މާލީ ހާލަތު ރަނގަޅު ކުރަން ފައިސާ ޗާޕު ނުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް، ދައުލަތުގެ ފިސްކަލް ޒިންމާގެ ބިލު ފާސް ކުރީ ސަރުކާރަށް މިހާރަށްވުރެ ގިނައިން އެމްއެމްއޭއިން ދަރަންޏަށް ފައިސާ ނެގޭނެ ކަމަށް ކަނޑައެޅުމަށް ފަހެވެ.
ސަރުކާރުން އެމްއެމްއޭއިން ދަރަންޏަށް ފައިސާ ނަގާ ނަމަ މަރުކަޒީ ބެންކުން ދޫކުރާނީ އިގްތިސާދުގައި މިހާރު ދައުރުނުވާ ފައިސާ އެވެ. އެއީ ފައިސާ ޗާޕު ކުރުން ކަމަށް މާނަ ކުރެ އެވެ. މި ވަގުތު ސަރުކާރުގައި ތިބި ވެރިން ވެސް ކުރިން ބުނެފައި ވަނީ އެއީ ފައިސާ ޗާޕު ކުރުން ކަމަށެވެ.
ރައްޔިތުންގެ މަޖިލީހުން ބުދަ ދުވަހު ފާސް ކުރި "ދައުލަތުގެ ފިސްކަލް ޒިންމާގެ ގާނޫނު" ގެ ހަ ވަނަ މާއްދާގެ އެއް ވަނަ ނަންބަރުގެ ހ. ގައި ބުނެފައި ވަނީ، މަރުކަޒީ ބޭންކުން ދަރަންޏަށް ފައިސާ ނަގަންވާނީ ސަރުކާރުގެ ކޭޝްފްލޯ މެނޭޖު ކުރަން 91 ދުވަހުގެ ތެރޭގައި ފައިސާ އަނބުރާ ދައްކާ ގޮތަަށް އެޑްވާންސެއްގެ ގޮތުގައި ކަމަށެވެ.
އެ މާއްދާގައި ބުނެފައި ވަނީ، ދަރަންޏަށް ފައިސާ ނެގެނީ ވެއެތުވެދިޔަ ތިން އަހަރު ދުވަހުގެ ތެރޭގައި ސަރުކާރަށް ލިބުނު ޖުމުލަ އާމްދަނީގެ މައްޗަށް ބިނާކޮށް، އަހަރަކަށް ޖެހެ އެވްރެޖު އާމުދަނީގެ 2.5 ޕަސެންޓަށް ވުރެ އިތުރުނުވާނެ މިންވަރަކަށް ކަމަށެވެ.
ނަމަވެސް މިހާރު އަމަލު ކުރަމުންދާ "ދައުލަތުގެ ހަރަދަށް ޒިންމާވުމުގެ ގާނޫނު" ގެ 32 ވަނަ މާއްދާގެ ހ. ގައި ބުނެފައި ވަނީ، އެމްއެމްއޭއިން ދަރަންޏަށް ނެގޭނީ ތިން އަހަރުގެ އާމުދަނީގެ އަހަރަކަށް އެވްރެޖުކޮށް ޖެހޭ އަދަދުގެ އެއް ޕަސެންޓަށް ވުރެ އިތުރުނުވާ މިންވަރަކަށް ކަމަށެވެ.
މަޖިލީހުން ބުދަ ދުވަހު ފާސް ކުރި ދައުލަތުގެ ފިސްކަލް ޒިންމާގެ ގާނޫނު ރައީސުލްޖުމްހޫރިއްޔާ ތަސްދީގު ކުރެއްވުމުން މިހާރު އަމަލު ކުރަމުންދާ ދައުލަތުގެ ހަރަދަށް ޒިންމާވުމުގެ ގާނޫނު އުވޭނެ އެވެ. ފިސްކަލް ޒިންމާގެ ގާނޫނު 42 ވަނަ މާއްދާގައި އެކަން ބަޔާންކޮށްފައި އޮވެ އެވެ.
ފައިސާ ޗާޕު ނުކުރުމަކީ ރައީސް މުއިއްޒު އެންމެ ބޮޑު އެއް ރިޔާސީ ވައުދެވެ. އެމަނިކުފާނު ވިދާޅުވާ ގޮތުން ނަމަ ފައިސާ ޗާޕުކޮށްގެން ހަރަދުތައް ހަމަޖައްސާ ނަމަ އިގުތިސާދީ ހާލަތު އިތުރަށް ވާނީ ގޯހެވެ.
"ތިންވަނަ ކަމަށް ފައިސާ ޗާޕުކޮށްގެން ސަރުކާރުގެ ހަރަދުތައް ބެލެހެއްޓުން ނިމުމަކަށް ގެންނަންޖެހޭ. އެކަން ނިމުމަކަށް ނުގެނެސްފިއްޔާ އަޅުގަނޑުމެންނަކަށް މި އިގުތިސާދު މި ހޭރިޔާވެގެން ދާދިއުމެއް ނިމުމަކަށް ނުގެނެވޭނެ،" ސެޕްޓެމްބަރު 20، 2023، ގައި ރައީސް ވިދާޅުވި އެވެ.
