ލިޒްބަން (ނޮވެމްބަރު 12) - ސްޕޯޓިން ލިޒްބަން އަށް ކުޅެމުން އަންނަ ސްވިޑެންގެ ފޯވާޑް ވިކްޓޯ ޔޯކެރޭޝް ވިއްކާނީ، އޭނާގެ ކޮންޓްރެކްޓް ގަންނަން ދައްކަން ޖެހޭ ފީ ކަމަށްވާ 100 މިލިއަން ޑޮލަރު ދިނުމުން ކަމަށް ސްޕޯޓިން އިން ބުނެފި އެވެ.
ސްޕޯޓިންގެ ކޯޗު، ރުބެން އަމޮރިމް އާއި އޭނާގެ ކޯޗިން ސްޓާފުން ވަނީ މެންޗެސްޓާ ޔުނައިޓެޑަށް ބަދަލުވެފަ އެވެ. ޖެނުއަރީ ޓްރާންސްފާގައި، ސްޕޯޓިންގެ ތަރި، ޔޯކެރޭޝް، 26، ވެސް އެ ކްލަބް ދޫކޮށްލާނެ ކަމަށް މީޑިއާ ރިޕޯޓްތައް ބުނާއިރު، އޭނާ ޔުނައިޓެޑަށް ގެންދަން އުޅޭ ކަމުގެ އަޑުވެސް ވަނީ ފެތުރިފަ އެވެ.
މި ވާހަކަތަކާ ގުޅޭގޮތުން އަމާޒުވި ސުވާލަކަށް ސްޕޯޓިންގެ ރައީސް ފެޑެރީކޯ ވަރަންޑާސް ވިދާޅުވީ، ޓްރާންސްފާއާ ގުޅޭ ކަންތައްތަކާ ބެހޭގޮތުން އެއްވެސް ޔަގީންކަމެއް ނުދެވޭނެ ކަމަށެެވެ.
"ކްލަބަކުން އައިސް އޭނަ (ޔޯކެރޭޝް)ގެ ރިލީސް ކްލޯސް (ކޮންޓްރެކްޓް ގަންނަން ދައްކަން ޖެހޭ ފީ) 100 މލިއަން ޑޮލަރު ދޭން އެއްބަސްވެއްޖެނަމަ، އޭނަ ދާން ބޭނުންވިއްޔާ ދެވޭނެ، ހުއްޓުވޭނެ ގޮތެއް ނެތް،" ވަރަންޑާސް ވިދާޅުވި އެެވެ.
އެކަަމަކު، ވަރަންޑާސް ދެކޭގޮތުގައި، ޖެނުއަރީ ޓްރާންސްފާގައި ކްލަބަކަށް އެ ވަރު އިންވެސްޓް ކުރުމަކީ ފަސޭހަކަމަކަށް ނުވާނެ އެވެ.
އިނގިރޭސި ދެ ވަނަ ޑިވިޝަނުގެ ކަވެންޓްރީ ސިޓީ އަށް 25 މިލިއަން ޑޮލަރު ދީފައި ސްޕޯޓިން ޔޯކެރޭޝް ގަތީ މިިދިޔަ އަހަރުގެ ޖުލައި މަހުގަ އެވެ. އޭނާ، ސްޕޯޓިންއާ އެކު ސޮއިކުރީ ފަސް އަހަރުގެ ކޮންޓްރެކްޓެއްގަ އެވެ. ޔޯކެރޭޝް މިހާތަނަށް ސްޕޯޓިން އަށް ކުޅެދިން 68 މެޗުން 66 ލަނޑު ޖަހައި، 19 ލަނޑު ޖަހަން ފުރުސަތު ތަނަވަސްކޮށްދީފައިވެ އެވެ.
ދާދި ފަހުން ޗެމްޕިއަންސް ލީގުގައި މެންޗެސްޓާ ސިޓީ ކޮޅަށް ހެޓްރިކް ހެދި ޔޯކެރޭޝް މި ސީޒަނުގައި ވަނީ، 18 މެޗުން 23 ގޯލު ޖަހައި، ހަތަރު ލަނޑު ޖަހަން ފުރުސަތު ހޯދައިދީފަ އެވެ.
