އަމިއްލަ އިިންޝުއަރެންސެއް އޮތްނަމަ އެ ހުސްނުވަނީސް އާސަންދަ ބޭނުން ނުކުރެވޭ ގޮތް ކުއްލިއަކަށް ހެދުމަކީ، ހޮސްޕިޓަލްގެ ކައުންޓަރުން ހިދުމަތް ދިނުމަށް ލަސްތަކެއް އަންނާނެ ކަމެއް ކަމަށް، ރާއްޖޭގެ އެންމެ ބޮޑު އަމިއްލަ ހޮސްޕިޓަލް، އޭޑީކޭއިން މިއަދު ބުނެފި އެވެ.
އޭޑީކޭ ހޮސްޕިޓަލުން ބޭއްވި ނޫސްވެރިންގެ ބައްދަލުވުމުގައި އެ ހޮސްޕިޓަލުގެ ޗީފް މެޑިކަލް އޮފިސަރު ޑރ. އަބްދުﷲ ނިޔާފު ވިދާޅުވީ ދުރާލައި މަޝްވަރާ ނުކޮށް އެފަދަ ނިންމުމެއް ނިންމުމުން އުނދަގޫތަކެއް ކުރިމަތިވި ކަމަށާއި އެ ބަދަލަށް މުވައްޒަފުން ވެސް ރަނގަޅަށް އަހުލުވެރި ކުރަން ވަގުތު ނުލިބުނު ކަމަށެވެ.
"އަޅުގަނޑުމެން ވެސް އިންޝުއަރެންސް ކުންފުނިތަކަށް ބިލް މި ކުރަނީ ސޮފްޓްވެެއާއެއް މެދުވެރިކޮށް. ކުއްލި ބަދަލެއް ވީމަ މެނުއަލީ ސްޓެޕްތަކެއް އޭގެ ތެރެެއަށް މިހާރު އައިމަ ހިދުމަތް ހޯދަން އަންނަ ފަރާތްތައް ކައުންޓަރު ދޮށުގައި ހޭދަ ކުރާ ވަގުތު ދިގުވެދާނެތީ ކަންބޮޑުވުންތަކެއް އެބަ އޮތް،" ނިޔާފު ވިދާޅުވި އެވެ.
ކައުންޓަރުގެ ހިދުމަތް ލަސްވާ ސަބަބުތަކުގެ ތެރޭގައި ޑޮކްޓަރަށް ދައްކަން އަންނަ ކޮންމެ ދިވެހިރައްޔިތެއްގެ އަމިއްލަ އިންޝުއަރެންސްއެއް އޮތްތޯ ވަކިން، އިންޝްރުއަރެންސް ކުންފުނިތަކުގެ ޕޯޓަލުން ބެލުމާއި ފައިސާގެ ލިމިޓު ހަމަވެއްޖެތޯ ބެލުން ހިމެނޭ ކަމަށެވެ.
އިންޝުއަރެންސް ހިދުމަތްދޭ ޕޯޓަލްތަކަށް، ސިއްހީ ހިދުމަތްދޭ ތަންތަނުން ވަންނަ މިންވަރު ދެން އިތުރުވެގެން ދާނެ ކަމަށާއި އެއް ފަހަރާ ގިނަ ބަޔަކު ވަނުމަކީ އެ ޕޯޓަލްތަކަށް ބާރުބޮޑުވެ ހިދުމަތަށް ލަސްތަކެއް އައުން ވެސް އެކަށީގެންވާ ކަމަށް ނިޔާފު ވިދާޅުވި އެވެ.
"އެފަރާތެއްގެ ޕްރައިވެޓް އިންޝުއަރެންސެއް އޮތްތޯ ނެތްތޯ ބަލާލުމަށް ޕޯޓަލްއަށް ލޮގިން ކޮށްލާފައި ބެލިދާނެ. އެއަށް ދެތިން މިނެޓު ނަގާފާނެ. އެކަމަކު އޭނަ ހޯދަން އައި ހިދުމަތަށް ކަވަރޭޖު ބާކީ އޮތްތޯ، ޕްރައިވެޓް އިންޝުއަރެންސްގެ އުސޫލުތަކަށް ބަލާއިރު ޖުމްލަ އިންޝުއަރެންސް އެމައުންޓްގެ ވަކި ޕަސަންޓެއް ނޫނީ މިންވަރެއް މި އޮންނަނީ އައުޓް ޕޭޝަންޓަށް. ވަކި މިންވަރެއް މި އޮންނަނީ ބޭސް ސިޓީއަށް. އެހެންވީމަ އެ ހޯދަން އައި ހިދުމަތުގެ ލިމިޓް އޮތްތޯ ބަލާލަން ވަގުތު ކޮޅެއް ނަގާނެ،" ނިޔާފު ވިދާޅުވި އެވެ.
އާސަންދައިން ގެނައި ބަދަލާ އެކު އެލައިޑް އިންޝުއަރެންސާއި ސޮލަރެލް އިންޝުއަރެންސްއިން ވަނީ ކޭޝްލެސް ހިދުމަތް ދިނުން މެދުކަނޑާލާފަ އެވެ. މިގޮތުން، އެލައިޑް އަދި ސޮލަރެލްއިން ހިދުމަތް ހޯދާ ފަރާތްތަކުން ދެން ޖެހޭނީ ޑޮކްޓަރަށް ދައްކާއިރު އަމިއްލަ ޖީބު ފައިސާ ދެއްކުމަށްފަހު، އެ ފައިސާ އަނބުރާ ހޯދުމަށް އިންޝުއަރެންސް ކުންފުންޏަށް ހުށަހަޅާށެވެ.
