މުރާބަހާ އާރްއެސްޑަބްލިއު ފައިނޭންސިން ފެސިލިޓީގެ ދަށުން ލޮނު ފެނުން މަސް ފިނި ކުރާ ނިޒާމު ގާއިމު ކުރަން ފައިނޭންސިން ލިބުނު 13 މީހަކަށް އެވޯޑް ލެޓާ ހަވާލުކޮށްފި އެވެ.
މިދިޔަ ސެޕްޓެމްބަރު 22، ގައި އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އާ ގުޅިގެން ހުޅުވާލި އެ ފުރުސަތުގައި ކުރިމަތިލި މީހުންގެ ތެރެއިން ލޯނު ހަމަޖެހުނު މީހުންނަށް އެވޯޑް ލެޓާ ހަވާލުކޮށްދެއްވީ ރައީސް ޑރ. މުހައްމަދު މުއިއްޒު އެވެ.
އެ ފެސިލިޓީގެ ދަށުން ނަގާ ތެކެތީގެ އަގުގެ 35 ޕަސަންޓު ސަރުކާރުން ދައްކައި، ރަހުނަކާ ނުލައި އެއްލައްކަ ރުފިޔާއިން ފެށިގެން ދެ މިލިއަން ރުފިޔާއާ ހަމައަށް އާރްއެސްޑަބްލިއު ސިސްޓަމަކާ ޖަނޭޓަރަކާ އަދި ސޯލާ ޕެނަލް ގަތުމަށް ފައިސާ ލިބެ އެވެ. އަދި އެސްޑީއެފްސީގައި ރަޖިސްޓްރީކޮށްފައިވާ ވެންޑަރެއް މެދުވެރިކޮށް އޮޑިވެރިން އަމިއްލައަށް ތަކެތި ގަތުމުގެ އިހްތިޔާރު ވަނީ ފަހިކޮށްދީފަ އެވެ.
މަސްވެރިން ބާނާ މަހަށް ބޭރު މާކެޓްތަކުގައި ލިބޭ އަގު ބިނާވަނީ މަހުގެ ތާޒާކަމާ މަހުގެ ކޮލިޓީއަށް ކަމަށާއި އެހެންކަމުން މަހުގެ ކޮލިޓީ ދެމެހެއްޓުމަށްޓަކައި މަސްވެރިން ބާނާ މަސް ކިރުވެންދެން ތާޒާކޮށް ބެހެއްޓުމަށް ދޯނިތަކުގައި މަސް ފިނިކުރެވޭނެ ނިޒާމް، ރެފްރިޖިރޭޓެޑް ސީވޯޓާ ސިސްޓަމްތައް ގާއިމުކުރުމަށް ފިޝަރީޒް މިނިސްޓްރީން ދަނީ މަސައްކަތްތަކެއް ކުރަމުން ކަމަށް ސަރުކާރުން ބުންޏެވެ.
އެ ރަސްމިއްޔާތުގައި ގއ. ކޫއްޑޫ ކޯލްޑް ސްޓޯރޭޖް އެކްސްޕެންޝަން ޕްރޮޖެކްޓްގެ އެއްބަސްވުމުގައި ލަކީ ގްލޯބަލް ޕްރޮޖެކްޓްސްއާ އެކު ވެސް ވަނީ ސޮއިކޮށްފަ އެވެ.
އެ އެއްބަސްވުމުގައި ސޮއިކުރެއްވީ ފިޝަރީޒް މިނިސްޓަރު އަހުމަދު ޝިޔާމް އެވެ. އަދި ލަކީ ގްލޯބަލް ޕްރޮޖްކްޓްސްގެ ފަރާތުން ސޮއިކުރެއްވީ އެ ކުންފުނީގެ އެމްޑީ އާޝިޝް އޮބެރޯއީ އެވެ.
ސަރުކާރުން ބުނީ އިސްލާމިކް ޑިވެލޮޕްމަންޓް ބޭންކްގެ "ސަޕޯޓް ޕީޕަލްސް ލައިވްލިހޫޑް އިން ފިޝަރީޒް ސެކްޓާ އިން މޯލްޑިވްސް ތުރޫ ސަސްޓެއިނަބަލް އެނާޖީ މަޝްރޫއު" ގެ ދަށުން މަދުވެގެން 100 އެއްހާ ދޯނީގައި އާރްއެސްޑަބްލިއު ސިސްޓަމްތައް އެޅުމަށް އިސްލާމިކް ފައިނޭންސްއިން ވަނީ ފެސިލިޓީއެއް ހަމަޖެހިފައި ކަމަށެވެ.
މަސްކިރާ ބަނދަރަށް ތާޒާކޮށް ގެންނަ މަސް ފިނިކޮށް ރައްކާކުރާނޭ ކޯލްޑް ސްޓޯރޭޖްތައް އިތުރުކުރުމަކީ އަމާޒެއް ކަމަށާއި މަސްވެރި ސިނާއަތުގައި އިގްތިސާދީ ނަފާ އިތުރުކުރުމަކީ ވެސް ރައީސްގެ މުހިންމު ސިޔާސަތެއް ކަމަށް ސަރުކާރުން ބުނެ އެވެ.
އޭގެ އިތުރުން، ރާއްޖޭގައި މިވަގުތު ހުރި 8،500 ޓަނުގެ ކޯލްޑް ސްޓޯރޭޖް ކެޕޭސިޓީ ދެގުނަކުރުމަކީ ރައީސް މުއިއްޒުގެ ރިޔާސީ ވައުދެކެވެ. އަދި ސަރުކާރުން އަމާޒު ހިފާފައި ވަނީ މިހާރު ހުރި ކެޕޭސިޓީ ތިން ގުނަ އިތުރުކޮށް 25،000 ޓަނަށް އިތުރުކުރުމަށެވެ.
