ޕާޓީ ބަދަލުކޮށްފި ނަމަ ނުވަތަ ޕާޓީން ވަކިކޮށްފި ނަމަ މަޖިލިސް މެންބަރުކަން ގެއްލޭ ގޮތަށް ގާނޫނުއަސާސީއަށް ގެންނަން މަޖިލީހަށް ހުށަހަޅާފައިވާ އިސްލާހަކީ ރިޔާސީ ދައުރު ދަންމައިލަން ކޮށާ މަގެއް ކަމަށް ހަނިމާދޫ ދާއިރާގެ މަޖިލިސް މެންބަރު އަބްދުލްގަފޫރު މޫސާ ވިދާޅުވެއްޖެ އެވެ.
މަޖިލިސް ގޮނޑި ގެއްލޭ އިސްލާހު ދިރާސާ ކުރުމަށް މިހާރު ކުރިއަށްދާ މުޅި މަޖިލީހުގެ ކޮމިޓީގައި ވާހަކަ ދައްކަވަމުން ގަފޫރު ވިދާޅުވީ ގާނޫނުއަސާސީއަށް ބަދަލު ގެންނަންޖެހޭ އެއްވެސް ސަބަބެއް ނެތް ކަމަށެވެ. ފުރަތަމަ ބަދަލު މި ގެންނަނީ މެންބަރުންގެ ގޮނޑި ގެއްލޭ އިސްލާހު ކަމަށާއި އަދި ކުރިއަށް އޮތް ތަނުގައި ރިޔާސީގެ ދައުރު ވެސް ދަންމައިލާނެ ކަމަށް ގަފޫރު ތުހުމަތު ކުރެއްވި އެވެ.
"ފުރަތަމަ މި ބަދަލު ގެންނާނީ ދެން އެއަށްފަހު ރައީސްކަމުގެ ދައުރު ވެސް ދަންމައިލާނެ، ދެން ހުރި ކަންތައްތައް ވެސް ކުރާނެ އިއްޒަތްތެރި ރައީސް، އެކަން ކުރުމަށްޓަކައި ކޮށަމުންދާ މަގެއް އަޅުގަނޑުމެންނަށް ފެންނަމުން މިދަނީ، މިއީކީ ބަލައިގަނެވޭނެ ކަމެއް ނޫން އިއްޒަތްތެރި ރައީސް،" ގަފޫރު ވިދާޅުވި އެވެ.
އެފަދަ އިސްލާހެއް މަޖިލީހަށް ހުށަހަޅައިގެން ފާސްކުރުމުގެ މަސައްކަތް ކުރަމުން ދަނީ ބާރާއި ނުފޫޒު އޮތްކަން ރައްޔިތުންނަށް ދައްކައި ބިރު ދެއްކުމަށް ކަމަށް ވެސް ގަފޫރު ވިދާޅުވި އެވެ.
"ގާނޫނު އަސާސީއަށް މިއަދު މި ގެނެވޭ އިސްލާހަކީ މިއީ ވަރަށް ނުރައްކާތެރި އިސްލާހެއް އިއްޒަތްތެރި ރައީސް، މި އިސްލާހު ގެނައުމުގެ ބޭނުމަކީ ރައްޔިތުންނަށް ބިރުދެއްކުން، ކަނޑައެޅިގެން މި މަޖިލީހުގެ ސުޕަ މެޖޯރިޓީ އޮވެމެ ބޭނުންހައި ކަމެއް ކުރެވޭ ގޮތަށް މަޖިލީހުގެ ތަޅުން އޮތް އިރުގައި މިއަދު ގާނޫނުއަސާސީއަށް ގެންނަ ބަދަލަކީ އަޅުގަނޑު ހަމަ ކުރިން ދެންނެވިހެން ކަނޑައެޅިގެން ބިރުދައްކަން ހިންގާ އަމަލެއް އިއްޒަތްތެރި ރައީސް،" ގަފޫރު ވިދާޅުވި އެވެ.
މަޖިލިސް މެންބަރުކަން ގެއްލޭ ގޮތަށް ގާނޫނުއަސާސީއަށް އިސްލާހު ގެންނަން މަސައްކަތް ކުރަމުންދާއިރު، އެ އިސްލާހާ ގުޅިގެން އިދިކޮޅު މެންބަރުންނާއި މިނިވަން މެންބަރުން ދަނީ ކަންބޮޑުވުން ފާޅު ކުރަމުންނެވެ.
