ލަންޑަން (ނޮވެމްބަރު 18) - ޔުއެފާ ނޭޝަންސް ލީގުގެ ލީގު ބީގައި ރޭ އަޔަލެންޑް އަތުން 5-0 އިން މޮޅުވެ، އިންގްލެންޑުން ލީގު އޭ އަށް ޕްރޮމޯޓްވެއްޖެ އެވެ.
ލީގު ބީގެ ގްރޫޕް ތިނެއްގެ ހުރިހާ މެޗެއް ނިމުނުއިރު، އެއް ވަނަ އަށް ދިޔަ އިންގްލެންޑާއި ދެ ވަނައިގައި ނިންމި ގްރީސް އަށް ހަ މެޗުން ވަނީ 15 ޕޮއިންޓް ލިބިފަ އެވެ. ލަނޑުގެ ތަފާތުން އެއް ވަނަ ހޯދީ އިންގްލެންޑް އެވެ. އެއް ވަނަ ޓީމަށް ލީގު އޭގެ ސީދާ ޖާގައެއް ލިބޭއިރު، ދެ ވަނަ ޓީމު ޖެހޭނީ ޕްލޭއޮފް ކުޅޭށެވެ.
މި ގްރޫޕުގެ ތިން ވަނަ ދިޔައީ، ހަ މެޗުން ހަ ޕޮއިންޓް ހޯދި އަޔަލެންޑް އެެވެ. ރޭ ގްރީސް އަތުން 2-0 އިން ބަލިވި ފިންލެންޑް ވަނީ ކުޅުނު ހަ މެޗުން ވެސް ބަލިވެ، ލީގު ސީ އަށް ރެލިގޭޓްވެފަ އެވެ.
އިންގްލެންޑަށް ރޭގެ މެޗުގައި ލީޑުނަގައިދިނީ ހެރީ ކޭންގެ ޕެނަލްޓީންނެވެ. ދެން ގޯލު ޖެހި ހަތަރު ކުޅުންތެރިންނަކީ ވެސް ގައުމީ ޓީމަށް ފުރަތަމަ ގޯލު ޖަހައިދިން ކުޅުންތެރިންނެވެ. އެއީ، އެންތަނީ ގޯޑަން، ކޯނާ ގެލަގާ، ޖެރަޑް ބޮވެން އަދި ޓޭލާ ހާވުޑް ބެލިސް އެވެ. މި މެޗުގައި އިންގްލެންޑުން ހުރިހާ ލަނޑެއް ޖެހީ ވެސް އަޔަލެންޑްގެ ލިއަމް ސްކޭލްސް އަށް، 51 ވަނަ މިނިޓްގައި ދެ ވަނަ ރީނދޫ ކާޑާ އެކު ރަތް ކާޑު ދެއްކި ފަހުންނެވެ.
މިއީ އިންގްލެންޑްގެ ވަގުތީ ކޯޗު ލީ ކާސްލީގެ އިރުޝާދުގެ ދަށުން އެ ޓީމު ކުޅުނު ފަހު މެޗެވެ. ޖެނުއަރީ އެއް ވަނަ ދުވަހު އިންގްލެންޑާ ހަވާލުވާނީ ތޯމަސް ޓުޗެލް އެވެ.
ލީގު އޭ އަށް ދެން ޕްރޮމޯޓްވީ ނޯވޭ އެވެ. ނޯވޭ އިން ވަނީ ލީގު ބީގެ ގްރޫޕް ތިނެއްގެ އެއް ވަނަ ހޯދައިފަ އެވެ. އެއީ ހަ މެޗުން 13 ޕޮއިންޓާ އެކު އެވެ. އެ ގްރޫޕްގެ ދެ ވަނަ އަށް ދިޔަ އޮސްޓްރިއާ އަށް ހަ މެޗުން 11 ޕޮއިންޓް ލިބުނުއިރު، ތިން ވަނަ ދިޔަ ސްލޮވީނިއާ އަށް ހަ މެޗުން އަށް ޕޮއިންޓް ލިބުނެވެ. އަދި ފުލުގައި ނިންމި ކަޒަކްސްތާން އަށް ހަ މެޗުން އެއް ޕޮއިންޓް ލިބުނުއިރު، އެ ޓީމު ވަނީ ލީގު ސީ އަށް ރެލިގޭޓްްވެފަ އެވެ.
ނޯވޭ އިން ވަނީ އާލިން ބްރައުޓް ހާލަންޑްގެ ހެޓްރިކާ އެކު، 5-1 އިން ރޭ ކަޒަކްސްތާން ބަލިކޮށްފަ އެވެ.
