އަންނަ އަހަރަށް ލަފާކުރާ 56 ބިލިއަން ރުފިޔާގެ ބޮޑު ބަޖެޓާ ގުޅޭ ބަހުސް ރައްޔިތުންގެ މަޖިލީހުގައި މިއަދު ފަށާއިރު ވެސް، އަންނަ އަހަރަށް ރާވާފައިވާ ބަޖެޓުގެ ތަފުސީލާއި ރަށްރަށުގައި ހިންގާ މަޝްރޫއުތަކުގެ ތަފުސީލު ހާމައެއްނުކުރި އެވެ.
އޮކްޓޯބަރު 31، 2024، ގައި ފިނޭންސް މިނިސްޓަރު މޫސާ ޒަމީރު މަޖިލީހަށް ހުށަހެޅި 2025 ގެ ބަޖެޓު ތައްޔާރު ކުރުމަށްފަހު އެހެން އަހަރުތަކާ ހިލާފަށް، ވަކިވަކި މަޝްރޫއުތަކާއި ރަށްރަށަށް ހާއްސަކޮށް ކުރަން ރާވާފައިވާ ކަންކަމުގެ ތަފުސީލެއް ނުހިމަނަ އެވެ.
ބަޖެޓުގެ ތަފުސީލު ނެތުމުން އިދިކޮޅު މެންބަރުން ދިޔައީ އެކަމާ ކަންބޮޑުވުން ފާޅުކުރަމުންނެވެ.
ރައްޔިތުންގެ މަޖިލީހުގައި އިދިކޮޅު ޕާޓީ، އެމްޑީޕީ ތަމްސީލުކުރާ ބައެއް މެންބަރުން "އަދަދު" ނޫހާ ވާހަކަ ދައްކަވަމުން ވިދާޅުވީ މިއަދު ބަޖެޓަށް ބަހުސް ފަށާއިރު، ތަފްސީލު ނޭނގޭތީ އިންތިހާ އަށް ކަންބޮޑުވާ ކަމަށެވެ.
"މަޖިލީހަށް މިހާރު ފޮނުވާފައިވާ ބަޖެޓު ފޮތުގައި ވެސް މަޝްރޫއުތަކާއި ރަށްރަށުގައި ހިންގާ މަޝްރޫއުތަކުގެ ތަފުސީލެއް ނެތް. މިއީ ދުވަހަކު ވެސް ފިނޭންސް މިނިސްޓްރީން ބަޖެޓު ހުށަހެޅި ގޮތެއް ނޫން. މިއީ ބޮޑު އޮޅުވައިލުމެއް އެ މައުލޫމާތަކީ ރައްޔިތުންނަށް، ރައްޔިތުންގެ މަންދޫބުންނަށް ވެސް އެނގެންޖެހޭ މައުލޫމާތު،" ހުޅުމާލޭ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވިދާޅުވި އެވެ.
އަންނަ އަހަރުގެ ބަޖެޓުގެ ތަފްސީލު ހާމަކުރަން ސަރުކާރުން ބޭނުން ނުވާ މައިގަނޑު ސަބަބަކީ، ހިނގަމުން މިދާ އަހަރުގެ ހަރަދުކުރި ގޮތް ފޮރުވުމަށް ކަމަށް އޭނާ ވިދާޅުވި އެވެ.
ބަޖެޓުން ހަރަދުކުރާ ގޮތުގެ ތަފްސީލު ރައްޔިތުންގެ މަޖިލީހުގެ މެންބަރުންނަށް ނުދޭއިރު، ބަޖެޓު.ގޮވް.އެމްވީ އިން ބަޖެޓުގެ މައި ފޮތަށް ވެސް ނުވަދެވެ އެވެ. ކުރިން އެ ވެބްސައިޓު ޑައުންކޮށްފައި ހުއްޓަސް މިހާރު ބައެއް މައުލޫމާތަށް ވަދެވެ އެވެ.
