އެމަނިކުފާނު ޖަލަށް ލެވިދާނެ ކަމަށް މި ސަރުކާރުގެ ވެރިން ހީކުރެއްވުމަކީ އެ ބޭފުޅުން ކުރައްވާ ކުށްހީއެއް ކަމަށް ކުރީގެ ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.
ޕީއެންއެފް އޮފީހުގައި ބޭއްވި ޖަލްސާގައި ޔާމީން ވިދާޅުވީ ދައުލަތުން ދައުވާ އުފުލާފައިވާ ދެ މައްސަލައިގައި ވެސް، ކުރީގެ ނައިބު ރައީސް އަހުމަދު އަދީބުގެ ދެއްވާފައިވާ ބަޔާނަށް ބާރު ދޭ އިތުރު އެއްވެސް ހެއްކެއް ނެތް ކަމަށެވެ.
އެހެންވެ، ފަނޑިޔާރުން ގޯހެއް ނުހަދާ ނަމަ، ރައީސުލްޖުމްހޫރިއްޔާ ބޭނުން ވިޔަސް އެ މަނިކުފާނު ޖަލަށް ލެވޭނެ ގޮތެއް ނެތް ކަމަށް އެމަނިކުފާނު ވިދާޅުވި އެވެ.
"ރައީސް ޔާމީން ޖަލަށް ލެވިދާނެ ކަމަށް ހީކުރާ ހީކުރުމަކީ ހަމަ ކުށް ހީއެއް. އެއީ ރައީސުލްޖުމްހޫރިއްޔާ އަންގައިގެން އަދި އެކަން ވެދާނެ ކަމަކަށް އަޅުގަނޑު ގަބޫލެއް ނުކުރަން އިނގޭތޯ،" 2013-2018 އަށް ވެރިކަން ކުރެއްވި ޔާމީން ވިދާޅުވި އެވެ.
"އެއަށް ވުރެ ބޮޑަށް އަޅުގަނޑުގެ އިތުބާރު އޮވޭ އިސްތިއުނާފު ކޯޓުތަކުގެ ފަނޑިޔާރުންނަށް. އިސްތިއުނާފު ކޯޓުތަކުގެ ފަނޑިޔާރުން ގޯސް ހައްދަވައިފި ކަމަށް ވަންޏާ އެކަން ވެދާނެ. އެހެން ނޫނީ އެކަން ވާނެ ގޮތަކީ ނެތް ގޮތެއް. އެއީކީ ވާނެ ކަމެއް ނޫން."
ޔާމީންގެ މައްޗަށް ދައުވާ އުފުލާފައި ވަނީ އެ މަނިކުފާނުގެ ވެރިކަމުގައި، ރިސޯޓު ތަރައްގީކުރަން އެމްއެމްޕީއާރުސީ މެދުވެރިކޮށް ވިއްކާފައިވާ ދެ ރަށް ކަމުގައިވާ ވ. އާރަށް، އަދި ރ. ފުއްގިރީގެ މުއާމަލާތުގައި ހިންގި ކަމަށް ތުހުމަތު ކުރާ ހިޔާނާތުގެ މައްސަލަ އެވެ.
ވ. އާރަށުގެ މައްސަލައިގައި ކްރިމިނަލް ކޯޓުން ޔާމީނުގެ މައްޗަށް 11 އަހަރުގެ ޖަލު ހުކުމެއް 2022، ގައި އިއްވި އެވެ.
އެ މަނިކުފާނަށް ރިޔާސީ އިންތިހާބުގައި ވާދަ ނުކުރެއްވުނީ އެ ހުކުމް ދެމިއޮތުމުންނެވެ.
ނަމަވެސް، އޭޕްރީލް 18، 2024 ގައި ހައިކޯޓުން އެ ކުމް ބާތިލުކޮށް، އަލުން މައްސަލަ ބަލަން ކްރިމިނަލް ކޯޓަށް އެންގުމާއެކު ޔާމީން މިނިވަންވި އެވެ.
ޔާމީން ޖަލަށް ލުމަށް ކުރީ ހަރާމް ހުކުމެއް ކަމަށް، މި ސަރުކާރުގައި ތިއްބެވި ބޭފުޅުން އިދިކޮޅުގައި ތިއްބެވިއިރު ވިދާޅުވަމުން ދިޔަ އެވެ.
ނަމަވެސް މިހާރު ރައީސް ޑރ. މުހައްމަދު މުއިއްޒަށް އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި ޕީއެންސީގެ ބައެއް ވެރިންނަށް ޔާމީންގެ ވެރިކަން ވަނީ ގޯސްވެފަ އެވެ.
އާރަށުގެ އިސްތިއުނާފުގެ މައްސަލަ ހައިކޯޓުގައި ކުރިއަށް ގެންދިޔައިރު މި ސަރުކާރުގެ ވެރިން ނުފޫޒު ފޯރުވި ކަމަށް ޔާމީން ތުހުމަތު ކުރައްވާފައިވެ އެވެ.
ޔާމީންގެ މައްޗަށް ދައުވާ އުފުލާފައިވާ ދެ މައްސަލަ ކޯޓުގައި އޮތްއިރު، 2028 ގެ ރިޔާސީ އިންތިހާބުގައި ވާދަ ކުރައްވާނެ ކަމަށް އެމަނިކުފާނު ވަނީ އިއުލާނު ކުރައްވައިފަ އެވެ.
