ގައުމީ ފުޓްބޯޅަ ޓީމަށް އަހަރެއް ފަހުން ކުޅެލަން ލިބުނު ބައިނަލްއަގުވާމީ މެޗުތަކުގައި ބަންގްލަދޭޝާ ދެކޮޅަށް ކުޅޭއިރު، މި މެޗުތައް ކުޅެން ލިބުނު ފުރުސަތުގެ ބޭނުންހިފަން ކުޅުންތެރިން ތައްޔާރަށް ތިބި ކަމަށް ގައުމީ ޓީމުގެ ކެޕްޓަން، ސަމޫހު އަލީ (ސަމުއްޓެ) ބުނެފި އެވެ.
ފީފާ ރެޖިސްޓާޑް އެކުވެރިކަމުގެ ދެ މެޗުގައި ހަތަރު ދުވަސް ތެރޭ ރާއްޖޭން ދެ ފަހަރު ބަންގްލަދޭޝާ ކުޅޭއިރު، އޭގެ ތެރެއިން ފުރަތަމަ މެޗު އޮންނާނީ މިއަދު ހަވީރު އެވެ. އެ މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ސުވާލަކަށް ޖަވާބުދެމުން ގައުމީ ކެޕްޓަން ސަމުއްޓެ ބުނީ، މި މެޗަށް ތައްޔާރުވާއިރު، ގައުމީ ޓީމުގެ ރޫހު ރަނގަޅު ކަމަށެވެ.
"ޓީމުގެ ކުޅުންތެރިން ތިބީ މި މެޗަށް ވަރަށް ބޮޑަށް ތައްޔާރުވެފައި ވަރަށް ގިނަ ދުވަސްތަކެއް ފަހުން ގައުމީ ޓީމު މެޗެއް ކުޅެލަން މި ލިބުނީ، ހުރިހާ ޕްލޭޔަރުން ވެސް ބޭނުންވަނީ މި މެޗުން މޮޅުވާން. މި މެޗުތަކުން މޮޅުވެގެން އެނބުރި ރާއްޖެ ދިއުމަށް،" ސަމުއްޓެ ބުންޏެވެ.
ގައުމީ ފުޓްބޯޅަ ޓީމުން އެންމެ ފަހުން މެޗެއް ކުޅެފައިވަނީ، މިދިޔަ އަހަރުގެ އޮކްޓޫބަރު މަހު، ފީފާ ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިންގަ އެވެ. އެ ދެ މެޗުގައި އަނިޔާގެ ސަބަބުން ސަމުއްޓެ ނުކުޅެ އެވެ. އެހެންކަމުން، މި ފަހަރުގެ ބަންގްލަދޭޝް މެޗުތަކަކީ، ސަމުއްޓެ، ގައުމީ ޓީމަށް މެޗެއް އަލުން ކުޅެން ކުރި އިންތިޒާރު އެހެން ސީނިއާ ކުޅުންތެރިންނަށް ވުރެ ދިގުވާނެ ސަބަބެކެވެ.
ބަންގްލަދޭޝް މެޗުގެ ކުރިން، ގައުމީ ކޯޗު އަލީ ސުޒޭން، އެންމެ ބޮޑަށް ފާހަގަކުރި އެއް ކަމަކީ، ރާއްޖޭގެ ފުރަތަމަ ޑިވިޝަންގެ ފުޓްބޯޅަ ހުއްޓިފައި އޮންނަތާ އަހަރެއްހާ ދުވަސްވާން ގާތްވެފައިވާއިރު، އެ ވާހަކަ ދެއްކުމަށް ވުރެ ޕޮޒިޓިވްކޮށް ހުރި ކަންކަން ފާހަގަކޮށް ހިތްވަރު ހޯދުމަށެވެ. އެ ގޮތުން، ރާއްޖޭގެ އެކި ސަރަަހައްދުތަކުގައި ބޭއްވި މުބާރާތްތަކުގައި ގައުމީ ޓީމުގެ ކުޅުންތެރިން ކުޅެފައިވާކަން ސުޒޭން ފާހަގަކުރިއިރު، ސަމުއްޓެ ވެސް ވަނީ އެ އަށް އަލި އަޅުވާލައިފަ އެވެ.
"ކޯޗު ބުނިގޮތަށް ބައިވަރު ޕްލޭޔަރުން ރަށްރަށުގެ މުބާރާތްތަކުގައި ކުޅެފައިތިބީ، އަންނާނެ އުނދަގޫތައް. އެ އުނދަގޫތައް އެއް ފަރާތެއްގައި ބެހެއްޓުމަށް ފަހު އިރާދަކުރެއްވިއްޔާ އަޅުގަނޑުމެން މަސައްކަތް މި ކުރަނީ ކުރެވެން ހުރި ކަމެއް ކޮށްގެން މި މެޗުން މޮޅުވާން،" ހުރި އުނދަގޫތަކަށް އިޝާރާތްކޮށް ސަމުއްޓެ ބުންޏެވެ.
ސަމުއްޓެ އަކީ ގައުމީ ޓީމުގެ މެޖޯރިޓީ އެ ކްލަބަކަށް ނިސްބަތްވާ މާޒިޔާ ސްޕޯޓްސް އެންޑް ރެކްރިއޭޝަންގެ ވެސް ލީޑަރެކެވެ. މާޒިޔާ އިން ވަނީ ދާދި ފަހުން އޭއެފްސީ ޗެލެންްޖް ލީގުގައި ވާދަކޮށްފަ އެވެ. ގައުމީ ޓީމުގައި މާޒިޔާ 14 ކުޅުންތެރިން ހިމެނޭއިރު، ސަމުއްޓެ ދެކޭގޮތުގައި އޭގެއިން ވެސް ޕޮޒިޓިވް ކަންކަން އެބަހުއްޓެވެ.
ބަންގްލަދޭޝާއި ރާއްޖެ ކުޅޭ މެޗު ފަށާނީ މިއަދު 17:00 ގަ އެވެ.
