ސަރުކާރުން ބޭނުންވާ ގޮތަށް އަންނަ ކޮންމެ ޓޫރިސްޓެއްގެ ބޮލަކަށް ޑޮލަރު މާރުކުރަން މަޖުބޫރު ކުރާ ސިޔާސަތާ، ކުރީގެ ރައީސް މުހައްމަދު ނަޝިދު އަދި އެސްޓީއޯގެ ޗެއާމަންގެ މަގާމުގައި ހުންނެވި މަޝްހޫރު ވިޔަފާރިވެރިޔާ އާމިރު މަންސޫރު ވެސް ދެކޮޅުކަން އިއްޔެ ހާމަކުރައްވައިފި އެވެ.
ނަޝީދު ވިދާޅުވީ މީހުންގެ އަމިއްލަ ފައިސާ އާމެދު އަމަލު ކުރަންވީ ގޮތް ސަރުކާރަކަށް ނުނިންމޭނެ ކަމަށާއި ޓެކްސް ދެއްކުމަށްފަހު ބާކީ ހުންނަ ފައިސާ ބަހައްޓާނެ ތަނަކާއި ހަރަދު ކުރާނެ ގޮތެއް ނިންމުމުގެ ހައްގު ރިސޯޓު ހިންގާ މީހުންނަށް އޮންނަންޖެހޭނެ ކަމަށެވެ.
ރިސޯޓުތަކާއި ސަފާރި ވިޔަފާރީގައި ވެސް ހަރަކާތްތެރިވާ އާމިރުގެ މި އުދާސްތައް ބަންޑުންކޮށްލެއްވީ ޓޫރިޒަމް ވިޔަފާރިވެރިން ތިބޭ ގްރޫޕެއްގަ އެވެ. އެ ގްރޫޕުގައި އޭނާ ދެއްކި ވާހަކަތަކުގެ ސްކްރީންޝޮޓުތައް އާންމުވެފައިވާއިރު، "އަދަދު" އަށް ވެސް ވަނީ އެ ސްކްރީންޝޮޓުތައް ލިބިފަ އެވެ.
ރިސޯޓު ހިންގާ ފަރާތްތަކުން އެކުއިޒިޝަން ކޮސްޓާއި ޓީޖީއެސްޓީ އާއި އާމްދަނީގެ ޓެކްސްގެ އިތުރުން ބިމު ކުލި ވެސް ވިޔަފާރިވެރިން ދައްކާ ކަމަށާއި، އޭގެ ބަދަލުގައި ސަރުކާރުން ދެނީ "ސުމެއް" ކަމަށް އާމިރު ފާހަގަ ކުރެއްވި އެވެ. އަދި ވިޔަފާރިކުރަނީ ސިޔާސީ ލޯނު ދައްކަން ނޫން ކަމަށް ވެސް ވިދާޅުވި އެވެ.
