ގިނަ ރިސޯޓުތަކެއް ހިންގަމުން އަންނަ ކްރައުން އެންޑް ޗަމްޕާ ރިސޯޓްސްގެ ޗީފް އެގްޒެކެޓިވް އޮފިސަރަކަށް އެ ކުންފުނީގެ ޗީފް އޮޕަރޭޓިން އޮފިސަރަކަށް ހުންނެވި މުހައްމަދު ސޮލާހު ހަމަޖައްސައިފި އެވެ.
ޓޫރިޒަމު ދާއިރާގައި ގިނަ އަހަރުތަކެއް ވަންދެން ހިދުމަތް ކުރައްވާފައިވާ ސޮލާހު ކްރައުން އެންޑް ޗަމްޕާ ރިސޯޓްސްގެ ސީއޯއޯއަކަށް އައްޔަނުކުރީ ސެޕްޓެމްބަރު 2022, ގަ އެވެ. އޭގެ ދެ އަހަރު ފަހުން އެ ކުންފުނީގެ ހިންގުމުގެ އެންމެ އިސްވެރިޔާގެ މަގާމަށް އޭނާ އައްޔަނުކުރިކަން މިއަދު ވަނީ ހާމަކޮށްފަ އެވެ.
އޭގެ ކުރިން އޭނާ ހުރީ ޑުބާއީގައި ހުންނަ ޒާޔާ ހޮސްޕިޓާލިޓީ ގްރޫޕުގެ ކްލަސްޓާ ޖެނެރަލް މެނޭޖަރުގެ މަގާމުގަ އެވެ.
މީގެ ކުރިން އޭނާ ވަނީ ކްރައުން އެންޑް ޗަމްޕާ ގްރޫޕުގެ ރިސޯޓެއް ކަމުގައިވާ ކޮމަންޑޫ އައިލެންޑް ރިސޯޓުގެ ޖެނެރަލް މެނޭޖަރުގެ މަގާމު ވެސް ފުރުއްވާފަ އެވެ. އޭރު އޭނާއަކީ ރާއްޖޭގެ ރިސޯޓެއްގެ ޖެނެރަލް މެނޭޖަރުކަމާ ހަވާލުވި އެންމެ ހަގު މީހުންގެ ތެރެއިން އެކަކެވެ.
ޓޫރިޒަމް ދާއިރާއާ 2002 ވަނަ އަހަރު ގުޅުނު ސޮލާހު އެންމެ ފުރަތަމަ އަދާކުރި ވަޒީފާއަކީ މީރު އައިލެންޑް ރިސޯޓުގެ ރިސެޕްޝަނިސްޓް/ޓެލެފޯން އޮޕަރޭޓަރު ކަމެވެ. އެ ރިސޯޓުގައި މަސައްކަތްކުރަމުން ދަނިކޮށް ލިބުނު ފުރުސަތެއްގެ އޭނާ ވަނީ ހޮސްޕިޓާލީޓީ ދާއިރާއިން ބެޗެލާސް ޑިގްރީ ފުރިހަމަކުރައްވާފަ އެވެ.
މަތީ ތައުލީމު ހާސިލުކުރައްވަން އުޅުއްވި ދުވަސްވަރު އޭނާ ވަނީ މެލޭޝިއާ އަދި ޝީޝެލްސްގައި މަސައްކަތުގެ ތަޖުރިބާ ހޯއްދަވާފަ އެވެ. ކިޔަވާ ވިދާޅުވުމަށް ފަހު އަލުން މީރު އައިލެންޑް ރިސޯޓާ ގުޅި ފްރަންޓް އޮފީސް މެނޭޖަރު ކަމާއި ގެސްޓް ސާވިސަސް މެނޭޖަރު ކަން ވެސް ކުރެއްވި އެވެ.
