މާލޭގައި ކެފޭ އުސޫލުން މަސްތުވާތަކެތީގެ ހިދުމަތްދޭ ތަންތަން (ޑްރަގް ކާޓެލް) ބަންދު ކުރުމަށް ކުރާ މަސައްކަތުގެ ދަށުން 48 ތަނެއް ބަންދުކޮށް، ފަރުވާގެ ނިޒާމަށް ވައްދަން ޖެހޭ 49 މީހަކު ނެޝަނަލް ޑްރަގް އެޖެންސީ (އެންޑީއޭ) އާ ހަވާލުކޮށްފައިވާ ކަމަށް ފުލުހުން ބުނެފި އެވެ.
ފުލުހުން ބޭއްވި ނޫސްވެރިންގެ ބައްދަލުވުމުގައި ހެޑް އޮފް ޑްރަގް އެންފޯސްމަންޓް ސުޕްރިޓެންޑެންޓް އޮފް ޕޮލިސް ނާހިދު ހުސެއިން ވިދާޅުވީ މަސްތުވާތަކެތީގެ މުއާމަލާތްތައް އާންމުގޮތެއްގައި ކުރާ ތަންތަނުގައި ސްޓެޓިކް ޑިއުޓީ ކުރަމުންދާ ކަމަށާއި ފަރުވާގެ ނިޒާމަށް ވެއްދުމަށް އެންޑީއޭއާ ހަވާލުކުރީ ތަކުރާރުކޮށް ޖިނާއީ ކުށް ކުރާ މީހުން ކަމަށެވެ.
"މަސްތުވާތަކެއްޗަށް ދެވި ހިފާފައިވާ ފަރާތްތަކާއި، މަސްތުވާތަކެތި ބޭނުން ކުރުމުގެ ނިޔަތުގައި ސަލާންޖަހާ ފަރާތްތަކާއި، ތަކުރާރުކޮށް ޖިނާއީ ކުށް ކުރުމުގައި ހަރަކާތްތެރިވާ ފަރާތްތައް ފަރުވާގެ ނިޒާމުގެ ތެރެއަށް ވެއްދުމަށްޓަކައި ކަމާ ގުޅުންހުރި ފަރާތްތަކާ އެކު މަސައްކަތް ކުރެވެމުންދޭ. މިގޮތުން އެންޑީއޭއަށް ފަރުވާގެ ނިޒާމަށް ވެއްދުމަށް 49 ފަރާތެއް ހަވާލުކޮށްފައިވޭ،" ނާހިދު ހުސެއިން ވިދާޅުވި އެވެ.
މީގެ ކުރިން ވެސް މަސްތުވާތަކެތީގެ ހިދުމަތް ކެފޭ އުސޫލުން ދޭ ތަންތަން ބަންދުކޮށް، އެތަންތަނުގައި ފުލުހުން ޑިއުޓީ ކޮށްފައިވެ އެވެ. އަދި މަސްތުވާތަކެތި ބޭނުންކުރާ މީހުން ފަރުވާގެ ނިޒާމަށް ވެއްދުމަށް އެންޑީއޭއާ ވެސް ހަވާލުކޮށްފައިވެ އެވެ.
ނާހިދު ވިދާޅުވީ ބަނގުރަލުގެ ވަގު ވިޔަފާރި ހުއްޓުވުމަށް ޓޫރިޒަމް މިނިސްޓްރީ، ކަސްޓަމް ސާވިސް އަދި ފުލުހުން ގުޅިގެން ސަފާރީތަކަށް އަމާޒުކޮށްގެން ކުރިއަށް ގެންދިޔަ އިންސްޕެކްޝަންތަކުގައި 57 ސަފާރީއެއް ބަލައި ފާސްކޮށްފައިވާ ކަމަށެވެ.
މަސްތުވާތަކެތީގެ މައްސަލަތަކުގައި ފުލުހުން ކުރާ މަސައްކަތުގެ އަދާހަމަ:
- 12،561 ބަލައި ފާސްކޮށް 1،009 މީހަކު ބެލުމުގެ ދަށަށް ގެނައި.
- 158 އޮޕަރޭޝަން ހިންގި، އޭގެ ތެރޭގައި 12 އަތޮޅެއްގައި 12 އޮޕަރޭޝަން ހިންގި.
- މަސްތުވާތަކެތީގެ އެކި މައްސަލަތަކުގައި 142 ބިދޭސީން ޑީޕޯޓް ކުރަން އިމިގްރޭޝަނާ ހަވާލުކުރި.
- 183 ކިލޯއަށްވުރެ ގިނަ މަސްތުވާތަކެތި އަދި 8،451 ބަނގުރާ އަތުލައިގަތް.
- އަތުލައިގަތް މަސްތުވާތަކެތީގެ މަގުމަތީ އަގު 385 މިލިއަން ރުފިޔާއަށްވުރެ ގިނަ.
- ޖުމްލަ 783 މައްސަލަ ހުށަހެޅުނުއިރު، 345 މައްސަލަ ދައުވާ ކުރަން ޕީޖީއަށް ފޮނުވާފައި.
- ކްރިމިނަލް ކޯޓާއި ހުޅުމާލޭ ކޯޓުން ބެލި 19 މައްސަލައެއްގައި 22 މީހުންނަށް ކުށް ސާބިތުވި.
- މަސްތުވާތަކެތީގެ ގާނޫނަށް ގެންނަން ޖެހޭ އިސްލާހުތައް އޭޖީ އޮފީހަށް ފޮނުވާފައި.
