ދެކުނު އޭޝިއާގެ ތިން ގައުމެއްގައި ތަފާތު ދައްކާފައިވާ ސްޕެއިނުގެ ކޯޗު އޮސްކާ ބްރުޒޮން، ދާދި ފަހުން ހަވާލުވި އިންޑިއާގެ އީސްޓް ބެންގޯލް، އޭއެފްސީ ޗެލެންޖް ލީގުގެ ކުއާޓާ ފައިނަލުން ފުރުސަތު ހޯދައިފި އެވެ.
މީގެ 23 ވަރަކަށް ދުވަސް ކުރިން އީސްޓް ބެންގޯލް ކޯޗުގެ މަގާމާ އޮސްކާ ހަވާލުވިއިރު، އެ ޓީމު އޮތީ އިންޑިއަން ސުޕަ ލީގުގެ ފުލުގަ އެވެ. އަދިވެސް އެ ޓީމު އެ މަގާމުގައި އޮތްއިރު، އޮސްކާ ހަވާލުވި ފަހުން ވެސް ލީގުގައި ކުރިއެރުމެއް ނުލިބެ އެވެ.
އެކަމަކު، އޭއެފްސީ ޗެެލެންޖް ލީގުގައި ވާދަކުރި ގްރޫޕުން އެއް ވަނަ ހޯދައި، އީސްޓް ބެންގޯލް ވަނީ ކުއާޓާ ފައިނަލަށް ދަތުރުކޮށްފަ އެވެ. އީސްޓް ބެންގޯލް ކުޅުނީ، ބޫޓާނުގައި ކުރިއަށްދިޔަ، ގްރޫޕް އޭގަ އެވެ. އެ ގޮތުން، އެ ގްރޫޕްގެ ފުރަތަމަ މެޗުން އީސްޓް ބެންގޯލް ވަނީ ބޫޓާންގެ ޗެމްޕިއަން، ޕަރޯއާ 2-2 އިން އެއްވަރުވެފަ އެވެ. ދެ ވަނަ މެޗުގައި އޮސްކާގެ ކުރީގެ ޓީމު ބަޝުންދަރާ ކިންގްސް އަތުން އީސްޓް ބެންގޯލް ވަނީ 4-0 އިން މޮޅުވެފަ އެވެ.
ގްރޫޕްގެ ފަހު މެޗުގައި، މިއަދު އީސްޓް ބެންގޯލް އިން ވަނީ ލެބަނަންގެ ނަޖްމޭ އަތުން 3-2 އިން މޮޅުވެފަ އެވެ. އީސްޓް ބެންގޯލް އަށް ހަތް ޕޮއިންޓް ލިބުނުއިރު، ދެ ވަނަ ހޯދި ނަޖްމޭ އަށް ހަ ޕޮއިންޓް ވަނީ ލިބިފަ އެވެ. މި ގްރޫޕްގެ ފަހު މެޗުގައި ބަޝުންދަރާއާ ކުޅޭ، ޕަރޯ އަށް އެއް ޕޮއިންޓް ލިބިފައިވާއިރު، ފުލުގައި ބަޝުންދަރާ އޮތީ ޕޮއިންޓެއް ނުލިބި އެވެ.
ރާއްޖޭގެ ނިއު ރޭޑިއަންޓް ސްޕޯޓްސް ކްލަބް ގޮވައިގެން އޭއެފްސީ ކަޕްގައި ވާދަކުރި އޮސްކާ ވަނީ ބަޝުންދަރާއާ އެކު، އޭއެފްސީ ޗެމްޕިއަންސް ލީގުގެ ކޮލިފައިންގައި ކުޅެފަ އެވެ.
އޮސްކާ ދެކޭގޮތުގައި، އޭއެފްސީ ޗެލެންޖް ލީގުގެ ކުއާޓާ އަށް އީސްޓް ބެންގޯލް ދިއުމަކީ އެ ޓީމުގެ ސީޒަން ރަނގަޅު މިސްރާބަށް ގެންނަން ލިބުނު ފުރުސަތެކެވެ. އަދި މި މުބާރާތުގައި ހާސިލްކުރެވުނު ކަންކަމުން ހިތްވަރު ހޯދައި، އިންޑިއަން ސުޕަ ލީގުގައި ވެސް ނަތީޖާ ނެރެން އީސްޓް ބެންގޯލަށް ފަސޭހަވާނެ ކަމަށް އޮސްކާ ވަނީ ބުނެފަ އެވެ.
