ރާއްޖޭގައި މިހާރު ހިންގަމުންދާ ރިސޯޓުތަކުގެ ތެރެއިން އެންމެ ރިސޯޓެއް ފިޔަވައި ހުރިހާ ރިސޯޓަކުން ވެސް ރާއްޖެ އަންނަ ކޮންމެ ޓޫރިސްޓަކަށް ވަކި ރޭޓެއްގެ ދަށުން ޑޮލަރު މާާރުކުރަން މަޖުބޫރުވާ ގޮތަށް އެމްއެމްއޭއިން އެކުލަވައިލި އާ ގަވާއިދުގެ ދަށުން ރެޖިސްޓަރީވެފައިވާ ކަމަށް އެމްއެމްއޭއިން ބުނެފި އެވެ.
މީޑިއާތަކަށް އެމްއެމްއޭއިން ފޮނުވި މެސެޖެއްގައި ބުނީ ރާއްޖޭގައި މިހާރު ހިންގަމުން އަންނަ 174 ރިސޯޓުގެ ތެރެއިން 173 ރިސޯޓު އެ ގަވާއިދުގެ ދަށުން ރެޖިސްޓަރީވެފައިވާ ކަމަށެވެ.
މިިދިޔަ އޮކްޓޯބަރު 1، ގައި އެމްއެމްއޭއިން އިއުލާނު ކުރި ގަވާއިދުގައިވާ ގޮތުން ރާއްޖޭގައި ކުރާ ހުރިހާ މުއާމަލާތެއް ކުރަން ވާނީ ދިވެހި ރުފިޔާއިންނެވެ. މިހެން ނަމަވެސް ބޭރު ފައިސާ ލިބޭ ވިޔަފާރިތަކަށް ގިނަ އިސްތިސްނާތަކެއް އެ ގަވާއިދުގެ ތެރެއިން ލިބިފައިވެ އެވެ.
އޭގެ އިތުރުން އެމްއެމްއޭއިން ވަނީ ބޭންކުތަކަށް ހުރިހާ ފައިސާއެއް ޖަމާކުރުމަށާއި އެ އިދާރާއަށް ރިޕޯޓުކުރަން ވެސް ހަމަތަކެއް ކަނޑައަޅައިފަ އެވެ.
ހުރިހާ ފައިސާއެއް ބޭންކުތަކަށް ޖަމާކުރަން މަޖުބޫރުކޮށްފައިވާއިރު، މާރުކުރަން ޖެހެނީ ވަކި އަދަދެކެވެ. އެއީ ޓޫރިސްޓުން ރިސޯޓުތަކާއި އިންޓެގްރޭޓަޑް ރިސޯޓުތަކާއި ރިސޯޓު ހޮޓާތަކާއި ހޮޓާތަކުގެ އިތުރުން ޓޫރިސްޓު އުޅަނދުތަކާއި އެ ނޫން ވެސް އެ ފަދަ ތަންތަނަށް އަންނަ ކޮންމެ ޓޫރިސްޓަކަށް 500 ޑޮލަރެވެ. މި ރޭޓުގައި ކޮންމެ މަހެއްގައި އަންނަ ޓުރިސްޓުންނަށް ޖެހޭ އަދަދު ބޭންކުން މާރުކުރަން މަޖުބޫރެވެ.
މީހުން ދިރިއުޅޭ ރަށްރަށުގައި ހުންނަ ގެސްޓުހައުސްތަކާއި އެ ރަށްރަށުގައި ހުންނަ ހޮޓާތަކުގެ ތެރެއިން 50 ކޮޓަރިއަށް ވުރެ މަދު އަދަދެއްގެ ކޮޓަރި ހުންނަ ތަންތަނުން މާރުކުރަން ޖެހެނީ ޓޫރިސްޓަކަށް 25 ޑޮލަރު ރޭޓުންނެވެ.
މިގޮތަށް މަޖުބޫރުކޮށްފައި އޮތް ނަމަވެސް، ބޭރު ފައިސާއިން ޓެކްސް ދެއްކުމަށާއި ލޯނުތައް އަދާކުރުމަށް ނޫނީ ކޯޓަކުން ކަނޑައަޅާފައިވާ ހުކުމެއްގެ ދަށުން ބޭރު ފައިސާ ބޭނުން ކުރަން ޖެހިއްޖެ ހާލަތެއްގައި އެމްއެމްއޭއަށް ހުށަހަޅައިގެން މާރުކުރުމުގެ އިސްތިސްނާއެއް ހޯދެ އެވެ.
