ދިވެހި ސަރުކާރުގެ ހުއްދަ ނެތި ޕާކިސްތާނުގައި ހުންނަ އަފްގާނިސްތާނުގެ އެމްބެސަޑަރާ ބައްދަލު ކުރުމުން، ޕާކިސްތާނަށް ދިވެހި ސަރުކާރުން ކަނޑައަޅާފައި ހުރި މުހައްމަދު ތޯހާ މަގާމުން ވަކިކޮށް އަނބުރާ ރާއްޖެ ގެންނަން ނިންމައިފި އެވެ.
އަފްގާނިސްތާނުގައި ތާލިބާނުން ހިންގާ ސަރުކާރުން ޕާކިސްތާނަށް ކަނޑައަޅާފައި ހުންނަ އެކްޓިން އެމްބެސަޑަރު ސަރްދާރް އަހުމަދު ޝަކީބުއާ ތޯހާ ބައްދަލު ކުރި މައްސަލައިގައި ފިޔަވަޅު އަޅާފައިވާ ކަމަށް އިއްޔެ ހާރިޖީ އޮފީހުން ވެސް ވަނީ ބުނެފަ އެވެ.
އެކަމަކު އެޅީ ކޮން ފިޔަވަޅެއްކަން ފޮރިން މިނިސްޓްރީން ރަސްމީކޮށް ނުބުނެ އެވެ. ނަމަވެސް އެ މައްސަލައިގައި ތޯހާ މަގާމުން ވަކިކޮށްފައިވާކަން މި ނޫހަށް ވަނީ އެނގިފަ އެވެ. އޭނާ މިހާރު ހުރީ ވެރި ރަށް މާލެއަށް އައުމުގެ މަގުމަތީގަ އެވެ.
އަފްގާނިސްތާނާއެކު މާޗް، 2006، ވަނަ އަހަރު ދިވެހިރާއްޖެއިން ޑިޕްލޮމެޓިކް ގުޅުން ގާއިމު ކުރި ނަމަވެސް އެ ގައުމުގައި މިވަގުތު ވެރިކަން ކުރާ ތާލިބާނުގެ ސަރުކާރުން، ދިވެހި ސަރުކާރުން ބަލައެއްނުގަނެ އެވެ. އެކަން މިއަދު ފޮރިން މިނިސްޓްރީން ވެސް ކަށަވަރުކޮށްދިނެވެ.
"ދިވެހިރާއްޖެއިން ގައުމުތަކުގެ ސަރުކާރުތައް ބަލައިގަތުމުގައި ސުވާލެއް އުފެދޭ ހާލަތެއްގައި އަބަދުވެސް ބަލަނީ އދ. އިން ކަނޑައަޅާފައިވާ މިންގަޑުތަކާއި އުސޫލުތަކަށް. އަދި މި އުސޫލުތަކާއި އެއްގޮތްވާ ގޮތުގެ މަތީން، އދ. ގައި އަފްގާނިސްތާނު ތަމްސީލުކުރާ ފަރާތަކީ އަފްގާނިސްތާނުގެ ސަރުކާރުގެ ގޮތުގައި ދިވެހި ސަރުކާރުން ބަލައިގަންނަ ފަރާތް ކަމުގައި ދެންނެވިން،" ހާރިޖީ އޮފީހުން ބުންޏެވެ.
ހުކުރު ދުވަހުގެ ބައްދަލުވުމަށްފަހު، އަފްގާނިސްތާނުގެ އެމްބެސަޑަރުގެ އޮފީހުން ބުނީ ރާއްޖެ އާއި އަފްގާނިސްތާނާ ދެމެދު ގުޅުން ބަދަހިކޮށް، ވިޔަފާރީގެ ގުޅުން އެކުލަވާލުމަށް އެ ބައްދަލުވުމުގައި މަޝްވަރާ ކުރި ކަމަށެވެ. އަފްގާނިސްތާނު މެދުވެރިކޮށް ސެންޓްރަލް އޭޝިޔާގެ އެހެން ގައުމުތަކާ ރާއްޖެއިން ވިޔަފާރި ކުރެވޭނެ މަގު ފަހި ކުރުމަށް ވެސް އެ ބައްދަލުވުމުގައި މަޝްވަރާ ކުރި ކަމަށް އަފްގާނިސްތާނުގެ އެމްބަސީން ބުނެ އެވެ.
