މިލާން (ނޮވެމްބަރު 4) - އިޓާލިއަން ލީގުގެ އެއް ވަނައިގައި އޮތް ނަޕޯލީ ދަނޑުގައި އެ ޓީމުގެ މައްޗަށް 3-0 އިން އެޓަލަންޓާ ކުރިހޯދިއިރު، އެންމެ ފަހުގެ ޗެމްޕިއަން، އިންޓަ މިލާނުން ވެނެޒިއާ އަތުން 1-0 އިން މޮޅުވެއްޖެ އެވެ.
ރޭގެ ނަތީޖާތަކާ އެކު، އިންޓަ އިން ވަނީ އެއް ވަނައިގައި އޮތް ނަޕޯލީއާ ދެމެދު އެއް ޕޮއިންޓަށް ފަރަގުކުޑަކޮށްފަ އެވެ. ނަޕޯލީ އެއް ވަނައިގައި އޮތީ 11 މެޗުން 25 ޕޮއިންޓާ އެކު އެވެ. ދެ ވަނައިގައި އޮތް އިންޓަ އަށް 11 މެޗުން 24 ޕޮއިންޓް ލިބިފައިވާއިރު، ތިން ވަނައިގައި އޮތް އެޓަލަންޓާ އަށް 11 މެޗުން ވަނީ 22 ޕޮއިންޓް ލިބިފަ އެވެ. ފިއޮރެންޓީނާ ހަތަރެއްގައި އޮތީ 11 މެޗުން 22 ޕޮއިންޓް ހޯދައިގެންނެވެ. ފަސް ވަނައިގައި އޮތް ޔުވެންޓަސް އަށް ވަނީ 11 މެޗުން 21 ޕޮއިންޓް ލިބިފަ އެެވެ.
ނަޕޯލީގެ ދަނޑު ޑިއޭގޯ މަރަޑޯނާ ސްޓޭޑިއަމްގައި އެޓަލަންޓާގެ ތަރި އަކީ އަޑެމޯލާ ލުކްމަން އެވެ. އޭނާ ވަނީ 31 މިނިޓް ތެރޭ ދެ ގޯލު ޖަހައިފަ އެވެ. ފުރަތަމަ ލަނޑު ޖެހީ 10 ވަނަ މިނިޓްގަ އެވެ. އޭގެ 20 މިނިޓް ފަހުން ދެ ވަނަ ލަނޑު ޖެހިއިރު، މި ދެ ގޯލަށް ވެސް ފުރުސަތު ހޯދައިދިނީ ޑި ކަޓަލެއާ އެވެ.
ނަޕޯލީން ވެސް ލަނޑު ޖެހޭތޯ ގިނަ މަސައްކަތްތަކެއް ކުރި މި މެޗުގައި އެޓަލަންޓާގެ ފަހު ގޯލު ޖެހީ މެޗުގެ އިތުރު ވަގުތުގައި މަޓެއޯ ރެޓެގީ އެވެ.
އިންޓަ އިން އަމިއްލަ ދަނޑުގައި ވެނެޒިއާ ބަލިކުރި މެޗުގައި އެ ޓީމުގެ ހަމައެކަނި ލަނޑު ދެ ވަނަ ހާފުގައި ޖެހީ ލަޓައުރޯ މާޓީނޭޒް އެވެ. މި މެޗުގައި އިންޓަގެ ހެންރިކް މިިކިތާރްޔަން ޖެހި ލަނޑަކާއި ވެނެޒިއާގެ މަރިން ސްވާކޯ ޖެހި ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ވަނީ ބަލައިނުގަންނަން ނިންމައިފަ އެވެ.
