ދިރާގާއި ވިމެން އިން ޓެކް މޯލްޑިވްސްގެ ފަރާތުން އަންހެން ކުދިންނަށް ހާއްސަކޮށްގެން ކޯޑިން ދަސްކޮށް ދިނުމަށް ހިންގާ ސިލްސިލާ ޕްރޮގްރާމްގެ ތެރެއިން ގާލްސް ޓު ކޯޑްގެ ހއ. ދިއްދޫ އެޑިޝަން ކާމިޔާބުކަމާ އެކު ނިންމާލައިފި އެވެ.
އެޗްޓީއެމްއެލް، ސީއެސްއެސް އަދި ޖާވާސްކްރިޕްޓް ބޭނުންކޮށްގެން ކޯޑިންގްގެ ހުނަރު ދަސްކޮށްދޭ އެ ޕްރޮގްރާމަކީ އަންހެން ކުދިން ބާރުވެރިކުރުވުމުގެ މަގްސަދުގައި ކުރިއަށްގެންދާ ޕްރޮގްރާމެކެވެ.
ގާލްސް ޓު ކޯޑް ދިއްދޫ އެޑިޝަން ފަރުމާކޮށްފައިވަނީ 10 އަހަރާއި 13 އަހަރުގެ ދެމެދުގެ އަންހެން ކުދިންނަށް، ޓެކްނޮލޮޖީގެ ދާއިރާއިން ފުރުސަތު ހޯދުމަށް ޝައުގުވެރިކަން އުފައްދާ އެ ދާއިރާގައި އަންހެން ކުދިންގެ ބައިވެރިވުން އިތުރުކުރުމަށެވެ.
އެ ޕްރޮގްރާމުގައި އިސްކަންދީފައި ވަނީ ކުރިން ކޯޑިންގެ ތަޖުރިބާ ނެތް ކުދިންނަށެވެ. ދެމަސް ދުވަހަށް ކުރިއަށްގެންދިޔަ ގާލްސް ޓު ކޯޑް ހއ. ދިއްދޫ ޕްރޮގްރާމް މެދުވެރިކޮށް 20 ކުދިން ވަނީ ޕްރޮގްރާމް ކާމިޔާބުކަމާ އެކީ ނިންމާފަ އެވެ.
އެ ޕްރޮގްރާމް ނިމުނުއިރު ބައިވެރިންގެ އަމަލީ ހުނަރުތައް ތަރައްގީވެ، އަމިއްލައަށް ވެބްސައިޓް ފަރުމާކޮށް ޑިވެލޮޕްކުރަން ދަސްކޮށްދިނެވެ.
ދިރާގުގެ މެނޭޖާ ކޯޕަރޭޓް ސޯޝަލް ރެސްޕޮންސިބިލިޓީ، ބިޝާރު ހަމީދު ވިދާޅުވީ ގާލްސް ޓު ކޯޑު ޕްރޮގްރާމުގެ އެންމެ މުހިންމު މަގްސަދަކީ ކުދިންގެ ޅަ އުމުރުގައި އެ ދާއިރާއަށް ލޯހުޅުވި، އަމިއްލަ ނަފްސަށް ކުރާ އިތުބާރު އިތުރު ކުރުވުން ކަމަށެވެ.
ވިމެން އިން ޓެކް މޯލްޑިވްސްގެ ރައީސް، ނަހުޒާ އިބްރާހިމް ވިދާޅުވި ގޮތުގައި ޒުވާން އަންހެން ކުދިން މިހާ ޖޯޝާ އެކީ ކޯޑިންއަށް ޝައުގުވެރިކަން ފާޅުކުރާކަމަކީ ވަރަށް ބޮޑު އުފަލެކެވެ.
"އެ ކުދިން އަޅުގަނޑުމެންނަށް ދައްކުވަމުން އެދަނީ ރަނގަޅު ފުރުސަތުތަކާ އެއްބާރުލުމާ އެކު، އެކުދިންނަށް ކޮންމެ ކަމެއް ވެސް ހާސިލްކުރެވިދާނެ ކަމަށް. އަޅުގަނޑުމެން އުންމީދު ކުރަނީ މި ޕްރޮގްރާމްގެ ސަބަބުން އެކުދިންނަށް ފަންނީ ހުނަރުތައް ލިބިގެން ދިއުމާއި އެކު، އުއްމީދީ މުސްތަގުބަލެއް ބިނާ ކުރުމަށް މަގު ފަހިވެގެންދާނެ ކަމަށް،" އޭނާ ވިދާޅުވި އެވެ.
ވިމެން އިން ޓެކްއާ ގުޅިގެން ދިރާގުން ކުރިއަށް ގެންދާ ގާލްސް ޓު ކޯޑް ޕްރޮގްރާމަކީ ދިރާގުގެ ސީއެސްއާރު ޕްރޮގްރާމްގެ ތެރެއިން އަންހެނުން ބާރުވެރިކުރުވުމަށް އެ ކުންފުނިން ކުރާ މަސައްކަތުގެ މުހިންމު ބައެކެވެ.
ހއ. ދިއްދޫގެ އިތުރުން ފުވައްމުލައް ސިޓީ، ގދ. ތިނަދޫ، ކުޅުދުއްފުށި ސިޓީ އަދި ލާމު އަތޮޅުގައި ވެސް ޕްރޮގްރާމް ވަނީ ކުރިއަށް ގެންގޮސްފަ އެވެ.
