ވެރިކަމަކީ ވެރިކަން ކުރާ މީހާއަށް ލިބޭ މޮޅެއް ނުވަތަ މުދާގަނޑެއް ނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ޖުމްހޫރީ ދުވަހުގެ މުނާސަބަތުގައި ބާއްވާ ޖަލްސާގައި ވާހަކަ ދައްކަވަމުން ރައީސް ވިދާޅުވީ ވެރިކަމަކީ ވަރުގަދަ ޒިންމާއެއް، މަސްއޫލިއްޔަތެއް އަދި ބޮޑު އަމާނާތެއް ކަމަށެވެ.
"ވެރިކަމަކީ އެއްވެސް ހާލެއްގައި ލިބޭ މާބޮޑު މޮޅެއް ނޫން. އެއީކީ ވެރިކަން ކުރާ މީހާއަށް ލިބޭ މުދާގަނޑެއް ވެސް ނޫން. އެއާ ހިލާފަށް ވެރިކަމަކީ ވަރުގަދަ ޒިންމާއެއް، ވަރުގަދަ މަސްއޫލިއްޔަތެއް، ވަރަށް ބޮޑު އަމާނާތެއް،" ރައީސް ވިދާޅުވި އެވެ.
މިރޭގެ ޖަލްސާގައި ރައީސް ވަނީ، އެމަނިކުފާނުގެ ބައްޕާފުޅު ލިޔުއްވި "ދައުލަތާއި ވެރިންނާއި މަސްއޫލިއްޔަތު އަދި ކިޔަމަންވުމުގެ މަފްހޫމް" ފޮތުން ބައެއް ބައިތައް ވިދާޅުވެފަ އެވެ. އަދި ވިދާޅުވީ "އަޅުގަނޑުގެ ގައިޑްބުކަކީ މި ފޮތް" ކަމަށެވެ.
މިރޭގެ ޖަލްސާގައި ރައީސް ވަނީ ބައެއް މުހިންމު މައްސަލަތައް ހައްލު ކުރަން ސަރުކާރުން މަސައްކަތް ފަށާފައިވާ ކަމަށް ވިދާޅުވެފަ އެވެ. އެގޮތުން ޑޮލަރުގެ ކަޅު ބާޒާރު ވަކި ބައެއްގެ އަތްމަތީގައި އޮތް އޮތުން ނިމުމަކަށް މިހާރު ގެނެސްފައިވާނެ ކަމަށް ވެސް އެމަނިކުފާނު ވިދާޅުވި އެވެ.
"މިތަނުގައި ވަކި ބައެއްގެ ބާރުގެ ދަށުގައި ޑޮލަރުގެ ކަޅު ބާޒާރު އޮތް އޮތުން ނިމުމަކަށް ގެނެސް ރައްޔިތުންނަށް ޑޮލަރުގެ މުއްސަނދިކަން ގެނެސްދިނުމަށް ނިންމީ،" ރައީސް މުއިއްޒު ވިދާޅުވި އެވެ.
ރާއްޖޭގައި މަސައްކަތް ކުރާ އަންޑޮކިއުމެންޓެޑް ވޯކާސްގެ ވާހަކަ ވެސް ރައީސް މިރޭގެ ޖަލްސާގައި ފާހަގަ ކުރެއްވި އެވެ. އެކަންތައް ހައްލު ކުރަން ތެދުވެވަޑައިގަތީ ރައްޔިތުންނަށްޓަކައި ކަމަށް ރައީސް މުއިއްޒު ވިދާޅުވި އެވެ.
"މިތަނުގައި ބޭރުގެ މީހުން ނުގަވައިދުން ގެނެސް އެތައް ޒަމާނެއްގެ އިލީގަލް ވޯކާސް އެތައް ލައްކައެއް އެބަތިބި. މި މައްސަލަ ހައްލު ކުރަން ވެސް ތެދުވީ އަޅުގަނޑުމެން އެހެންވެގެން،" އެމަނިކުފާނު ވިދާޅުވި އެވެ.
ރައީސް އެދިވަޑައިގަތީ ގައުމުގައި ހުރި އެފަދަ ބޮޑެތި މައްސަލަތައް ހައްލު ކުރަން ރައްޔިތުންގެ އެއްބާރުލުމަށެވެ. އަދި ވިދާޅުވީ އެ އެއްބާރުލުން އެމަނިކުފާނަށް ލިބިވަޑައިގެންވި ނަމަ އެ ހުރިހާ މައްސަލަތަކެއް ވެސް ހައްލު ކުރައްވާނެ ކަމަށެވެ.
"ރައްޔިތުންގެ ފަޅީގައި ތިބެގެން މި ބުރަ، އުނދަގޫ ބޮޑު މައްސަލަތައް ރައްޔިތުންނަށްޓަކައި ހައްލުކޮށްދިނުމަށްޓަކައި މި ތެދުވީ. އަޅުގަނޑު ޔަގީން ކުރަނީ ރައްޔިތުން އަޅުގަނޑުމެންނާއެކުގައި މިކަމުގައި ތިއްބަވާނެ ކަމަށް ސާބިތުކަމާއެކީ،" ރައީސް ވިދާޅުވި އެވެ.
