އެއްވެސް ޓެކްސްއެއް ބޮޑުނުކުރާނެ ކަމުގެ ވައުދު ރައީސް ޑރ. މުހައްމަދު މުއިއްޒު ވެވަޑައިގެންނެވިތާ އަހަރެއް ނުވަނީސް އެމަނިކުފާނުގެ ސަރުކާރު ޓީޖީއެސްޓީ، ގްރީން ޓެކްސް، އަދި އެއާޕޯޓު ފީތައް މިއަދު ބޮޑުކޮށްފި އެވެ.
ޓީޖީއެސްޓީ، ގްރީން ޓެކްސް، އަދި އެއާޕޯޓު ފީތައް ބޮޑުކުރަން މަޖިލީހުން މިދިޔަ ބުރާސްފަތީގައި ފާސްކުރި ބިލުތައް މިއަދު ރައީސް ވަނީ ތަސްދީގު ކުރައްވާފަ އެވެ. މިއަދުން އެ ގާނޫނުތައް ގެޒެޓު ކޮށްފައިވާއިރު ގާނޫނުތަކުގެ ދަށުން ހުރި ގަވާއިދުތަކަށް އިސްލާހު ގެނެސް 30 ދުވަހުގެ ތެރޭގައި ގެޒެޓު ކުރަން ޖެހޭ ކަމަށް ވަނީ ކަނޑައަޅާފަ އެވެ.
މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ގެނައި އިސްލާހާ އެކު ވަނީ ވަނީ ޖޫން، 2025، އިން ފެށިގެން ޓީޖީއެސްޓީ 16 ޕަސެންޓުން 17 ޕަސެންޓަށް ބޮޑު ކުރުމަށް ނިންމާފަ އެވެ. އަންނަ އަހަރު ޓީޖީއެސްޓީގެ ގޮތުގައި 9.9 ބިލިއަން ޑޮލަރު ލިބޭނެ ކަމަށް އަންދާޒާކޮށްފައިވާއިރު، ޑޮލަރުން ބަލާކަމުގައި ވަނީ ނަމަ އެއީ 642 މިލިއަން ޑޮލަރެވެ.
ޓޫރިޒަމް ގާނޫނުގެ އިސްލާހާއެކު ޖެނުއަރީ، 2025، އިން ފެށިގެން ގްރީން ޓެކްސް ހަ ޑޮލަރުން 12 ޑޮލަރަށް ބޮޑުވާނެ އެވެ. އަދި, 50 ކޮޓަރިއަށް ވުރެ މަދު ތަންތަނުން ދައްކަން ޖެހޭ ވަރު ތިން ޑޮލަރުން ހަ ޑޮލަރަށް ވަނީ ބޮޑުކޮށްފަ އެވެ.
އެއާޕޯޓު ޓެކްސް އަދި ފީ ބޮޑުކުރާނީ ޑިސެމްބަރު 1 އިން ފެށިގެންނެވެ. އިކޮނޮމީ ކްލާހުން ދަތުރު ކުރާ ދިވެހިންގެ އަތުން ނަގާ ފީ އާއި ޓެކްސް ނޫން އެހެން ހުރިހާ ފީއެއް އަދި ޓެކުހެއް އެ ދުވަހުން ފެށިގެން ބޮޑުވާނެ އެވެ.
ޓެކްސްއާ ގުޅޭ ގޮތުން ރައީސްގެ ވައުދު
ރިޔާސީ ކެމްޕޭނުގައި އެކި ޕްލެޓްފޯމްތަކުގައި ރައީސް ވަނީ "ޓެކްސްގެ އެއްވެސް ސީލިންއެއް ބޮޑުކޮށް, ޓެކްސް ބޮޑުކުރަން ގަސްތު ނުކުރަން" ކަމަށް ވިދާޅުވެފަ އެވެ.
ސަންގު ޓީވީ ސެޕްޓެމްބަރު 2023 ގައި ބޭއްވި ރިޔާސީ ބަހުސްގެ މޮޑަރޭޓަރަކަށް ހުންނެވި މިހާރުގެ ޔޫތު މިނިސްޓަރު އިބްރާހިމް ވަހީދު (އަސްވާޑު) ޓެކްސްއާ ގުޅޭ ސުވާލެއް، ޕީއެންސީގެ ރިޔާސީ ކެންޑިޑޭޓު، މިހާރުގެ ރައީސް ޑރ. މުހައްމަދު މުއިއްޒުއާ އަމާޒު ކުރެއްވި އެވެ.
"2026 ގައި ދައްކަން އެއް ބިލިއަން ޑޮލަރު ދައްކަން އެއްވެސް ޕްލޭނެއް އެބަ އޮތްތޯ؟ ވޯޓަށް ރައްޔިތުން ޅޮސް އުނދޯންޏަށް އެރުވުމަށް ފަހު، ވެރިކަމަށް އާދެވުމުން އަނެއްކާ ރައްޔިތުންނާއި ވިޔަފާރިތަކުން ޓެކްސް ނަގަންތޯ ތިޔަ ބޭފުޅުން ވިސްނަނީ؟ ނުވަތަ ކިހިނެއްތޯ ފައިސާ ދައްކާނީ؟," ރައީސަށް އަމާޒުވި ސުވާލުގައި އޮތެވެ.
ސުވާލަށް ރައީސް މުއިއްޒު ޖަވާބު ދެއްވަމުން ގެންދަވަނިކޮށް، މޮޑަރޭޓަރު އެއްސެވީ އިތުރު ޓެކުހެއް ނަގާނެންތޯ އެވެ.
"އެއްވެސް އިތުރު ޓެކްސްއެއް ތައާރަފެއް ނުކުރާނަން. މިހާރު ހުރި ޓެކްސްގެ ބޭނުންކޮށްގެން ޓެކްސް ބޭސް ފުޅާކުރާނ.ީ އޭގެ މާނައަކީ މިހާރު ނުނިމިހުރި ރިސޯޓުތައް ނިންމެނޭނެ، އަދި އޭގެ އިތުރަށް އަޅުގަނޑުމެންނަށް މި ލިބެން ހުރި ފައިސާ އެހެން އިގުތިސާދުތަކުގެ ތެރެއިން ހާއްސަކޮށް މަސްވެރިކަމުގެ ދާއިރާއިން ލިބޭނެ ގޮތް ހަދާނަން،" ރައީސް މުއިއްޒު ވިދާޅުވި އެވެ.
އޭގެ އިތުރުން ވެރިކަމަށް ވަޑައިގަތުމަށް ފަހު ރައްޔިތުންގެ މަޖިލީހުގެ އިންތިހާބުގެ ކެމްޕޭނުގެ ތެރެއިން ވެސް ރައީސް ވަނީ އެއްވެސް ޓެކްސްއެއް ބޮޑުނުކުރާނެ ކަމަށް ވިދާޅުވެފަ އެވެ.
"ޓެކްސް ބޭސް ފުޅާކުރާ ވާހަކަ ދެއްކީމާ، ބައެއް ތަންތާނގައި ލިޔެފައި މި އޮންނަނީ، ފޭސްބުކް ޕޭޖްތަކުގައި ކަންނޭނގެ، އިތުރު ޓެކްސްއެއް ނަގަން އެބައުޅެޔޭ. ޓެކްސް ބޮޑުކުރަން އުޅެނިއްޔޭ. މިހެން އޮޅުވާލުން މިއޮތީ. ޓެކްސް ބޭސް ފުޅާކުރުމަކީ، މިހާރު ނަގަމުންދާ ޓެކްސްތައް، މިސާލަކަށް، ޓޫރިޒަމް ޓީ.ޖީ.އެސް.ޓީ. އަޅުގަނޑު މި ދަންނަވަނީ، ނުހެދި ހުރި ރިޒޯޓުތައް ހަދަން ފައިސާ ހޯދައިދީ، ނޫނީ މަގުތައް ފަހިކޮށްދިނީމާ އެ ރިޒޯޓުތައް ނިމޭނެ ވާހަކަ. އިތުރު އިންވެސްޓަރުން، ޓޫރިޒަމް އިންޑަސްޓްރީއަށް ގެންނާނީއޭ. ގެނެސްގެން ޓޫރިޒަމް ފުޅާވީމާ ޓީ.ޖީ.އެސް.ޓީ. ލިބޭލެއް ގިނަވާނެއޭ. އެ ފުޅާވީ. އެ ބޭސް ފުޅާވީ. އެގޮތަށް މިހާރު ނަގަމުންދާ ޓެކްސް، އެ ޓެކްސްތަކުން ލިބޭ އާމްދަނީ ގިނަކުރަން އަޅުގަނޑުމެންގެ އިޤްތިޞާދީ އެޖެންޑާ ކަނޑައަޅާފައޭ މިއޮތީ," މާޗު 3 ވަނަ ދުވަހު ރ. ދުވާފަރުގައި ރައީސް ވިދާޅުވި އެވެ.
