އާސަންދައިން ހިދުމަތް ދިނުމުގައި އަމިއްލަ އިންޝުއަރެންސް އޮތް މީހުންނަށް، އެ އިންޝުއަރެންސަށް އިސްކަން ދިނުމަށް ނިންމާފައިވާ ދަނޑިވަޅެއްގައި އެލައިޑް އިންޝުއަރަންސް އަދި ސޮލަރެލްސް އިންޝުއަރެންސްއިން ކޭޝްލެސް ހިދުމަތް މެދުކަނޑާލައިފި އެވެ.
ކޭޝްލެސް ހިދުމަތް މެދުކަނޑާލުމާ އެކު އެލައިޑް އަދި ސޮލަރެލްއިން ހިދުމަތް ހޯދާ ފަރާތްތަކުން ދެން ޖެހޭނީ ޑޮކްޓަރަށް ދައްކާއިރު އަމިއްލަ ޖީބު ފައިސާ ދެއްކުމަށްފަހު، އެ ފައިސާ އަނބުރާ ހޯދުމަށް އިންޝުއަރެންސް ކުންފުންޏަށް ހުށަހަޅާށެވެ.
އެލައިޑާއި ސޮލަރެލްއިން ވަނީ އެ ކުންފުނިން ދޭ ކޭޝްލެސްގެ ހިދުމަތް ހުއްޓާލިކަން ކަސްޓަމަރުންގެ އިތުރުން ސިއްހީ ހިދުމަތް ދޭ ފަރާތްތަކަށް އިއްޔެ އަންގާފަ އެވެ.
އާސަންދައިން މިހާރު ނިންމާފައިވާ ގޮތުން އަމިއްލަ އިންޝުއަރެންސެއް އޮތް މީހެއްނަމަ، އެ މީހަކަށް އާސަންދައިގެ ހިދުމަތް ލިބޭނީ އަމިއްލަ އިންޝުއަރެންސްގެ ލިމިޓް ހަމަވުމުންނެވެ. އެގޮތުން، އަމިއްލަ އިންޝުއަރެންސް އޮންނަ މީހުންނަށް ސިއްހީ ހިދުމަތް ދޭ ތަންތަނުން މީގެފަހުން ތައްޔާރު ކުރާނީ ވެސް އަމިއްލައަށް ފައިސާ ދައްކަން ޖެހޭ ބޭސް ސިޓީއެކެވެ.
އެގޮތަށް އާސަންދައިން ނިންމީ ހަމައެކަނި އެނދުމަތި ނުކޮށް ދެވޭ ފަރުވާއަށެވެ. ނަމަވެސް އެނދުމަތި ކޮށްގެން ދޭ ފަރުވާއަށް ކުރިއެކޭ ވެސް އެއްގޮތަށް އާސަންދަ ލިބޭނެ ކަމަށް އެ ކުންފުނިން ބުންޏެވެ.
އާސަންދައިން ހިދުމަތަށް ގެނައި މުހިންމު ބަދަލުތައް:
- ސިއްހީ ހިދުމަތް ހޯދަން އަންނަ ފަރާތަކީ އަމިއްލަ އިންޝުއަރެންސެއް އޮތް މީހެއްނަމަ، ހިދުމަތުގެ މެމޯ ތައްޔާރު ކުރުމުގެ ކުރިން، އެކަން ކަށަވަރުކޮށް އެ އިންޝުއަރެންސްގެ ކަވަރޭޖް ލިމިޓް ހަމަވަންދެން އެ އިންޝުއަރެންސް މެދުވެރިކޮށް ޚިދުމަތް ފޯރުކޮށްދިނުން.
- ހޯދަން އެދޭ ހިދުމަތަކީ އަމިއްލަ އިންޝުއަރެންސުން ކަވަރކުރާ ހިދުމަތެއްނަމަ، އެ އިންޝުއަރެންސް މެދުވެރިކޮށް ހިދުމަތް ފޯރުކޮށްދިނުން (އެންމެހައި ހިދުމަތްތަކާއި ބޭސްސިޓީ ހިމެނޭގޮތަށް).
- މިހާރު ޢަމަލުކުރަމުންދާ އުސޫލާ އެއްގޮތަށް، އައުޓް ޕޭޝަންޓް ހިދުމަތްތަކަށް އަމިއްލަ އިންޝުއަރެންސާއެކު އާސަންދައަށް ބިލްނުކުރުން.
- އަމިއްލަ އިންޝުއަރެންސްގެ ދަށުން ނުލިބޭ ހިދުމަތެއް، އާސަންދައިން ލިބޭނަމަ، އެ ހިދުމަތެއް އާސަންދައިގެ ދަށުން ފޯރުކޮށްދިނުން.
- އަމިއްލަ އިންޝުއަރެންސްގެ ކަވަރޭޖް ލިމިޓް ހަމަވެފައިވާނަމަ އަދި އާސަންދައިން އެ ހިދުމަތެއް ލިބޭނަމަ، އެ ހިދުމަތެއް އާސަންދައިގެ ދަށުން ފޯރުކޮށްދިނުން.
- އަމިއްލަ އިންޝުއަރެންސެއް އޮންނަ މީހުން ހޯދާ ހިދުމަތާއި ގުޅޭ ކަވަރޭޖް ލިމިޓް ހުސްނުވާނަމަ، ހިދުމަތް ފޯރުކޮށްދިނުމުގައި އާސަންދަ ޕޯޓަލް ބޭނުންނުކުރުމާއި ބޭސް ސިޓީ ލިޔުމަށް ވިނަވި ޕޯޓަލް ބޭނުން ނުކުރުން.
ނަމަވެސް ޕްރައިވެޓް އިންޝުއަރެންސްގެ ތެރޭގައި މޯލްޑިވްސް ޕޮލިސް ސާވިސަސްއިން އަދި މޯލްޑިވްސް ޑިފެންސް ފޯރސްއިން ހިންގާ ސްކީމްތައް ނުހިމެނޭ ކަމަށް އާސަންދައިން ބުންޏެވެ.
އެލައިޑް އަދި ސޮލަރެލްއިން ދޭ ކޭޝްލެސް ހިދުމަތް ހުއްޓާލުމާ ގުޅިގެން ދިގު މުއްދަތަށް ބޭސް ކުރާ ފަރާތްތަކުން އަމިއްލަ ޖީބުން ބޮޑު ހަރަދުތަކެއް ކުރަން ޖެހުމުން ބޮޑެތި ކަންބޮޑުވުންތައް އަންނަނީ ފާޅު ކުރަމުންނެވެ. އެ ފައިސާ އަނބުރާ ލިބޭނީ އިންޝުއަރެންސް ކުންފުންޏަށް ހުށަހަޅައިގެންނެވެ.
