އަންނަ އަހަރަށް ލަފާކޮށް ސަރުކާރުން ހުށަހެޅި ބަޖެޓުން ފެނިގެންދަނީ ރައްޔިތުންނަށް ވީ ވައުދުތައް ފުއްދޭނެ ގޮތެއް ހޯދިފައި ނެތްކަން ކަމަށާއި އެ ބަޖެޓަކީ ރައްޔިތުންގެ އުއްމީދުތަކުގައި ކޮޅުފައި ޖަހައި ރައްޔިތުންގެ ޖީބަށް އަތް ބާނާނެ ބަޖެޓެއް ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ މާލީ ހާލަތު އެނގިވަޑައިގަންނަވާ ކަމަށް ރައީސް މުއިއްޒު ކެމްޕޭނު ތެރޭގައި ވިދާޅުވި ނަމަވެސް ވެރިކަމަށް އަހަރެއްވާން ގާތްވެފައި އޮއްވައި ހުށަހަޅާފައިވާ ބަޖެޓުގައި ރައްޔިތުންނަށް ވީ ވައުދުތައް ފުއްދާނެ ޕްލޭނެއް އަދި ރޭވުންތެރިކަމެއް ވެސް ނެތް ކަމަށެވެ.
"މި ބަޖެޓުން ރައްޔިތުންނާއި ވިޔަފާރިތަކުން ނަގާ ޓެކްސްތައް ބޮޑުކުރީމާ އެ ފަރާތްތަކުގެ ފުއްދުންތެރިކަން ދަށްވެ، އިގުތިސާދީ ނަފާއަށް ނޭދެވޭ އަސަރު ކުރާނެ، ޓެކްސް އާމްދަނީއާ ނުބައްދަލު މިންވަރަކަށް ހަރަދު ބޮޑުކުރުމުން މާލީ ދެމެހެއްޓެނިވިކަން ގެއްލިގެންދޭ، މި ބަޖެޓުގައި ރައްޔިތުންނާ ގުޅުންހުރި ހައްސާސް ބައިތަކުން ހަރަދު ކުޑަ ކުރާނެ ކަމަށް ބުނާއިރު، ސަރުކާރުން ކުރާ އިސްރާފާއި، ސިޔާސީ މަގާމުތަކުގެ މުސާރައާއި އިނާޔަތްތަކަށް ހޭދަކުރާ މިންވަރު ކުޑަކުރާކަށް މަސައްކަތް ކުރާ ތަނެއް ބަޖެޓުން ނުފެނޭ،" އޭނާ ވިދާޅުވި އެވެ.
ޝާހިދު ވިދާޅުވީ މިހާރު ވެސް ފެންނަނީ ދައުލަތުގެ ރިކަރަންޓު ހަރަދުތައް މައްޗަށް ދާ މަންޒަރު ކަމަށެވެ. އެހެން އެކަން އޮތްއިރު، މިހާރު ހުށަހަޅާފައި އޮތް ބަޖެޓު ފޫބައްދަން 16.9 ބިލިއަން ރުފިޔާ ހޯދަން ޖެހުނު ނަމަވެސް އެ ފައިސާ ހޯދާނެ ގޮތުގެ ހަރުދަނާ ރޭވުންތެރިކަމެއް ބަޖެޓުން ފެންނަން ނެތް ކަމަށް ޝާހިދު ވިދާޅުވި އެވެ.
"މީގެ ބޮޑުބައި ހޯދުމަށް ޖަހާފައި އޮތީ ބޭރުގެ ކޮމާޝަލް ބޭންކުތަކުން، ޒަމާންވީ ހާރިޖީ ގުޅުންތަކަށް މި ސަރުކާރުގެ އަމަލުތަކުން ނޭދެވޭ އަސަރުކޮށްފައިވުމުން މި ފައިސާ ހޯދުމަށް މިހާރު ވެސް ސަރުކާރު ވަނީ ނުކުޅެދިފައި. މި ބަޖެޓަކުން އެކަމަކަށް ތަސައްލީއެއް ނުހޯދޭ،" ޝާހިދުގެ ޕޯސްޓުގައި ލިޔުއްވާފައިވެ އެވެ.
"މި ބަޖެޓުގެ ސަބަބުން އާންމު ރައްޔިތުންގެ ދިރިއުޅުމުގެ ފެންވަރު އަންނަ އަހަރު ދަށްވާނެ. ވިޔަފާރިތަކުގެ ފައިދާ ދަށްވާނެ. އިގުތިސާދީ ދުވެލި ބުރަކި ޖެހޭނެ،"
އޭގެ އިތުރުން ޝާހިދު ވިދާޅުވީ މި ސަރުކާރުން ގެންދަނީ އެމްޑީޕީ ސަރުކާރުން ގެނައި ހާމަކަން ބޮޑު ދެފުށް ފެންނަ ސިޔާސަތު ބަދަލުކޮށް ސިއްރުވެރި ސިޔާސަތަކަށް ބަދަލު ކުރަމުން ކަމަށެވެ. އެގޮތުން މީގެ ކުރިން މަޖިލީހަށް ހުށަހަޅާ ބަޖެޓުތަކުގައި ފެންނަން ހުންނަ ތަފުސީލުތައް މިފަހަރު ހުށަހެޅި ބަޖެޓުގައި ފެންނަން ނެތް ކަމަށް މަޖިލީހުގައި ވެސް ގިނަ ދުވަސްތަކެއް ހިދުމަތް ކުރެއްވި ޝާހިދު ވިދާޅުވި އެވެ.
"ދައުލަތުގެ ބަޖެޓުގެ އެންމެ ބޮޑު ދެ ބަޔަކީ މުވައްޒަފުންގެ މުސާރަ އާއި ތަރައްގީގެ މަޝްރޫއުތައް، މުވައްޒަފުންގެ މުސާރަ ބެހިގެންދާ ގޮތުގެ ތަފުސީލެއް ބަޖެޓުގައި ނެތް، ތަރައްގީ މަޝްރޫއުތަކަށް ކަނޑައަޅާފައިވާ 12 ބިލިއަން ރުފިޔާ ހަރަދު ކުރަނީ ކޮން ރަށެއްގެ ކޮން މަޝްރޫއަކަށް ކަމެއް އެނގޭކަށް ނެތް،" ޝާހިދު ވިދާޅުވެފައިވެ އެވެ.
ޝާހިދު ވިދާޅުވީ ބަޖެޓު އެގޮތަށް އޮތުމުން ރައްޔިތުންނަށް ސަރުކާރުން ޖަވާބުދާރީ ވުމަށް ހުރަސް އެޅޭނެ ކަމަށެވެ. އަދި ނަތީޖާއެއްގެ ގޮތުން ވައްކަމާއި ފަސާދައަށް ހުޅުވިގެންދާނެ ކަމަށް ޝާހިދު ވިދާޅުވި އެވެ.
