެ އޮގަސްޓް މަހު ސައުދީގެ ކޯޗަކަށް ސޮއިކުރީ ހަތަރު އަހަރުގެ ކޮންޓްރެކްޓެއްގަ އެވެ. އެކަމަކު، އެ މަގާމުގައި އެއް އަހަރުވިތަނާ މަންޗިނީ މި ވަނީ ސައުދީ ފެޑެރޭޝަނާ އެކު، މަޝްވަރާކޮށް އެއްބަސްވުން ނިމުމަކަށް ގެނެސްފަ އެވެ. އެއީ، އޭޝިއަން ކަޕްގެ ނަތީޖާތައް ދިޔަ ގޮތުންނާއި ސައުދީ ފެޑެރޭޝަނާ މެދު ހިޔާލު ތަފާތުވުންތަކެއް އުފެދިގެންނެވެ.
މަންޗިނީ ބުނީ، ސައުދީގެ ކޯޗުކަމުގެ އޮފާ ނެގީ ފައިސާއާ މެދު ވިސްނާފައި ކަމަށެވެ.
"އަހަރެން އޮޅުވާލަން ނެތިން، އެއީ ފައިސާއާ ގުޅޭ ނިންމުމެއް،" ސައުދީގެ ކޯޗުކަމާ ހަވާލުވި ގޮތާ ބެހޭގޮތުން މަންޗިނީ ބުންޏެވެ. "ނޫސްތަކުގައި ލިޔެފައި ހުރި ސީދާ ފައިސާގެ އަދަދުތަކާ އެއްވަރު ނުވި ކަމުގައި ވިޔަސް، އަހަރެންގެ ނިންމުން އޮތީ ލިބޭ އާމްދަނީއާ ގުޅިފައި،"
މަންޗިނީ ވަނީ އަލުން އިޓަލީ ޓީމާ ހަވާލުވާން ލިބިއްޖެނަމަ އެ ފުރުސަތުގެ ބޭނުންހިފާނެ ކަމަށާއި ދުވަހަކު ވެސް އަމިއްލަ ނަފްސާ މެދު އެކަނި ވިސްނާފައި ދެން ނިންމުމެއް ނުނިންމާނެ ކަމަށެެވެ. މަންޗިނީގެ އަމާޒަކީ ދެން އިޓަލީ ޓީމާ ހަވާލުވާން ލިބިއްޖެނަމަ ވޯލްޑް ކަޕް ކާމިޔާބު ކުރުމެވެ.
އިޓަލީގެ ފުޓްބޯޅަ ފެޑެރޭޝަންގެ ރައީސް ގެބްރިއެލް ގްރަވީނާ ވިދާޅުވީ، މަންޗިނީ އަށް އަބަދުވެސް އިހުތިރާމާއި ލޯބި އޮންނާނެ ކަމަށާއި، އޭނާ އަށް އިޓަލީގެ ފެޑެރޭޝަނުން އަލްވަދާއުކިޔާފައިވާނީ ވެސް ވަރަށް ފުރިހަމަ އަށް ކަމަށެވެ. ނަމަވެސް ކުއްލި ގޮތަކަށް މަންޗިނީ އިޓަލީގެ ގައުމީ ޓީމު ދޫކޮށްލީ ގަވާއިދުތަކާ އެއްގޮތަށް ނޫނެވެ.، މިކަމަށް ގާނޫނީ ފިޔަވަޅު އެޅުމަށް ނިންމާފައިވާނެ ކަމަށާއި އަދި މިކަމާ ގުޅޭގޮތުން އެ ފެޑެރޭޝަންގެ ގާނޫނީ ވަކީލުން މަޝްވަރާތައް ކުރަމުން އަންނަ ކަމަށް ވެސް ގްރަވީނާ އޭރު ވިދާޅުވި އެވެ.
އެކަމަކު ފަހުން، ފެޑެރޭޝަނުން މަންޗިނީއާ މަޝްވަރާ ކުރުމަށް ފަހު، ކޯޓަށް މައްސަލަ ނުގެންދަން ނިންމީ އެެވެ.
