ސަރުކާރުގެ މިސްރާބު ރަސްކަމަކާ ދިމާލަށް ދާތަން ފެންނަ ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒް އިސްމާއިލް ރޭ ވިދާޅުވެއްޖެ އެވެ.
އެމްޑީޕީން ބޭއްވި ހަރުގެ ޖަލްސާގައި ފައްޔާޒް ވިދާޅުވީ ސަރުކާރުން ނަގާނެ ކަމަށް އިއުލާން ކޮށްފައިވާ ދެ ފެންނަ ނުފެންނަ ވޯޓަކީ ރައީސް ޑރ. މުހައްމަދު މުއިއްޒުގެ "ނުބައި ރޭވުމުގެ ތެރެއިން" ރަސްކަމަކަށް ވެރިކަމުގެ ނިޒާމު ބަދަލު ކުރަން ކުރަމުންދާ މަސައްކަތެއް ކަމަށެވެ.
"މިހާރު އަޅުގަނޑުމެންނަށް ފެނިގެން މިދަނީ މި ގައުމު ވަރަށް ނުބައި ދިމާލަކަށް ގެންދާތަން. އަޅުގަނޑުމެން އެއް އަހަރު ދުވަސްވަންދެން ޒިންމާދާރު އިދިކޮޅު ޕާޓީއެއްގެ ރޯލު އަދާކޮށްފިން. ސަރުކާރަށް ރައްޔިތުން ދިން މެންޑޭޓާ އެއްގޮތަށް ވެރިކަން ކުރުމަށް ޖާގަ ދީފިން ތަންމިނަށް އަޅުގަނޑުމެން،" ފައްޔާޒް ވިދާޅުވި އެވެ.
"ރައްޔިތުންނަށް ވީ ވައުދުތައް އުނބަށް ޖަހަމުންދާއިރުގައި ވަރަށް ކެތްތެރިކަމާ އެކު މިތިބީ. މިހާރު އެހެން ނަމަވެސް މި ދާން މިއުޅެނީ ވިރާސީ ވެރިކަމަކާ [ރަސްކަމަކާ] ދިމާލަށް. ރޭގައި އިއުލާން ކުރެވިގެން އެ ދިޔަ ރައްޔިތުންނާ ހިސާބަށް ގެންދާ ދެ ރިފަރެންޑަމްއަކީ މިކަން މުޅިން އެގޮތަށް ބަދަލު ކުރުމަށް ޑރ. މުއިއްޒުގެ ނުބައި ރޭވުމުގެ ތެރެއިން ކުރާ ކަމެއް ކަމަށް އަޅުގަނޑަށް އެއްވެސް ޝައްކެތް ނެތް."
ފައްޔާޒް ވިދާޅުވީ ސަރުކާރުން ވެރިކަމަށް އައުމުގެ ކުރިން ދެއްކި މެނިފެސްޓޯއާ ތަފާތު މެނިފެސްޓޯއެއްގެ ވާހަކަ މިހާރު ދައްކަމުންދާކަން ފާހަގަކުރައްވާ ފައްޔާޒް ވިދާޅުވީ ހަރަދު ކުޑަ ކުރުމަށް ކަމަށް ބުނެ މަޖިލިސް އިންތިހާބާއި ރިޔާސީ އިންތިހާބު އެއްކޮށްލަން އުޅެނީ ފާރަވެރި ދައުލަތެއްގެ ސިފަ ގެއްލުވާލަން ކަމަށެވެ.
ސަރުކާރުން ބޭނުންވަނީ ފައިސާ އާއި ބާރާއި ނުފޫޒުގެ ތެރެއިން ވެރިކަމާއި މަޖިލިސް އެއްކޮށް ނިގުޅައިގަންނަން ކަމަށާއި އެއީ އެއްގޮތަކަށް ވެސް ދޫކޮށްލައިގެން ތިބެވޭ ވަރުގެ ކަންތައްތަކެއް ނޫން ކަމަށް ފައްޔާޒް ވިދާޅުވި އެވެ.
ފައްޔާޒްގެ އިތުރުން ކުރީގެ ރައީސް އަބްދުﷲ ޔާމީން ވެސް ވަނީ ރައީސް މުއިއްޒުގެ މިސްރާބު މިހާރު ހުރީ ރަސްކަމަކާ ދިމާލަށް ކަމަށް ވިދާޅުވެފަ އެވެ.
