ގައުމީ ފުޓުބޯޅަ ޓީމުން އަހަރަކަށް ފަހު ކުޅުނު ބައިނަލްއަގްވާމީ އެކުވެރިކަމުގެ މެޗުގައި ބަންގްލަދޭޝް އަތުން 1-0 މޮޅުވި, މެޗު، މިގެ ފަސް މަސް ކުރިން ކުއްލި ގޮތަކަށް ނިޔާވި، ގައުމީ ފުޓްބޯޅަ ޓީމުގެ ކުރީގެ މިޑްފީލްޑަރު، މުހައްމަދު އާރިފް (ބަކާ) އަށް ހާއްސަކޮށްފި އެވެ.
މިއަދު ހަވީރު ކުޅުނު މި މެޗުގެ ފުރަތަމަ ހާފުގައި ރާއްޖެއިން ލީޑު ނެގީ އަލީ ފާސިރު (ސެންޓޭ) ޖެހި ގޯލުންނެވެ. މިއީ، ރާއްޖޭގެ ފުޓްބޯޅަ ތާރީހުގައި ވެސް ބަންގްލަދޭޝްގައި ކުޅެގެން އެ ގައުމު އަތުން ރާއްޖެ މޮޅުވި ފުރަތަމަ ފަހަރެވެ.
ގައުމީ ޓީމުގައި ބަކާ ބޭނުންކުރި ނަމްބަރަކީ ހައެކެވެ. މިއަދުގެ މެޗުގައި މި ނަމްބަރަށް ކުޅެފައިވަނީ އަހުމަދު އައިހަމް (ފަތޯ) އެވެ. މެޗަށް ފަހު ދިވެހި ޓީމުން އުފާފާޅުކުރަމުން ވަނީ "ދިސް އިޒް ފޯ ޔޫ ބަކާ" ޖަހާފައިވާ ޕޯސްޓަރެއް ދައްކާލައިފަ އެވެ. އެ ގަނޑު ހިފައިގެން ހުރީ، ހަ ނަމްބަރު ޖޯޒީގައި މިއަދުގެ މެޗުގައި އެއްކޮށް ކުޅުނު އައިހަމް އެވެ.
މެޗަށް ފަހު، ދިން އިންޓަވިއުގައި އައިހަމް ބުނީ، މިއީ އަހަރަކަށް ފަހު ގައުމީ ޓީމުން ކުުޅުނު ފުރަތަމަ މެޗު ކަމަށާއި ސަޕޯޓަރުންގެ އިތުބާރު ހޯދަން މި މޮޅު މުހިންމު ރޯލެއް ކުޅޭނެ ކަމަށެވެ.
މި ވަގުތު ގައުމީ ޓީމުގައި ތިބި ގިނަ ކުޅުންތެރިންނަކީ ބަކާއާ އެކު ކްލަބް ލެވަލްގައި އަދި ގައުމީ ޓީމުގައި ވެސް ކުޅެފައިވާ ކުޅުންތެރިންނެވެ. އަދި ގައުމީ ޓީމުގެ ކޯޗު އަލީ ސުޒޭން ވަނީ ބަކާއާ އެކު ގިނަ އަހަރުތަކެއް މަސައްކަތްކޮށްފަ އެވެ.
ރާއްޖޭން ސަރަހައްދުގެ ޗެމްޕިއަންކަން ދެ ފަހަރު ހޯދިއިރު ވެސް ޓީމުގައި ހިމެނޭ ބަކާ ނިޔާވީ ހައްޖުގެ އަޅުކަން އަދާކުރުމަށް ފަހު މާލެ އައިސް މާގިނަ ދުވަސްތަކެއް ނުވަނީހެވެ. މާލެ އައި ފަހުން ހުން ގަދަވެ، ހާލު ދެރަވާތީ އޭޑީކޭ ހޮސްޕިޓަލަށް ދެއްކުމުން އެނދުމަތިކޮށް އައިސީޔޫގައި ފަރުވާ ދޭން ފެށީ އެވެ.
ބަކާ ވަނީ ރާއްޖޭގެ ފުރަތަމަ ޑިވިޝަނުގައި ގިނަ ކްލަބްތަކަކަށް ކުޅެފަ އެވެ. އޭގެ ތެރޭގައި، ނިއު ރޭޑިއަންޓް ސްޕޯޓްސް ކްލަބް، ވިކްޓަރީ ސްޕޯޓްސް ކްލަބް، ކްލަބް ވެލެންސިއާ، ވީބީ އައްޑޫ އެފްސީ، ކްލަބް އީގަލްސް، ކްލަބް ގްރީން ސްޓްރީޓްސް އަދި މާޒިޔާ ސްޕޯޓްސް އެންޑް ރެކްރިއޭޝަން ހިމެނެ އެވެ. އޭނާ ވަނީ މިޔަންމާގެ ކޭބީޒެޑް އަށް ވެސް ކުޅެފަ އެވެ.
ބަކާ، އެންމެ ފަހުން ގައުމީ ޓީމަށް ކުޅެފައިވަނީ، 2021 ވަނަ އަހަރު، ސާފް ޗެމްޕިއަންޝިޕަށް ނެގި ޕްރިލިމިނަރީ ސްކޮޑުގައި ހިމެނިގެންނެވެ.
