މިލާން (ނޮވެމްބަރު 11) - އިޓާލިއަން ލީގުގެ އެންމެ ފަހުގެ ޗެމްޕިއަން، އިންޓަ މިލާނާއި މި ފަހަރުގެ ލީގު ތާވަލުގެ އެއް ވަނައިގައި މި ވަގުތު އޮތް ނަޕޯލީ ބައްދަލުކުރި މެޗު 1-1 އިން އެއްވަރުވެއްޖެ އެވެ.
މި ނަތީޖާއާ އެކު، އެއް ވަނައިގައި އޮތް ނަޕޯލީގެ ލީޑުވަނީ އެއް ޕޮއިންޓަށް ކުޑަވެފަ އެވެ. ނަޕޯލީ އަށް 12 މެޗުން 26 ޕޮއިންޓް ލިބިފައިވާއިރު، ދެ ވަނައިގައި އޮތް އެޓަލަންޓާ، ތިން ވަނައިގައި އޮތް ފިއޮރެންޓީނާ، ހަތަރު ވަނައިގައި އޮތް އިންޓަ އަދި ފަސް ވަނައިގައި އޮތް ލާޒިއޯ އަށް ވަނީ 12 މެޗުން 25 ޕޮއިންޓް ލިބިފަ އެވެ.
ރޭގެ މެޗުތަކުން އެޓަލަންޓާ އިން 2-1 އިން އުދިނޭޒީ ބަލިކުރިއިރު، ފިއޮރެންޓީނާ އިން ވަނީ 3-1 އިން ވެރޯނާ އަތުން މޮޅުވެފަ އެވެ. ޓޮރިނޯ އަތުން 2-0 އިން މޮޅުވި ޔުވެންޓަސް އޮތީ ހަ ވަނައިގަ އެވެ. އެއީ، 12 މެޗުން 24 ޕޮއިންޓާ އެކު އެވެ. މި ހަފްތާގައި ކަލިއަރީއާ 3-3 އިން އެއްވަރުވި މިލާން، ހަތް ވަނައިގައި އޮތީ 12 މެޗުން 18 ޕޮއިންޓް ހޯދައިގެންނެވެ.
އިންޓަ ދަނޑުގައި ރޭ 23 ވަނަ މިނިޓްގައި ނަަޕޯލީ އަށް ލީޑުނަގައިދިނީ ސްކޮޓް މެކްޓޮމިނޭ އެވެ. މިއީ އޭރިއާތެރެއިން ލިބުނު ފުރުސަތަކުން މެކްޓޮމިނޭ ޖެހި ގޯލެކެވެ. މިއީ، މި ފަހަރު ނަޕޯލީ އަށް ބަދަލުވި ފަހުން އޭނާ ޖެހި ތިން ވަނަ ގޯލެވެ.
ފުރަތަމަ ހާފު ނިމުމުގެ ކުރިން، އިންޓަ އިން އެއްވަރުކުރީ އޭރިއާބޭރުން ހަކަން ޗަނޮނޮގްލޫ ޖެހި ގޯލުންނެވެ. ދެ ވަނަ ހާފުގައި އިންޓަ މޮޅުކޮށްދޭން ޗަނޮނޮގްލޫ އަށް ޕެނަލްޓީ އަކުން ލިބުނު ފުރުސަތުގެ ބޭނުމެއް ނުހިފުނެވެ. މީގެ ކުރިން ފޮނުވާލި 19 ޕެނަލްޓީ ވެސް ކާމިޔާބުކުރި، ޗަނޮނޮގްލޫ މި ފަހަރު ފޮނުވާލި ބޯޅަ އަމާޒުވީ ދަނޑިއަށެވެ.
ނަޕޯލީ މޮޅުކޮށްދޭން ޖިއޮވާނީ ސިމިއޯނީ ފަހު ވަގުތު ރަނގަޅު ހަމަލާއެއް ފޮނުވާލި ނަމަވެސް ކާމިޔާބެއްނުވި އެވެ.
