ތައިލެންޑުގެ ބެންކޮކަށް ޕްރޮޓީން ސަޕްލިމެންޓް ފުޅިއެއްގައި ފޮރުވައިގެން ތިން ކިލޯގެ މެފްޑްރޯންއާ އެކު ދިވެއްސަކު ހައްޔަރުކޮށްފި އެވެ.
ތައިލެންޑުގެ ނޫސްތަކުން ބުނީ އިނގިރޭސިވިލާތުން ފޮނުވި އެ ސަޕްލިމެންޓް ފުޅި ބެންކޮކަށް އެތެރެކުރީ ކުރިއާ މެދުވެރިކޮށް ކަމަށާއި ދިވެހި މީހާ ހައްޔަރުކުރީ އޭތި ބަލައި ދިޔަ ވަގުތު ކަމަށެވެ.
ހައްޔަރުކުރި ދިވެހި މީހާގެ ނަމެއް މިހާތަނަށް ތައިލެންޑުގެ ފުލުހުން ހާމަ ކޮށްފައި ނުވާއިރު، ޑްރަގް ނެޓްވޯކުގައި ބައިވެރިވާ އިތުރު މީހުން ތިބިތޯ އަންނަނީ ބަލަމުންނެވެ.
މިދިޔަ ޖޫން މަހު ކޮފީ ކެޕްސިއުލްގައި ފޮރުވައިގެން ކުރިއާ މެދުވެރިކޮށް ޕޮލެންޑުން ބެންކޮކަށް އެތެރެ ކުރަން އުޅުނު 840 ގްރާމުގެ މެފްޑްރޯން ފުލުހުން އަތުލައިގަތެވެ. އެ މައްސަލައިގައި ހައްޔަރުކުރީ ރަޝިއާ މީހެކެވެ.
އެ މައްސަލައިގެ ތަހުގީގުގައި އިތުރު ބާވަތްތަކުގެ މަސްތުވާތަކެތި ވެސް ވަނީ އަތުލައިގަނެފަ އެވެ. އޭގެ ތެރޭގައި އެމްޑީއެމްއޭ، އެކްސްޓަސީ، ކޮކެއިން، ކެޓަމިންގެ އިތުރުން އެހެން ބާވަތްތައް ހިމެނެ އެވެ.
ބެންކޮކަކީ ގިނަ އަދަދެއްގެ ދިވެހިން ޗުއްޓީ ހޭދަ ކުރުމަށް ދާ ގައުމެކެވެ. އެ ގައުމުގައި ދިވެހިން ކުށް ކުރާ ނިސްބަތް ފަހަކަށް އައިސް ދަނީ އިތުރު ވަމުންނެވެ.
