ލަންޑަން (ނޮވެމްބަރު 4) - އިނގިރޭސި ޕްރިމިއާ ލީގުގައި ރޭ ކުޅުނު މެޗުން ޗެލްސީއާ 1-1 އިން އެއްވަރުވެ، މެންޗެސްޓާ ޔުނައިޓެޑުން އެ ކްލަބްގެ ތާރީހުގައި ވެސް ޕްރިމިއާ ލީގުގައި އެންމެ ދަށްކޮށް ސީޒަނެއް ފަށަން ޖެހިއްޖެ އެެވެ.
ލީގުގައި ކުޅުނު 10 މެޗުން ލިބުނު 12 ޕޮއިންޓާ އެކު ޔުނައިޓެޑް އޮތީ 13 ވަނައިގަ އެވެ. އެންމެ ފަހުން ލީގުގައި ޔުނައިޓެޑުން އެންމެ ދަށްކޮށް ފެށީ 1986/1987 ވަނަ ސީޒަނުގަ އެވެ. އެއީ، ޕްރިމިއާ ލީގަށް ރީބްރޭންޑް ކުރުމުގެ ކުރިންނެވެ. ޔުނައިޓެޑުން މި ސީޒަނުގައި ލީގުގައި ނުވަ ގޯލު ޖެހިއިރު، މިއީ 1973/1974 ވަަނަ އަހަރުގެ ސީޒަނުގެ ލީގުގައި މިހާ ހިސާބަށް އައިއިރު، ވެސް ޔުނައިޓެޑުން ގޯލު ޖެހި އަދަދެވެ.
މިއީ އެރިކް ޓެން ހާގް ކޯޗުކަމުން ވަކިކުރި ފަހުން ޔުނައިޓެޑުން ލީގުގައި ކުޅުނު ފުރަތަމަ މެެޗެވެ. ވަގުތީ ކޯޗު ރޫޑް ވެން ނިސްޓަލްރޫއިގެ ކޯޗުކަމުގައި ލީގު ކަޕްގައި ޔުނައިޓެޑުން އަމިއްލަ ދަނޑުގައި 5-2 އިން ލެސްޓާ ސިޓީ ބަލިކުރި ނަމަވެސް، ރޭ ޗެލްސީ ކޮޅަށް ލީޑުނެގުނީ ދެ ވަނަ ހާފުގަ އެވެ. މެޗުގެ 70 ވަަނަ މިނިޓްގައި މި ޕެނަލްޓީ ޖެހީ ބްރޫނޯ ފެނާންޑޭސް އެވެ.
އެކަމަކު، ޔުނައިޓެޑަށް ލީޑުގައި އޮވެވުނީ ހަަތަރު މިނިޓެވެ. މޮއިސަސް ކައެސޭޑޯ ވަނީ ވޮލީ އަކުން ޖެހި ގޯލުން ނަތީޖާ ހަމަހަަމަކޮށްދީފަ އެވެ.
ޔުނައިޓެޑް ދަނޑުގައި އެންމެ ފަހުން ލީގުގައި ކުޅުނު 12 މެޗުން ވެސް ޗެލްސީ އަށް މޮޅެއް ލިބިފައިނުވެ އެވެ. މި މެޗުން ލިބުނު ޕޮއިންޓާ އެކު ޗެލްސީ އޮތީ 10 މެޗުން 18 ޕޮއިންޓާ އެކު ހަތަރު ވަނައިގަ އެވެ.
ލީގުގައި ރޭ ޓޮޓެންހަމް ހޮޓްސްޕާސް އިން ވަނީ ފަހަތުން އަރައި 4-1 އިން އެސްޓަން ވިލާ ބަލިކޮށްފަ އެވެ. މޯގަން ރޮޖާސްގެ ގޯލުން އެސްޓަން ވިލާ އިން ލީޑުނަގާފައިވަނިކޮށް، ބްރެނަން ޖޯންސަން ވަނީ ޓޮޓެންހަމް އަށް އެއްވަރުކޮށްދީފަ އެވެ. ޑޮމިނިކް ސޮލާންކޭގެ ދެ ގޯލާއި ޖޭމްސް މެޑިސަން ގޯލެކެވެ.
މި މޮޅާ އެކު، ޓޮޓެންހަމް އޮތީ ލީގުގެ ހަތް ވަނައިގަ އެވެ. އެއީ 10 މެޗުން 16 ޕޮއިންޓް ހޯދައިގެންނެވެ.
