އިންޑިއާގެ ސްރީނަގަރުގައި ފަތުރުވެރިކަމުގެ ސެންޓަރެއް ކައިރީ ހުރި މާރުކޭޓެއްގައި އަތު ބޮމެއް ގޮއްވާލައި 12 މީހަކު އިއްޔެ ޒަހަމް ކޮށްލައިފި އެވެ.
ހަމަލާ ދިނުމާ އެކު ސަލާމަތީ ހިދުމަތްތަކާއި ސިއްހީ ހިދުމަތްތެރި ވަނީ ވަގުތުން އެ ސަރަހައްދަށް ގޮސް އެހީތެރިކަން ފޯރުކޮށްދީ، ޒަހަމްވި މީހުން ޝްރީ މަހާރާޖާ ހަރި ސީހް ހޮސްޕިޓަލަށް ގެންގޮސްފަ އެވެ.
ސްރީނަގަރު އަދި ކަޝްމީރުގެ ޗީފް މިނިސްޓަރު އުމަރު އަބްދުﷲ "އެކްސް" ގައި ވިދާޅުވީ ހަމަލާދީ މައުސޫމް އެތައް ބައެއްގެ ފުރާނަ ނުރައްކަލަކަށް ވައްޓާލުން ބަލައިނުގަނެވޭނެ ކަމަށެވެ.
"ސަލާމަތީ ހިދުމަތްތަކުން މި ހަމަލާތައް ހުއްޓުވައި އާންމުންނަށް ހަމަޖެހިގެން އުޅެވޭނެ ގޮތެއް ހޯދައިދޭން ޖެހޭ،" އުމަރު އަބްދުﷲ ވިދާޅުވި އެވެ.
ހަމަލާ ދިން މީހުން ހޯދުމަށް އިންޑިއާގެ ސަލާމަތީ ހިދުމަތްތަކުން ވަނީ އޮޕަރޭޝަނެއް ފަށާފަ އެވެ.
އެ ހަމަލާ ދިނީ ޕާކިސްތާނަށް ނިސްބަތްވާ ހަނގުރާމަވެރި ޖަމާއަތެއް ކަމަށްވާ އެލްއީޓީގެ ސީނިއާ ކޮމާންޑަރަކު ސްރީނަގަރުގައި މަރާލިތާ އެއް ދުވަސް ފަހުންނެވެ.
