މެންޗެސްޓާ (ނޮވެމްބަރު 26) - މެންޗެސްޓާ ސިޓީ އަށް ކުޅެމުން އަންނަ ބެލްޖިއަމްގެ ތަރި، ކެވިން ޑި ބްރޭނާއާ އެކު ސިޓީން ހަދާފައިވާ އެއްބަސްވުން އާ ކުރުމުގެ ވާހަކަތައް މަޑުޖެހިފައިވާ ކަަމަށް ބުނެފި އެވެ.
ޑި ބްރޭނާ، 33، ސިޓީއާ އެކު ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. ސިޓީން މި ސީޒަން ފެށިގެން ޑި ބްރޭނާގެ އެއްބަސްވުން އާ ކުރަން ވާހަކަ ދައްކަމުން އައި ނަމަވެސް، ސެޕްޓެމްބަރު މަަހު އޭނާ އަށް ދިމާވި ފަލަމަސްގަނޑުގެ އަނިޔާގެ ކަންކަމާ ހެދި މަޝްވަރާތައް މަޑުޖައްސާލީ އެވެ.
އަނިޔާގެ މައްސަަލައާ ހެދި މި ސީޒަނުގައި ޑި ބްރޭނާ އަށް އަދި ކުޅެވުނީ ނުވަ މެޗެވެ. ފިޓްނަސް ރަނގަޅުކުރަން މަސައްކަތް ކުރަމުން އަންނަ ޑި ބްރޭނާ، އެންމެ ފަހުން ސިޓީން ކުޅުނު ތިން މެޗުގައި ވެސް ކުޅެން ނުކުމެފައިވަނީ ބަދަލު ކުޅުންތެރިއެއްގެ ގޮތުގަ އެވެ.
"ސީޒަން ފަށައިގެން އަހަންނަށް އެނގުނު ކޮންޓްރެކްޓްގެ ވާހަކަތައް ކުރިއަށްދާނެކަން، ދެން، އެކަަމަކު، ސެޕްޓެމްބަރު މަހު، ބްރެންޓްފޯޑް މެޗުގައި އަހަންނަށް އަނިޔާވެ، އެ ފަހުން، ވާހަކަތައް މި ވަނީ މަޑުޖެހިފައި،" ޑި ބްރޭނާ ބުންޏެވެ.
އަނިޔާގެ މުއްދަތުގައި އެ ހޭދަވި ވަގުތުގައި ފޯކަސްކުރީ ރިކަވަަރީ އަށް ކަމަށާއި މިހާރު އެނބުރި އައިސް ފިޓްނަސް އަށް މަސައްކަތްކުރަމުން އަންނައިރު، ކޮންޓްރެކްޓް ކަންކަމާ ނުވިސްނައި، ރަނގަޅު ކުޅުމެއް ދައްކައި، ކުރީގެ ފޯމަށް އެނބުރި އައުމަށް މަސައްކަތްކުރާ ކަމަށް ޑި ބްރޭނާ ވަނީ ބުނެފަ އެވެ.
"ކޮންޓްރެކްޓްގެ ވާހަކަތައް އަލުން ފަށާނަން. ދެން، އެ ވާހަކަތައް ނުދައްކައިފިއްޔާ މިއީ އަހަރެން ސިޓީގައި ފެންނާނެ ފަހު އަހަރު، އަބަދުވެސް މުސްތަގުބަލުގެ ވާހަކަ ދައްކަން ބޭނުމީ ވަރަށް ހަަމަޖެހިލައިގެން ހުރެ،" ޑި ބްރޭނާ ބުންޏެވެ.
ސިޓީގައި މި ވަގުތު ޑި ބްރޭނާ ހުރީ ހަފްތާ އަކު، 420،000 ޑޮލަރު ލިބޭ ގޮތަށެވެ. އެ އެއްބަސްވުން އިތުރު ދެ އަހަރަށް އާ ކުރަން އުޅޭ ވާހަކަ މީޑިއާގައި ދެކެވެ އެވެ.
ޖަރުމަނުގެ ކުލަބް ވުލްފްސްބާގް އިން ސިޓީ އަށް ޑި ބްރޭނާ ބަދަލުވީ 63 މިލިއަން ޑޮލަރަށެވެ. ސިޓީއާ އެކު ޑި ބްރޭނާ ގިނަ ކާމިޔާބީތަކެއް ހޯދާފައިވެ އެވެ. އިންޑިވިޖުއަލް ގިނަ ޓްރޮފީތަކެއް ވެސް ސިޓީގައި ހުރެ ހޯދި، ޑި ބްރޭނާ ސިޓީއާ އެކު ހޯދި އެންމެ ބޮޑު ކާމިޔާބީ އަކީ ޗެމްޕިއަންސް ލީގެވެ. ކުރިން އިނގިރޭސި ޕްރިމިއާ ލީގުގެ ޗެލްސީ އަށް ވެސް ކުޅުނު ޑި ބްރޭނާ ވަނީ ސިޓީ އަށް، 2015 ވަނަ އަހަރު ބަދަލުވުމަށް ފަހު އެ ޓީމާ އެކު، ހަ ފަހަރު ޕްރިމިއާ ލީގު ކާމިޔާބުކުރި އެވެ. އަދި ދެ ފަހަރު ޕްރިމިއާ ލީގުގެ މޮޅު ކުުޅުންތެރިޔާގެ މަގާމު ހޯދި އެވެ.
