ރައީސް ޑރ. މުހައްމަދު މުއިއްޒު ޕީއެންސީގެ ރިޔާސީ ޓިކެޓުގައި ދެ ވަނަ ދައުރަކަށް ވާދަ ކުރައްވަން ބޭނުން ވެއްޖެ ހާލަތުގައި، އެ ޕާޓީގެ އެތެރޭގެ ޕްރައިމަރީއެއް ނުބޭއްވިޔަސް، ރިޔާސީ ޓިކެޓު ދެވޭނީ މެންބަރުންގެ މަޖިލީހުން ފާސްކޮށްގެނެވެ.
ޕީއެންސީގެ ޗެއާޕާސަން، އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އިއްޔެ ނޫސްވެރިންނާ ވާހަކަ ދައްކަވަމުން ވިދާޅުވީ އެ ޕާޓީގެ އަސާސީ ގަވާއިދު ބުނަނީ "ޕީއެންސީގެ ޓިކެޓުގައި ނިކުމެވަޑައިގެން ރާއްޖޭގެ ވެރިކަމަށް އަންނަވާ ބޭފުޅަކު އެ މަގާމުގަ ހުންނަވައި ދެވަނަ ދައުރަކަށް ކުރިމަތިލައްވަން ބޭނުންފުޅު ވަންޏާ ރިޔާސީ ޕްރައިމަރީ އަކާ ނުލާ އެ ޓިކެޓު އެ ބޭފުޅަކަށް ލިބިވަޑައިގަންނަވާނެ" ކަމަށެވެ.
ރިޔާސީ އިންތިހާބާ ގުޅޭ ކަންކަން ކުރިއަށް ގެންދާނެ ގޮތް ޕީއެންސީގެ އަސާސީ ގަވާއިދުގައި ބަޔާންކޮށްފައިވެ އެވެ.
އެ ގަވާއިދުގައި ބުނަނީ ރައީސުލްޖުމްހޫރިއްޔާކަމުގެ މަގާމުގައި ހުންނެވި ޕާޓީގެ މެންބަރަކު، ރިޔާސީ ދެވަނަ ދައުރަކަށް ކުރިމަތިލުމަށް ޕާޓީގެ މެންބަރުންގެ މަޖިލީހަށް ހުށަހަޅައިފި ނަމަ، އެ މެންބަރަކަށް ރިޔާސީ ޕްރައިމަރީއަކާ ނުލައި ޕާޓީގެ ރިޔާސީ ޓިކެޓު ދިނުމަށް ޕާޓީގެ މެންބަރުންގެ މަޖިލީހުގެ ސިއްރު ވޯޓަކުން ނިންމިދާނެ ކަމަށެވެ.
ރިޔާސީ އިންތިހާބުގައި ޕީއެންސީގެ ނަމުގައި ވާދަކުރުމާމެދު ވެސް ގޮތެއް ނިންމާނީ މެންބަރުންގެ މަޖިލީހުންނެވެ. ކުރިއަށް އޮތް 2028ގެ ރިޔާސީ އިންތިހާބުގައި ރައީސް މުއިއްޒު ވާދަ ކުރައްވާނަމަ ޕްރައިމަރީ ބާއްވާނަންތޯ އާއި، ޕްރައިމަރީއަކާ ނުލައި ޓިކެޓު ދޭނީތޯ ނިންމާނީ ވެސް މެންބަރުންގެ މަޖިލީހުންނެވެ. އަދި ރަނިންމޭޓަށް ވެސް އެ މަޖިލީހުގެ ރުހުން އޮންނަންޖެހެ އެވެ.
ރިޔާސީ އިންތިހާބުގައި ޕީއެންސީން އެހެން ޕާޓީއަކާއެކު ކޯލިޝަން ހަދާނަމަ، ރިޔާސީ ޓިކެޓު އެހެން ޕާޓީއެއްގެ މެންބަރަކަށް ދިނުމަށް އަސާސީ ގަވާއިދު ހުރަހެއް ނާޅަ އެވެ.
ޕީއެންސީގެ މެންބަރުންގެ މަޖިލީހުގައި 100 އަށް ވުރެ ގިނަ މެންބަރުން ތިއްބަވަ އެވެ. އެ މަޖިލީސް އެކުލެވިގެން ވަނީ ޕާޓީގެ ރައީސް، ޕާޓީގެ ޗެއަރޕާސަން، ޕާޓީގެ ނާއިބު ރައީސުން، ރައްޔިތުންގެ މަޖިލީހުގެ ޕީއެންސީގެ މަޖިލީހުގެ އިންތިހާބުގައި ޕީއެންސީގެ ޓިކެޓުގައި ވާދަކޮށް ނާކާމިޔާބުވި މެންބަރުން، ވަޒީރުންގެ މަޖިލީހުގައި ތިއްބެވި ޕީއެންސީގެ މެންބަރުން، ޕާޓީގެ ސެކްރެޓަރީ ޖެނެރަލް، ޕާޓީގެ ރެޖިސްޓްރާ، ޕާޓީގެ ޓްރެޝަރާ، އަދި ޕާޓީގެ މަތީ މަޖިލީހުން އިންތިހާބުކުރާ 38 އާންމު މެންބަރުންނެވެ.
