މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އެގްޒެކެޓިވް ޑިރެކްޓަރުގެ މަގާމުގައި ހުންނެވި މުހައްމަދު ނިޒާމު ދައުލަތާ ދެކޮޅަށް ވަކާލާތުކޮށްފި އެވެ.
އޭނާ ދައުލަތާ ދެކޮޅަށް ވަކާލާތު ކުރީ ދައުލަތު އަފާމީ މޯލްޑިވްސް ކިޔާ ކުންފުންޏަކާ ދެކޮޅަށް ހައި ކޯޓުގައި ހިނގަމުންދާ ދައުވާއެއްގަ އެވެ. އެ ދައުވާގައި މިއަދު ބޭއްވި ޝަރީއަތުގެ އަޑުއެހުމުގައި އަފަމީ މޯލްޑިވްސްގެ ވަކީލެއްގެ ގޮތުގައި ހުންނެވީ ނާޒިމް އެވެ.
އޮންލައިންކޮށް ބޭއްވި މި އަޑުއެހުމުގައި އޭނާ ބައިވެރިވެލެއްވީވެސް އެމްއެމްއޭ ހިންގާ އިމާރާތުގައި އިންނަވައިގެންނެވެ.
މި މައްސަލައަކީ އަފާމީ މޯލްޑިވްސްއަށް ސަރުކާރުން ދިން މަޝްރޫއަކާ ގުޅިގެން ލިބުނު ގެއްލުމުގެ ބަދަލު ދިނުމަށް ސިވިލް ކޯޓުން ނިންމި ނިންމުން އިސްތިއުނާފުކޮށް ލޯކަލް ގަވަރުމަންޓް އޮތޯރިޓީ (އެލްޖީއޭ)ގެ ފަރާތުން އޭޖީ އޮފީހުން ހުށަހަޅާފައިވާ މައްސަލައެކެވެ.
މިއީ މި ފަހުން ދައުލަތުގެ އެކި މަގާމުތަކުގައި ތިއްބެވި ބޭފުޅުން، ދައުލަތާ ދެކޮޅަށް ވަކާލާތު ކުރުމާ ގުޅިގެން ފެންމަތިވި ފުރަތަމަ މައްސަލައެއް ނޫނެވެ.
އެގޮތުން، އެންވަޔަރަމަންޓް މިނިސްޓްރީގެ ނައިބު، މުހައްމަދު ރާގިބު އަހުމަދު އަދި ރައްޔިތުންގެ މަޖިލީހުގެ ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު (ސަޓޯ) ދައުލަތުގެ އިދާރާއަކާ ދެކޮޅަށް ވަކާލާތު ކުރި މައްސަލަތަކެއް މި ފަހުން ފެންމަތިވި އެވެ.
އޭގެތެރެއިން ނައިބު ވަޒީރުގެ މައްސަލާގައި ހައި ކޯޓުން ވަނީ ރައީސުލްޖުމްހޫރިއްޔާ އައްޔަނުކޮށްފައި ހުރި ސިޔާސީ މަގާމެއްގައި ހުރި މީހަކަށް ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ނިންމާފަ އެވެ. ނަމަވެސް މިއަދު ވަކާލާތު ކުރެއްވި ނިޒާމު ހުންނެވީ އެފަދަ މަގާމެއްގައެއް ނޫނެވެ.
ނިޒާމު ވަނީ މީގެ ކުރިން ހައި ކޯޓުގައިވެސް ވަޒީފާ އަދާކުރައްވާފަ އެވެ.
