ހިޔާ ފްލެޓުތަކުގައި އިތުރު ލިފްޓުތައް ހަރުކުރަން ޗައިނާ ކުންފުންޏަކާ ހަވާލުކުރި އަގަކީ ވިޔަފާރީގެ ސިއްރެއް ކަމަށް ބުނެ އެ މައުލޫމާތު ހާމަކުރަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ދެކޮޅު ހަދައިފި އެވެ.
ހިޔާ ފްލެޓުތަކުގައި އިތުރު ލިފްޓުތައް ހަރުކުރުމުގެ މަސައްކަތް އެޗްޑީސީން ހަވާލުކޮށްފައި ވަނީ ޗައިނާގެ ޝެންޔެންގެ ޔުއަންޝާ އިންޓެލެކްޗުއަލް އިންޑަސްޓްރީ ގްރޫޕާ އެވެ. މި ކުންފުންޏާ މި މަސައްކަތް ހަވާލުކުރީ އަންނަ އަހަރުގެ ޖެނުއަރީ 30، އަށެވެ.
ނަމަވެސް މޫސުން ތަން ނުދިނުމުގެ ސަބަބުން މަސައްކަތް ކުރެވި ގިނަ ދުވަސްތަކެއް ގޮސްފައިވާތީ، ކޮންޓްރެކްޓަރަށް 75 ދުވަހުގެ އެކްސްޓެންޝަނެއް ދީފައިވާ ކަމަށް މި މަޝްރޫއުގެ ތަފުސީލުތައް ހިއްސާކުރަން އެދި "އަދަދު" އިން ހުށަހެޅި އާރުޓީއައިގެ ޖަވާބުގައި އެޗްޑީސީން ބުނެފައި ވެ އެވެ. އެހެންކަމުން މަސައްކަތް ނިންމަން ޖެހޭ އާ ތާރީހަކީ އަންނަ އަހަރުގެ އޭޕްރިލް 15، އެވެ.
މި ތަފުސީލުތައް ދިން ނަމަވެސް އާރުޓީއައިގައި މި ނޫހުން ހޯދަން އެދުނު ގިނަ މައުލޫމާތު ނުދޭން އެޗްޑީސީން ވަނީ ނިންމާފަ އެވެ. އެ މައުލޫމާތުތަކަކީ މަސައްކަތް ހަވާލުކުރި އެއްބަސްވުމުގެ އަގާއި މިހާތަނަށް ދޫކުރި ފައިސާ އާއި އެކި ދުވަސް މަތިން ފައިސާ ދޫކުރި ނަމަ އެ ފައިސާ ދޫކުރި އަދަދާއި ތާރީހުތަކެވެ.
މި މައުލޫމާތު ނުދޭން އެޗްޑީސީން ނިންމީ އާރުޓީއައި ގާނޫނުގެ 25 ވަނަ މާއްދާގެ (ހ) އާ ހަވާލާދީ އެވެ. ގާނޫނުގެ އެ މާއްދާގައި އޮންނަނީ ވިޔަފާރި ސިއްރެއް ހިމެނިގެން ވުމާއި އެ މައުލޫމާތު ހާމަކޮށްފި ނަމަ، އެ ތިން ވަނަ ފަރާތުގެ ވިޔަފާރީގެ މަސްލަހަތަށް ނުވަތަ މާލީ މަސްލަހަތަށް ނުރަނގަޅު އަސަަރު ފޯރާނެ މައުލޫމާތު ސިއްރު ކުރެވޭ ގޮތަށެވެ. އަދި ޕްރޮޖެކްޓުގެ އަގު ސިއްރުކުރަން އެއްބަސްވެފައިވާ ހާލަތުގައި ވެސް އެ މައުލޫމާތު ނުދޭން ނިންމެ އެވެ.
ހިޔާ ފްލެޓުތަކުގައި އިތުރަށް ލިފްޓު ހަރުކުރުމުގެ މަސައްކަތުގެ ތެރޭގައި ހިމެނެނީ ހިޔާގެ 16 ޓަވަރުން ކޮންމެ ޓަވަރެއްގައި ދެ ލިފްޓު ހަރުކުރުމެވެ. އޭގެ ތެރެއިން އެއް ލިފްޓަކީ ބަލި މީހުން އުފުލާ ސްޓްރެޗަރު އުފުލޭ ވަރުގެ ބޮޑު ލިފްޓެކެވެ. އެޗްޑީސީން ބުނި ގޮތުގައި މިހާތަނަށް ނިމުނީ މި މަޝްރޫއުގެ 29 ޕަސެންޓެވެ.
އެޗްޑީސީން މި މަސައްކަތުގެ އަގު ހާމަނުކުރި ނަމަވެސް އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގައި މި މަޝްރޫއުގެ އަގުގެ ގޮތުގައި އޮތީ 108.4 މިލިއަން ރުފިޔާ އެވެ. އެއީ މި އަހަރަށް ފާސްކުރި ބަޖެޓުގައި އެ މަސައްކަތަށް ކަނޑައެޅި 200 މިލިއަން ރުފިޔާއަށް ވުރެ 91.6 މިލިއަން ރުފިޔާ މަދު އަދަދެކެވެ.
މިއީ މި ސަރުކާރުގެ 100 ދުވަހުގެ ވައުދުތަކުގެ ތެރޭގައި ހިމަނައިގެން ކުރަން ފެށި މަސައްކަތެކެވެ.
