އެމްޑީޕީގެ ޗެއާޕާސަން ފައްޔާޒު އިސްމާއިލް އާއި އެ ޕާޓީގެ ރައީސް އަބްދުﷲ ޝާހިދުގެ އިތުރުން ކުރީގެ ރައީސް އިބްރާހިމް މުހައްމަދު ސޯލިހު ހިމެނޭހެން އެމްޑީޕީގެ ލީޑަރުން ހައްޔަރު ކުރަން މަޑަވެލި ދާއިރާގެ ޕީއެންސީ މެންބަރު، މުހައްމަދު ޝަމީޒު ގޮވާލައްވައިފި އެވެ.
ބަޖެޓު ބަހުސްގައި ބައިވެރިވެ ވާހަކަ ދައްކަވަމުން ޝަމީޒު ތުހުމަތު ކުރެއްވީ ރާއްޖޭގެ ދެކުނުން އޮންނަ ޗާގޯސް އާކިޕެލަގޯގެ ރަށްތައް ކުރީ ސަރުކާރުން ވިއްކައިލި ކަމަށެވެ. އަދި އެއީ ރޯމާދުވާލު ކުރި ބޮޑު ވައްކަމެއް ކަމަށާއި އެކަން ކުރި ބަޔަކު ހައްޔަރު ކުރަންޖެހޭނެ ކަމަށް ޝަމީޒު ވިދާޅުވި އެވެ.
"އިއްޒަތްތެރި ރައީސް މިކަން ކުރި މީހުން ހިފައި ހައްޔަރު ކުރަން އަޅުގަނޑު ގޮވައިލަން، އަބްދުﷲ ޝާހިދު ހައްޔަރު ކުރަންވީ، އިބްރާހިމް މުހައްމަދު ސޯލިހު ހައްޔަރު ކުރަންވީ، ފައްޔާޒު ހައްޔަރު ކުރަންވީ، ފިނޭންސް މިނިސްޓަރަކަށް ހުރި އަމީރު ހައްޔަރު ކުރަންވީ، ކީއްވެތޯ ގާނޫނު ތަންފީޒު ނުކުރެވެނީ އިއްޒަތްތެރި ރައީސް، ގާނޫނު ތަންފީޒު ކުރެވެން ޖެހޭނެ،" ޝަމީޒު ވިދާޅުވި އެވެ.
ޗާގޯސް އާކިޕެލަގޯގެ ރަށްތައް ކުރީ ސަރުކާރުން ވިއްކައިލި ކަމަށް ވެރިކަން ކުރާ ޕީއެންސީން ތުހުމަތު ކުރާއިރު، ޗާގޯސްގެ މިލްކުވެރިކަމަށް ރާއްޖެއިން ދުވަހަކު ވެސް ދައުވާ ކޮށްފައެއް ނުވެ އެވެ. ނަމަވެސް ޗާގޯސްގެ ސިޔާދަތީ ބާރުގެ މައްސަލައަކީ ޒަމާނުއްސުރެ ފެންމަތިވެފައި އޮންނަ މައްސަލައެކެވެ.
ރާއްޖެ އާއި ޗާގޯސް އާކިޕެލަގޯ އާ ދެމެދުގެ އިން ކަނޑަނާޅައި އޮތީ އެ މައްސަލަ އާ ގުޅިގެންނެވެ. ޗާގޯސްގެ ސިޔާދަތީ ބާރަުވެރިކަމަށް ދައުވާކޮށް އިންޓަނޭޝަނަލް ކޯޓް އޮފް ޖަސްޓިސްއިން ކާމިޔާބު ހޯދި މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އަށް އިމުގެ މައްސަލަ ހުށަހެޅީ އިން ކަނޑައަޅަން ފަށާނެ ހިސާބެއް ފާހަގަ ކުރުމަށެވެ.
އިޓްލޮސްއިން އެ މައްސަލަ ނިންމީ ރާއްޖެއިން ބޭނުންވި ގޮތަށް ރާއްޖޭގެ ކަނޑުގެ ސަރަހައްދެއް ނުގެއްލޭ ގޮތަށެވެ.
