އިޒްރޭލުން ހިންގަމުންދާ ގަތުލްއާންމުގައި ލުބްނާނުގެ ބެއިރޫތުގައި ހުންނަ ސަރުކާރުގެ ހެޑްކުއާޓާސްގެ އިތުރުން ގިނަ އަދަދެއްގެ އެމްބަސީތައް ހިމެނޭ ސަރަހައްދަކަށް ހަމަލާދީ ފަސް މީހަކު މަރާލައިފި އެވެ.
އިޒްރޭލުން ވައިގެ މަގުން ދިން އެ ހަމަލާގައި ޒަހަމްވި މީހުންގެ އަދަދު 24 އަށް ވުރެ ގިނައިރު، ހަމަލާގައި މަރުވި މީހުންނާއި ޒަހަމްވި މީހުންގެ އަދަދު އިތުރުވާނެ ކަމަށް ކަމާބެހޭ ފަރާތްތަކުން ވަނީ ލަފާކޮށްފަ އެވެ.
ރިޕޯޓްތައް ބުނާގޮތުން އެ ހަމަލާތަކުގައި ލުބްނާނު ސަރުކާރުގެ ހެޑްކުއާޓާސްއަށް އަދި އެއްވެސް އެމްބަސީއަކަށް އަމާޒުވެފައެއް ނުވެ އެވެ.
އެ ހަމަލާތައް އިޒްރޭލުން އަމާޒު ކުރަނީ ލުބްނާނުގައި ހަރަކާތްތެރިވަމުން އަންނަ ހިޒްބުﷲ ޖަމާއަތުގެ މީހުންނަށް އަމާޒުކޮށް ކަމަށް އެ ގައުމުން ބުނެ އެވެ. ނަމަވެސް ހަމަލާތަކުގައި ކަމާ ނުބެހޭ ގިނަ އަދަދެއްގެ އާންމުން އަންނަނީ މަރުވަމުންނެވެ.
އިޒްރޭލުން މިދިޔަ އަހަރުގެ އޮކްޓޯބަރުން ފެށިގެން ލުބްނާނަށް ދެމުން އަންނަ ހަމަލާތަކުގައި މަރުވި މީހުންގެ އަދަދު 3،500 އަށްވުރެ އިތުރެވެ. ހަމަލާތަކުގައި ޒަހަމްވި މީހުންގެ އަދަދު 15،000 އާ ގާތް ކުރެ އެވެ.
ލުބްނާނުގެ އިތުރުން އިޒްރޭލުން އަންނަނީ ކޮންމެ ދުވަހަކު ވެސް ފަލަސްތީނުގެ ގާޒާއަށް މެދުކެނޑުމެއް ނެތި ހަމަލާތައް ދެމުންނެވެ. އެ ހަމަލާތަކުގައި މަރުވި މީހުންގެ އަދަދު 44،000 އާ ގާތް ކުރާއިރު، ލައްކައަކަށް ވުރެ ގިނަ މީހުން ވަނީ ޒަހަމްވެފަ އެވެ.
އިޒްރޭލުގެ އަމަލުތައް ގައުމުތަކުން ކުށްވެރިކޮށް އެކަން ހުއްޓާލަމުން ގޮވާލަމުން ދިޔަ ނަމަވެސް، މިހާތަނަށް އެ އަމަލުތައް ހުއްޓާލަން އެ ގައުމުން އެއްބަސްވުމަކަށް އައިސްފައި ނުވެ އެވެ.
