ސަރުކާރު ހަތް އާބަން ސެންޓަރު ކަނޑައެޅީ އެއްވެސް ބަޔަކާ މަޝްވަރާ ނުކޮށް ކަމަށް ވިދާޅުވެ، އެމްޑީޕީގެ ޗެއާޕާސަން ފައްޔާޒް އިސްމާއިލް އެކަމާ ކަންބޮޑުވުން ފާޅު ކުރައްވައިފި އެވެ.
ފައްޔާޒް "އެކްސް" ގައި ކުރެއްވި ޕޯސްޓެއްގައި ވިދާޅުވީ އެތައް ޖަލްސާއެއްގައި ވިދާޅުވެ މެނިފެސްޓޯގައި ވަރަށް ސާފުކޮށް ބަޔާންކުރިޔަސް ވެރިކަމަށް ވަޑައިގެން ރައީސް މުއިއްޒު ގިނަ ކަންކަން ކުރައްވަމުން ގެންދަވަނީ ސީދާ ވިދާޅުވި ގޮތާ އިދިކޮޅަށް، ލިޔެފައިވާ ގޮތާ ވެސް ހިލާފަށް ކަމަށެވެ.
"މިއަދު ސަރުކާރުން ހަތް ރަށެއް އާބަން ސެންޓަރުގެ ގޮތުގައި ތަރައްގީ ކުރަން އިއުލާނު ކުރީ އެއްވެސް މަޝްވަރާ ކުރުމެއް ނެތި، ރައްޔިތުންގެ ހިޔާލު ހޯދުމެއް ނެތި،" އޭނާ ވިދާޅުވި އެވެ.
އެގޮތުން ގައުމީ ތަރައްގީގެ 20 އަހަރުގެ މާސްޓާޕްލޭން ވެސް އެކުލަވާލާނީ ރައްޔިތުންގެ ހިޔާލު ނުހޯދައި، އެއްވެސް މަޝްވަރާ ކުރުމެއް ނެތި ކަމަށް ވެސް ފައްޔާޒް ވިދާޅުވި އެވެ.
ފައްޔާޒް ވިދާޅުވީ އެ ޕްލޭނާ އެއްގޮތަށް ވެސް ރައީސް މުއިއްޒުއަށް ކަންކަން ނުކުރެވޭނެކަން މިއަދު ދިވެހި ރައްޔިތުންނަށް ޔަގީންވާނެ ކަމަށާއި، އެމަނިކުފާނު ހުއްޓުމެއް ނެތި ހައްދަވަނީ ހުސް ދޮގު ކަމަށެވެ.
އަތޮޅުތައް ތަރައްގީ ކުރުމުގައި ހަތް ރަށެއް، އާބަން ސެންޓަރުގެ ގޮތުގައި ތަރައްގީ ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.
އެ ވައުދުގެ ދަށުން އާބަން ސެންޓަރުތައް ގާއިމު ކުރުމަށް ނިންމާފައި ވަނީ ރ. އުނގޫފާރު، ބ. އޭދަފުށި، ޅ.ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ، ލ. ފޮނަދޫގަ އެވެ.
ރައީސް މުއިއްޒު "އެކްސް" ގައި ކުރެއްވި ޕޯސްޓެއްގައި މިއަދު ވިދާޅުވީ ދެމެހެއްޓެނިވި ސަރަޙައްދީ ތަރައްގީގެ ސިޔާސަތުގެ ދަށުން މާލެ އާބަން ރީޖަންގެ އިތުރުން އެންމެ މަތީ ފަންތީގެ ހިދުމަތްތައް ހިމެނޭހެން، އެންމެ އުތުރުގެ ތިން އަތޮޅު ހިމެނޭހެން ނޮދަން އިންޓަގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ ހަތަރު އަތޮޅު ހިމެނޭހެން ސަދަން އިންޓަގްރޭޓަޑް ޑިވެލޮޕްމަންޓް ޒޯނެއް ތަރައްގީ ކުރާނެ ކަމަށެވެ.
