މާލެ ސިޓީގެ މޭޔަރުގެ މަގާމަށް އާދަމް އާޒިމް ވަޑައިގެންނެވި ފަހުން ސިޓީ ކައުންސިލަށް ބޮޑު މުސާރާގައި އަށް ކޮންސަލްޓަންޓުން ނެގިކަން ހާމަވެއްޖެ އެވެ.
މޭޔަރުކަމުގައި ގިނަ އަދަދެއްގެ ކޮންސަލްޓަންޓުން ނެގި ވާހަކަ އެންމެ ފުރަތަމަ ތިލަކުރެއްވީ ވެސް އާޒިމް އެވެ. އޮކްޓޯބަރު 13، ގައި އިދިކޮޅު އެމްޑީޕީން ހދ. ކުޅުދުއްފުށީގައި ކުރިއަށް ގެންދިޔަ ލާމަރުކަޒީ ގުޅުން ކޮންފަރެންސްގައި ވާހަކަ ދައްކަމުން އާޒިމް ވިދާޅުވީ މޭޔަރު ކަމަށް ވަޑައިގެންނެވި ފަހުން 15 ކޮންސަލްޓަންޓުން ނެންގެވި ކަމަށެވެ.
މިއާއެކު ހަމަ އެ ދުވަހު ކޮންސަލްޓަންޓުންގެ ތަފުސީލު ހޯދުމަށް މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން މި ނޫހުން ވާނީ އެދިފަ އެވެ. މި ހުށަހެޅުމުގެ ދަށުން ސިޓީ ކައުންސިލުން ދޫކޮށްފައިވަނީ އަށް ކޮންސަލްޓަންޓެއްގެ މައުލޫމާތެވެ. އެ މީހުންގެ މުސާރައަށް މަހެއްގެ މައްޗަށް 261،000ރ. ހަރަދުވެ އެވެ.
ކޮންސަލްޓަންޓުން ނެގި ތާރީހެއް އަދި އެ މީހުންނާއެކު ހަދާފައިވާ އެއްބަސްވުން ނިމޭ ތާރީހެއް ވެސް ސިޓީ ކައުންސިލުން ދީފައެއް ނުވެ އެވެ. އެހެން ކަމުން މި ކޮންސަލްޓަންޓުންގެ ކޮންޓްރެކްޓުގެ ޖުމްލަ އަގެއް ސާފެއް ނުވެ އެވެ.
ފައިނޭންޝަލް ކޮންސަލްޓަންޓު
މަގާމު ދިން ފަރާތް: މުހައްމަދު ޝާހިދު
މުސާރަ: މަހަކު 35،000ރ.
ރިޕޯޓު ރައިޓިން ކޮންސަލްޓަންޓު
މަގާމު ދިން ފަރާތް: ހަބީބު ޒާހިރު
މުސާރަ: މަހަކު 35،000ރ.
ސިވިލް އިންޖިނޭރިން ކޮންސަލްޓަންޓު
މަގާމު ދިން ފަރާތް: މުހައްމަދު ޝަރީފު
މުސާރަ: 35،000ރ.
ސޯޝަލް ވެލްފެއާ ކޮންސަލްޓަންޓު
މަގާމު ދިން ފަރާތް: މުހައްމަދު ޝިހާބު
މުސާރަ: 35،000ރ.
އެޑްމިނިސްޓްރޭޓިވް ކޮންސަލްޓަންޓު
މަގާމު ދިން ފަރާތް: މަރިޔަމް ނާޒިމާ
މުސާރަ: 28،000ރ.
އިތުރުވަގުތުގެ އިނާޔާތް: މުސާރައިގެ 50 އިންސައްތަ
މެނޭޖްމަންޓު ކޮންސަލްޓަންޓު
މަގާމު ދިން ފަރާތް: ރަމްޒީ އަބޫބަކުރު
މުސާރަ: 30،000ރ.
އިތުރުވަގުތުގެ އިނާޔާތް: މުސާރައިގެ 50 އިންސައްތަ
އިންފޮމޭޝަން ޓެކްނޮލޮކީ ކޮންސަލްޓަންޓު
މަގާމު ދިން ފަރާތް: ޔަމީން މުހައްމަދު
މުސާރަ: 35،000ރ.
އިތުރުވަގުތުގެ އިނާޔާތް: މުސާރައިގެ 50 އިންސައްތަ
މީޑިއާ އެގްޒެކެޓިވް
މަގާމު ދިން ފަރާތް: އަލީ ހާލިދު
މުސާރަ: 28،000ރ.
އިތުރުވަގުތުގެ އިނާޔާތް: މުސާރައިގެ 50 އިންސައްތަ
ސިޓީ ކައުންސިލުން ދިން މައުލޫމާތާއި އާޒިމް ވިދާޅުވި އަދަދާ ދިމާނުވާތީ މި ނޫހުން މިހާރު ވާނީ އާރުޓީއައި ޖަވާބު، އެ އިދާރާގެ މުރާޖައާ ކޮމިޓީއަށް ހުށަހަޅާފަ އެވެ. މިހާތަނަށް އެ ހުށަހެޅުމަށް ޖަވާބެއް ނުލިބެ އެވެ.
ސިޓީ ކައުންސިލްގެ ކޮންސަލްޓަންޓުންގެ ގޮތުގައި މީގެ ކުރިން ތިބި މީހުންގެ މުސާރަ އާއި އިނާޔަތްތައް މި ނޫހުން ވާނީ ކުރިން ހޯދާފަ އެވެ. އޭގެ ތެރޭގައި 18،000ރ. އިން ފެށިގެން 45،000ރ. އާ ހަމައަށް މަހު މުސާރަ ލިބުނު ކޮންސަލްޓަންޓުންނާއި ފީ ލިބުނު ކުންފުނިތައް ހިމެނެ އެވެ.
މާލެ ސިޓީގެ މޭޔަރުގެ ގޮތުގައި ރައީސް ޑރ. މުހައްމަދު މުއިއްޒު ހުންނެވިއިރު ވެސް ކޮންސަލްޓަންޓުންގެ ގޮތުގައި ބޮޑު މުސާރަ ދީ އެމަނިކުފާނުގެ އަރިސް، ޕީއެންސީ ކޯލިޝަނަށް ނިސްބަތްވާ ބަޔަކު ނެގި މައްސަލަ ފެންމަތިވި އެވެ.
އޭގެ ތެރެއިން ގިނަ ކޮންސަލްޓަންޓުން މިހާރު ތިބީ މި ސަރުކާރުގެ އިސް މަގާމުތަކުގަ އެވެ.
އޭގެ ތެރޭގައި ގައުމިއްޔަތު މިނިސްޓަރު އާދަމް ނަސީރު އިބްރާހިމް އާއި ރާއްޖެއިން ޔޫއޭއީއަށް ކަނޑައަޅާފައި ހުންނަވާ ސަފީރު މުހައްމަދު ހުސައިން ޝަރީފް (މުންދު) ގެ ކުންފުންޏާއި ހައުސިން މިނިސްޓަރު ޑރ. އަލީ ހައިދަރު އަހްމަދު އަދި ރައީސް އޮފީހުގެ ފޮޓޯގްރާފަރު އެލީޒް އަލީ މުހައްމަދު ހިމެނެ އެވެ.
