ބަޖެޓުގެ ތާށިކަމާ ހުރެ، މި އަހަރުގެ ތެރޭގައި އަމަލީ ގޮތުން އިމާރާތް ކުރުމަށްފަހު ރައްޔިތުންނަށް ދެއްކޭނެ ތަނެއް ނެތް ކަމަށް ހައުސިން މިނިސްޓަރު ޑރ. އަލީ ހައިދަރު އަހުމަދު ރޭ ވިދާޅުވެއްޖެ އެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމުގައި ހައިދަރު ވިދާޅުވީ މި އަހަރު ތެރޭގައި މާ ބޮޑެތި ކަންތައްތައް ނުކުރެވުނީ ބޯހިޔާވަހިކަމަށް ކަނޑައެޅުނު ބަޖެޓް ކުޑަވުމުން ކަމަށެވެ. އަދި ބައެއް މަޝްރޫއުތަކަށް ޖަހާފައި ހުރީ މަސައްކަތް ކުރިއަށް ނުގެންދެވޭ ވަރުގެ ކުޑަ އަދަދެއް ކަމަށް އޭނާ ވިދާޅުވި އެވެ.
"އަޅުގަނޑުމެންނަށް މި އަހަރު ތެރޭގައި އަމަލީ ގޮތުން އަނެއްހެން އިމާރާތް ކޮށްފައި ދެއްކޭނެ މާ ބޮޑު ކަންތައްތަކެއް ކުރެވިފައެއް ނެތް. އެއީ އަޅުގަނޑުމެންނަށް ވާރުތަވެފައި އޮތީ ވަރަށް ނިކަމެތި ބަޖެޓެއް ބޯހިޔާވަހިކަމަށް ބަލައިފި ކަމަށް ވަންޏާ،" ހައިދަރު ވިދާޅުވި އެވެ.
މި އަހަރަށް ފާސްކުރި ބަޖެޓުގައި، ސަޕްލިމެންޓަރީ ބަޖެޓުން ރިވައިޒްކުރި އަދަދާއެކީ، މީހުން ދިރުއުޅޭ ގޮތަށް އިމާރާތްކުރާ ތަންތަނަށް ބަޖެޓުކޮށްފައި އޮތީ 856.9 މިލިއަން ރުފިޔާ އެވެ.
ހައިދަރު ވިދާޅުވީ ރައީސް ޑރ. މުހައްމަދު މުއިއްޒު ރާއްޖޭގެ މިނިވަން ކަމާއި އިސްތިގުލާލު ނަގާފައި ދެން އެންމެ ބޮޑު އިސްކަމެއް ދެއްވާ ކަމަކީ ބޯހިޔާވަހިކަން ކަމަށެވެ. އެ ގޮތުން ރައީސްގެ ބޯހިޔާވެހިކަމުގެ ވައުދު ފުއްދުމަށް އަންނަ އަހަރުގެ ބަޖެޓުގެ ޕީއެސްއައިޕީގެ ތެރެެއިން ދެބައިކުޅަ އެއްބައި ހާއްސަކުރީ ބޯހިޔާވަހިކަން ހައްލު ކުރުމަށް ކަމަށް އޭނާ ވިދާޅުވި އެވެ.
އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގައި މި ދާއިރާއިން 1.8 ބިލިއަން ރުފިޔާ ހަރަދުކުރަން ބަޖެޓުކޮށްފައި ވެ އެވެ. އަދި ކުޑަ އިންޓްރެސްޓުގައި ގެދޮރު ބިނާކުރަން ދޫކުރާ ލޯނަށް ދެ ބިލިއަނާއި ހަތަރު ބިލިއަނާ ދޭތެރޭގެ އަދަދެއް ބަޖެޓުކޮށްފައި ވާނެ ފިނޭންސް މިނިސްޓްރީން ބަޖެޓާ ގުޅޭ ގޮތުން ހިއްސާކުރި މައުލޫމާތުތަކުގައި ވެ އެވެ.
މިއީ ކުރިން އަހަރުތަކުގައި ބަޖެޓު ކުރި ވަރަށް ވުރެ ބޮޑު އަދަދުތަކެއް ނަމަވެސް ހައިދަރު އެ ވިދާޅުވާ ގޮތަށް ޕީއެސްއައިޕީގެ ދެބައި ކުޅަ އެއް ބަޔެއް ނޫނެވެ.
ހައިދަރު ވިދާޅުވި ގޮތުގައި މި ސަރުކާރުގެ ފަސް އަހަރުގެ ދައުރު ނިމޭއިރު 85،000 ހައުސިން ޔުނިޓް ގާއިމުކުރާނެ ކަމަށާއި އޭގެ ތެރޭގައި ގޯއްޗާއި ފްލެޓު ވެސް ހިމެނޭނެ އެވެ.
"85،000 ހައުސިން ޔުނިޓް ދޭ ކަމަށްވާންޏާ އަޅުގަނޑުމެން އެބަ ޖެހޭ ބަޖެޓުން ވެސް ރިފްލެކްޓްވާން. އެހެންވީމަ މި އަންނަ އަހަރުގެ ބަޖެޓުގައި 1.5 ބިލިއަން ކަނޑައަޅުއްވާފައި މިއޮތީ ބޯހިޔާވެހިކަމަށް. ހަމަ އެކަނި އިމާރާތް ކުރުމަށް. ބޯހިޔާވަހިކަން ތަރައްގީ ކުރުމަށް،" ހައިދަރު ވިދާޅުވި އެވެ.
ހައިދަރު ވިދާޅުވީ ބޯހިޔާވެހިކަމުގެ މައްސަލަ ހައްލު ވެގެންދާނީ އެކަމަށް ބޭނުންވާ ބަޖެޓާއި ޓެކްނިކަލް ގޮތުން ވެސް އެހީތެރިކަން ލިބިގެން ކަމަށެވެ. މި އަމާޒަށް ވާސިލުވާން ސަރުކާރުން ގިނަ މަސައްކަތްތަކެއް ކުރަމުންދާ ކަމަށް އޭނާ ވިދާޅުވި އެވެ.
