ޗައިނާ ސަރުކާރުން ރާއްޖެއަށް 80 ކޮމްޕިއުޓަރު ސިސްޓަމާއި 20 ލެޕްޓޮޕް މިއަދު ހަދިޔާކޮށްފި އެވެ.
ފޮރިން މިނިސްޓްރީގައި ބޭއްވި ރަސްމިއްޔާތެއްގައި އެ ކޮމްޕިއުޓަރުތަކާއި ލެޕްޓޮޕްތަކާ ރާއްޖޭގެ ފަރާތުން ހަވާލުވެވަޑައިގެންނެވީ ފޮރިން މިނިސްޓަރު ޑރ. އަބްދުﷲ ހަލީލް އެވެ. ޗައިނާގެ ފަރާތުން އެ އެއްޗެހި ހަވާލުކޮށްދެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަން ލީޝިން އެވެ.
އެ ރަސްމިއްޔާތުގައި ޑރ. ހަލީލް ވިދާޅުވީ އެ ކޮމްޕިއުޓަރުތަކާއި ލެޕްޓޮޕްތައް ހަދިޔާ ކުރެއްވީތީ ޗައިނާ ސަރުކާރަށް ޝުކުރު އަދާ ކުރައްވާ ކަމަށާއި އެ ހަދިޔާގެ ސަބަބުން ދެ ގައުމުގެ ގުޅުން އިތުރަށް ބަދަހިވެގެންދާނެ ކަމަށެވެ.
"ކޮމްޕިއުޓަރުތަކުން ސަރުކާރުގެ ޓެކްނިކަލް ޕާފޯމަންސް އިތުރުވެ، ރައްޔިތުންނަށް ހިދުމަތް ކުރުމަށް ފަސޭހަތަކެއް ވެގެންދާނެ،" ޑރ. ހަލީލް ވިދާޅުވި އެވެ.
އޭގެ އިތުރުން ރާއްޖެ އާއި ޗައިނާއާ ދެމެދު އިތުރު ދާއިރާތަކުން ވެސް ގުޅުން ބަދަހިކޮށް، ރައްޔިތުންގެ ފައިދާއަށް ކުރެވޭނެ ކަންތައްތަކެއް ހޯދަން ރާއްޖެއިން ވަނީ ހުށަހަޅާފަ އެވެ.
ޗައިނާއިން އަންނަނީ ރާއްޖެއަށް އަބަދުވެސް އެކި ގޮތްގޮތުން އެހީތެރިކަން ފޯރުކޮށްދެމުންނެވެ. އެގޮތުން މީގެ ކުރިން ވެސް ކޮމްޕިއުޓަރާއި ލެޕްޓޮޕްފަދަ އިލެކްޓްރޯނިކް ސާމާނު ހަދިޔާކޮށްފައިވެ އެވެ.
